مەديتسينالىق ساقتاندىرۋ قورىنا قاڭتار ايىنان بەرى 467 شاعىم ءتۇسىپ, تۇرعىندار وڭىردەگى كەيبىر اۋرۋحانالار مەن ەمحانالاردىڭ دۇرىس قىزمەت كورسەتپەي وتىرعانىنا نارازىلىق تانىتتى. دەگەنمەن بارلىق ارىز-شاعىمنىڭ 6 پايىزى عانا نەگىزدى دەپ سانالىپ وتىر. قوردىڭ وڭىردەگى فيليالىنىڭ ديرەكتورى نۇرلان قاسىموۆ العاشقى التى ايدا ەرتىس-بايان ءوڭىرى ازاماتتارىنان ۇيىمنىڭ شوتىنا 14,8 ملرد تەڭگە تۇسكەنىن, قازىرگى كۇنى ساقتاندىرىلعان وبلىس تۇرعىندارىنىڭ سانى 633 مىڭ ادامعا جەتكەنىن ايتادى. ال مەديتسينالىق قىزمەت كورسەتۋگە 42,8 ملرد تەڭگە جۇمسالىپتى.
– مىندەتتى مەديتسينالىق ساقتاندىرۋ ەنگىزىلگەلى بەرى ەمحانالاردا كونسۋلتاتيۆتى جانە دياگنوستيكالىق قىزمەتتەر سانى كۇرت وسكەنىن كورىپ وتىرمىز. جىل باسىنان جالپى سوماسى 3,8 ملرد تەڭگەگە وسىنداي قىزمەت تۇرلەرى كورسەتىلىپ, 53 مىڭنان استام ەمدەلۋشى ستاتسيونارلاردا ەم-دوم قابىلداعان. ءدارى-دارمەكتىڭ ءتىزىمى كەڭەيتىلىپ, امبۋلاتورلىق جاعدايدا پرەپاراتپەن قامتۋ قولجەتىمدى بولا ءتۇستى. بىلتىر بۇل باعىتتا 7,9 ملرد تەڭگە يگەرىلسە, بيىل جىل باسىنان 8 ملرد تەڭگە باعىتتالىپ ۇلگەرگەن, – دەيدى فيليال جەتەكشىسى.
ماماندار قورعا تۇسكەن ارىز-شاعىمداردىڭ سانى 62,2 پايىزعا ۇلعايعانىن بايقاعان. ولاردىڭ ويىنشا, بۇل ازاماتتاردىڭ مەديتسينالىق جۇيەگە قاتىستى ساۋاتتىلىق دەڭگەيىنىڭ وسۋىنەن پايدا بولعان. قاڭتاردان شىلدە ايىنا دەيىنگى ارالىقتا 574 ءوتىنىش تۇسسە, ونىڭ 467-ءسى – ارىز-شاعىم. تۇرعىندار نەگىزىنەن ەمحانالاردىڭ قىزمەتىنە نارازىلىق تانىتادى. بەلگىلى ءبىر مەديتسينالىق ۇيىمعا قاتىستى شاعىم تۇسسە, قور ساراپشىلارى جوسپاردان تىس مونيتورينگ جۇرگىزۋگە قۇقىلى. ولار اۋەلى اقپاراتتىق جۇيەنى زەردەلەپ, اۋرۋ تاريحىن قارايدى, قاجەت بولسا ەمحاناعا بارىپ, ەمدەلۋشىلەرمەن سويلەسەدى.
«ەگەر شاعىم شىن مانىندە نەگىزدى بولسا, ءبىز ناقتى شارالاردى قولعا الامىز. جارتى جىل ىشىندە مەديتسينالىق ۇيىمدارعا 18,7 ملن تەڭگەگە ايىپپۇل سالدىق. پاۆلودار قالاسىنداعى №1, 2, 4 ەمحانالار جانە ەكىباستۇزداعى «ديسكونت» ەمحاناسىندا زاڭ بۇزۋشىلىقتار ءجيى تىركەلەدى», دەيدى نۇرلان قاسىموۆ.
مەديتسينالىق قىزمەتكە كوڭىلى تولمايتىنداردىڭ باسىم بولىگى ستاتسيونارلار مەن ارنايى دارىگەرلەرگە بەرىلەتىن جولدامانى ۇزاق كۇتەتىندەرىن جانە كۇردەلى زەرتتەۋلەرگە كەزەكتىڭ ۇزىن-سونار قالىپتاسىپ قالاتىنىن ايتادى. كۇتە-كۇتە كۇدەرىن ۇزگەندەر كوبىنە اقىلى قىزمەتكە جۇگىنۋگە ءماجبۇر بولادى. بۇل ماسەلە, اسىرەسە رەۆموتولوگ, نەۆروپاتولوگ, نەيروحيرۋرگ دارىگەرلەرىنە قاتىستى. سەبەبى وڭىردە مۇنداي مامانداردىڭ تاپشىلىعى بايقالىپ وتىر.
پاۆلودار وبلىسى
