ءىس-شاراعا قىرعىز رەسپۋبليكاسىنىڭ مينيسترلەر كابينەتىنىڭ توراعاسى – پرەزيدەنتى اكىمشىلىگىنىڭ باسشىسى اقىلبەك جاپاروۆ, رەسەي فەدەراتسياسى ۇكىمەتىنىڭ توراعاسى ميحايل ميشۋستين, ارمەنيا رەسپۋبليكاسىنىڭ پرەمەر-ءمينيسترى نيكول پاشينيان, بەلارۋس رەسپۋبليكاسىنىڭ پرەمەر-ءمينيسترى رومان گولوۆچەنكو, سونداي-اق باقىلاۋشىلار مەن شاقىرىلعان ەلدەردىڭ جوعارعى وكىلدەرى – وزبەكستان رەسپۋبليكاسىنىڭ پرەمەر-ءمينيسترى ابدۋللا اريپوۆ جانە ازەربايجان رەسپۋبليكاسىنىڭ پرەمەر-ءمينيسترى الي يدايات وگلى اسادوۆ قاتىستى.
ءاليحان سمايىلوۆ ەاەو ەلدەرىنىڭ ۇكىمەتتەرى قابىلداعان شارالاردىڭ ناتيجەسىندە نەگىزگى ەكونوميكالىق كورسەتكىشتەر قالپىنا كەلىپ, ەكونوميكالىق تاۋەكەلدەر ءىشىنارا جويىلعانىن ايتتى.
«اتاپ ايتقاندا, ەكونوميكانىڭ ءوسۋىن تۇراقتاندىرۋ جانە قامتاماسىز ەتۋ جونىندەگى شارالار ەاەو ەلدەرى ەكونوميكالارى ءوسۋىنىڭ ورتا مەرزىمدى بولجامدارىن ارتتىرۋعا مۇمكىندىك بەردى. ءبىرىنشى جارتىجىلدىقتا ءوزارا ساۋدا كولەمى ۇلعايدى. قازاقستاننىڭ ەاەو ەلدەرىمەن تاۋار اينالىمى 4,8%-عا ءوسىپ, 12,6 ملرد دوللاردى قۇرادى», دەدى پرەمەر-مينيستر.
بۇل رەتتە ۇكىمەت باسشىسى ودان ءارى دامۋ ءۇشىن بىرقاتار ماڭىزدى ماسەلەلەردى شەشۋگە باسا نازار اۋدارۋ قاجەتتىگىن اتاپ ءوتتى.
ءاليحان سمايىلوۆتىڭ پىكىرىنە قاراعاندا, كەدەرگىسىز ورتا قۇرۋ – ەاەو ەلدەرىنىڭ ونى قۇرۋ تۋرالى شارتتا تىكەلەي جازىلعان ءوزارا قارىم-قاتىناسىنىڭ نەگىزى. بارلىق قاجەتتى وكىلەتتىكتەرگە يە كوميسسيا جەتەكشى ءرول اتقارۋعا ءتيىس.
«قازىرگى جاعدايدا مەملەكەتتەر بىرجاقتى تارتىپتە ەنگىزۋگە ءماجبۇر بولىپ وتىرعان شەكتەۋلەردىڭ سالدارىن جويۋ تەتىكتەرىن ايقىنداۋ ماڭىزدى», دەدى پرەمەر-مينيستر.
سونىمەن قاتار ۇكىمەت باسشىسى ءوزارا ساۋدادا شەكتەۋلەر ەنگىزىلگەن كەزدە باسقا مەملەكەتتەردىڭ بەلگىلى ءبىر دەڭگەيدە ەاەو تاۋارلارىمەن قامتاماسىز ەتىلۋى, سونداي-اق ءۇشىنشى ەلدەردەن جەتكىزىلىمدەردى جەڭىلدەتۋ ءۇشىن جاعدايلار جاسالۋعا ءتيىس ەكەنىن ايتتى.
پرەمەر-مينيستر قازىرگى ۋاقىتتا وداق ەلدەرى باعانىڭ, اسىرەسە ازىق-ت ۇلىك تاۋارلارى باعاسىنىڭ ايتارلىقتاي ءوسۋ پروبلەماسىمەن بەتپە-بەت كەلىپ وتىرعانىن اتاپ ءوتتى. ماسەلەن, 6 اي ىشىندە ەاەو-دا باعالار ورتا ەسەپپەن 12,9%-عا ارتقان.
«ۇلتتىق ۆاليۋتالار اراسىنداعى ايىرباس باعامدارىندا دا ەلەۋلى بۇرمالاۋشىلىقتار بار ەكەنىن كورىپ وتىرمىز, ولار امەريكالىق ۆاليۋتاعا قاتىستى كروسس-باعامدار ارقىلى ايقىندالادى. بۇل ءبىزدىڭ ەلدەردەگى ساۋدا مەن ينفلياتسيالىق پروتسەستەرگە ايتارلىقتاي اسەرىن تيگىزەدى», دەدى ءا.سمايىلوۆ.
وسىعان بايلانىستى پرەمەر-مينيستر ەاەو ەلدەرىنىڭ ورتالىق بانكتەرىنىڭ ءتيىستى كونسۋلتاتسيالارىن وتكىزۋدى جانە ۇكىمەتارالىق كەڭەستىڭ كەزەكتى وتىرىسىنا ۇسىنىستار ەنگىزۋدى ۇسىندى.
سونىمەن قاتار ۇكىمەت باسشىسى ەاەو ەلدەرىنىڭ ەكسپورتىن دامىتۋ ءۇشىن تاۋارلار ءترانزيتىنىڭ ەركىندىگىن قامتاماسىز ەتۋ قاجەتتىگىنە نازار اۋداردى. «شىعىس-باتىس» جانە «سولتۇستىك-وڭتۇستىك» باعىتتارىنداعى ەۋرازيالىق كولىك دالىزدەرىنىڭ ينفراقۇرىلىمىن جاڭعىرتۋ وسى باعىتتاعى ماڭىزدى پراكتيكالىق قادام بولۋى مۇمكىن.
«جوعارىدا اتالعان ماسەلەلەردى شەشۋ, سوڭعى كەزدە تۋىنداعان قيىندىقتاردى ەڭسەرۋگە كومەكتەسەدى دەپ ويلايمىز. كۇش-جىگەرىمىزدى بىرىكتىرە وتىرىپ, الدىمىزدا تۇرعان سىن-قاتەرلەرگە توتەپ بەرە الامىز جانە ەكونوميكامىزدىڭ تۇراقتى دامۋىن, سونداي-اق ازاماتتارىمىزدىڭ ءال-اۋقاتىن ارتتىرۋدى قامتاماسىز ەتەمىز دەپ سەنەمىن», دەپ تۇيىندەدى ءا.سمايىلوۆ.
وتىرىس قورىتىندىسى بويىنشا قاتىسۋشىلار بىرقاتار كوپجاقتى قۇجاتقا قول قويدى.
