قازاقتىڭ اتىن جاھانعا تانىتقان تانىمال شاحماتشى, الەمنىڭ بىرنەشە دۇركىن چەمپيونى, يۋنيسەف-ءتىڭ ىزگى نيەت ەلشىسى دينارا سادۋاقاسوۆانىڭ ايتۋىنشا, وسى سايىسقا قاتىسقان جاستار كەلەشەكتە ەل نامىسىن ابىرويمەن قورعايتىن اتاقتى گروسسمەيستەرلەر قاتارىنان تابىلۋى مۇمكىن. ويتكەنى ولار Atyrau Chess Festival سەكىلدى تۋرنيرلەردە ءجيى باق سىنايدى.
– شارشى تاقتاداعى تارتىستى ويىننىڭ جەڭىمپازى بولۋ وڭاي ەمەس. سەبەبى بۇل – ويلىلار ويىنى. شاحماتشى قاتەلەسپەۋى كەرەك. اتىراۋداعى تۋرنير شاحماتشىلاردىڭ شەبەرلىگىن شىڭدادى, – دەيدى دينارا سادۋاقاسوۆا.
وبلىس اكىمى سەرىك شاپكەنوۆتىڭ ءمالىم ەتۋىنشە, ەندى Atyrau Chess Festival حالىقارالىق فەستيۆالىن جىل سايىن وتكىزۋگە شەشىم قابىلداندى. ويتكەنى مۇنداي تۋرنير جاستاردى ويشىلدىققا, زيالىلىققا, سالاماتتى ءومىر سالتىن ۇستانۋعا ۇمتىلدىرادى.
حالىقارالىق فەستيۆال اياسىندا 2-رازريادتان تومەن ەمەس سپورتشىلار ءۇشىن Atyrau Open, 3-رازريادتان تومەن ەمەس, 2006 جىلى تۋعان جانە ودان كىشى سپورتشىلار قاتىسقان Atyrau Juniors, سونداي-اق 3-رازريادى بار سپورتشىلار اراسىندا بليتس-تۋرنير ءوتتى. ءۇش ءتۋرنيردىڭ قورىتىندىسىمەن 80-نەن استام قاتىسۋشى مەدال, ديپلوم نە قارجىلاي سىيلىقتىڭ يەگەرى اتاندى. جەڭىمپازدار مەن جۇلدەگەرلەردىڭ اراسىندا حالىقارالىق گروسسمەيستەرلەر, جاڭادان باستاعان جاس سپورتشىلار مەن ارداگەرلەر بار.
ويىنشىلاردىڭ قۇرامى جاعىنان Atyrau Open ءتۋرنيرى باستى نازاردا بولدى. ويتكەنى شارشى تاقتاداعى جەڭىس ءۇشىن تانىمال كاسىپقويلار – حالىقارالىق گروسسمەيستەرلەر, تانىمال شەبەرلەر مەن شاحماتشىلار تارتىستى ويىن وكىزدى.
Atyrau Chess Festival ءتۋرنيرىنىڭ قورىتىندىسىمەن ايەلدەر اراسىندا ەكاتەرينا بوريسوۆا ءبىرىنشى ورىندى يەلەندى. ال نازەركە نۇرعالي ەكىنشى, الۋا نۇرلانوۆا ءۇشىنشى ورىنعا يە بولدى. ەرلەر اراسىنان ءبىرىنشى ورىن العان تيمۋر گارەەۆ جەڭىس تۇعىرىنان كورىندى. ارسەني نەستەروۆكە ەكىنشى ورىن بۇيىردى. سەرگەي تيۆياكوۆ ءۇشىنشى ورىندى مىسە تۇتتى. Atyrau Open تۋرنيرىندە ارداگەرلەر اراسىندا ءازيدوللا حاميەۆ, ەسەي حۇسايىنوۆ پەن ايتقالي ءىزباساروۆ جەڭىمپاز اتاندى. بليتس-تۋرنيردە پاۆەل پانكراتوۆ, فاررۋح اموناتوۆ پەن سەرگەي تيۆياكوۆ جەڭىسكە جەتتى. Atyrau Juniors ءتۋرنيرىنىڭ قورىتىندىسىمەن 8, 10, 12 جانە 14 جاسقا دەيىنگى جاس ساناتتارى بويىنشا جۇلدەلى ورىندار بەرىلدى.
شارشى تاقتاداعى تارتىستا ەسە جىبەرمەيتىن شاحماتشىلار دوداسىندا ۇلكەندەر دە, جاستار دا, ءتىپتى 4 جاستاعى بالاقاي دا باق سىنادى. ماسەلەن, بوكەنباي اعاشانىڭ جاسى 81-دە بولسا, تاپپاتقان قابىشەۆا 64 جاستان اسقان. وبلىس اكىمى ەگدە جاستاعى ەكەۋىنە دە 250 مىڭ تەڭگەدەن قارجىلاي سىياقى تابىستادى. ەكى قاتىسۋشى – باتىرحان شەرۋەن مەن ءامىرالى ابزال قازاقستان-بريتان تەحنيكالىق ۋنيۆەرسيتەتىنىڭ ءبىلىم گرانت تۇرىندەگى ارنايى سىيلىقتى يەلەندى. فەستيۆالدىڭ ەڭ جاس قاتىسۋشىسى 4 جاستاعى ابدۋل-مالىك قايراتقا اتىراۋ قالاسىنىڭ اكىمى 200 000 تەڭگەنىڭ سەرتيفيكاتىن تابىس ەتتى.
– ۇلىم ابدۋل-مالىك جارتى جىلدان بەرى اپتاسىنا ەكى رەت شاحمات سەكتسياسىنا بارىپ ءجۇر. بۇعان قوسا روبوت تەحنيكاسى ۇيىرمەسى مەن باسسەينگە, حيپ-حوپ پەن اعىلشىن ءتىلى كۋرسىنا بارادى. كۇن سايىن كەشكى مەزگىلدە اكەسىمەن شاحمات ويناۋدى ادەتكە اينالدىردى. شاحمات تۋرنيرلەرىنە قاتىسىپ, ءوز تۇستاستارى عانا ەمەس, ەرەسەك جاستاعى قارسىلاستارىن دا ۇتىپ ءجۇر. حالىقارالىق فەستيۆالدە ءۇش پارتيا جەڭىسكە جەتتى, – دەيدى ءتورت جاسار شاحماتشىنىڭ اناسى ديانا ەرجانوۆا.
ءۇش تۋرنير كەزىندە ويىن سەانستارىمەن ءبىر مەزگىلدە اشىق شەبەرلىك ساباقتارى ءوتتى. فەستيۆال باعدارلاماسىنا سايكەس حالىقارالىق اربيترلەردىڭ ءبىرىنشى سەمينارىندا قاتىسۋشىلار ەمتيحان تاپسىردى. ەمتيحاننان جوعارى ۇپاي العاندارعا FIDE تورەشىسى اتاعىن بەرۋ كوزدەلدى. سەميناردىڭ 6 قاتىسۋشىسى قاجەتتى ۇپاي سانىن جينادى.
اتىراۋ وبلىسى
