سانكت-پەتەربۋرگ قالاسىندا قازاقتىڭ ەتنو-اۋىلى اشىلادى

استانا. 12 مامىر. 17 مامىردا سانكت-پەتەربۋرگ قالاسىندا استانانىڭ مادەني كۇندەرى باستالادى. بۇل تۋرالى astana.kz سايتى حابارلادى. استانانىڭ سانكت-پەتەربۋرگتەگى كۇندەرى اياسىندا ۇلتىمىزدىڭ رۋحاني قۇندىلىقتارىن ناسيحاتتاۋ باعىتىندا ارنايى «قازاق اۋىلى» ەكسپوزيتسياسى قۇرىلادى دەپ كۇتىلۋدە. بۇل ەتنو-اۋىلمەن تانىسۋعا كەلگەندەر قازاق قولونەرشىلەرىنىڭ شەبەرلىك ساعاتتارىنا قاتىسۋعا مۇمكىندىكتەرى بولادى. سونداي-اق, «قازاق اۋىلىنا» ات باسىن بۇرعاندار ۇلتىمىزعا ءتان قولونەر بۇيىمدارى: شي, باسقۇر, سىرماق, كەستە, كىلەم, قامشى جانە تاعى باسقا دا دۇنيەلەرمەن تانىسادى. بۇدان باسقا, ادەت-عۇرىپ, سالت-داستۇرلەرىمىز بەن ىرىم-سەنىمدەرىمىز دە كەلۋشىلەردىڭ نازارىنا ۇسىنىلماق. ارينە, مۇنداي مادەني-تانىمدىق شارالار ۇلتتىق ءان-كۇيسىز, ءبيسىز ءوتۋى مۇمكىن ەمەس. سوندىقتان, پيتەرلىكتەر الدىندا Astana ballet بي ۇجىمى, «سوليستەر اكادەمياسى» مەملەكەتتىك كامەرالىق وركەسترى ونەر كورسەتپەك. بۇل شارا اتالعان ەكى قالا اراسىنداعى ىسكەرلىك بايلانىستاردى نىعايتۋ ماقساتىندا قولعا الىنىپ وتىر. جولدىباي بازار. دەرەككوز: astana.kz. فوتو: arnapress.kz.