وڭتۇستىك كاليفورنيا ۋنيۆەرسيتەتىنەن مەملەكەت باسشىسى اتىنا حات كەلدى

استانا. 12 مامىر. وڭتۇستىك كاليفورنيا ۋنيۆەرسيتەتىنىڭ مەملەكەتتىك باسقارۋ قۇرمەتتى پروفەسسورى چەستەر نيۋلاند پرەزيدەنت اتىنا جولداعان حاتىندا «قازاقستان-2050» ستراتەگياسى ەلدىڭ ودان ءارى ورنىقتى دامۋىن قامتاماسىز ەتەدى دەپ جازدى. بۇل تۋرالى akorda.kz حابارلادى. چەستەر نيۋلاند ءوز حاتىندا ەلىمىزدىڭ ورنىقتى دامۋىنا جانە الەۋمەتتىك, ەكونوميكالىق, ساياسي تابىستارىنا توقتالا وتىرىپ, تاۋەلسىزدىكتىڭ العاشقى جىلدارىندا جاسالعان باتىل قادامداردى اتاپ وتكەن. پروفەسسور: «زەينەتكەرلەر مەن وزگە دە كوپشىلىك كومەككە اسا مۇقتاج بولعان قيىن كەزەڭدەگى ءسىز بەن ءبىزدىڭ از ۋاقىت قانا كەزدەسكەنىمىز ەسىمدە. ءسىز حالىقتىڭ اتىنان ولاردىڭ كۇنكورىسىنە عانا ەمەس, قازاقستاننىڭ جارقىن بولاشاعىنا كەپىلدىك بەرە وتىرىپ, سەنىمدى ارەكەت ەتتىڭىز. استانانىڭ قالىپتاسۋىنىڭ العاشقى كەزدەرىندەگى كوپتەگەن قيىندىقتار دا ويعا ورالادى, قازىر بۇل سول كەزدە كوپتەگەن سىن-قاتەرلەر قارساڭىندا تۇرعان ەلدىڭ ەڭ ءبىر كورەگەن شەشىمى رەتىندە مويىندالىپ وتىر», – دەپ جازىپتى. بۇدان بولەك, ول «قازاقستان-2050» ستراتەگياسى ەلدىڭ تۇراقتى دامۋىن قامتاماسىز ەتەتىنىن ايتا كەلە, بۇگىندە كونستيتۋتسيالىق ينستيتۋتتارىمىزدىڭ نىعايا تۇسكەنىن ءسوز ەتكەن. سونداي-اق, چ.نيۋلاند «ا» باسقارۋشىلار كورپۋسىنىڭ قۇرىلۋى, مەملەكەتتىك قىزمەتتىڭ كەڭ اۋقىمدا كاسىبيلەندىرىلۋى جانە ساياسي لاۋازىمعا تاعايىندالاتىندار سانىنىڭ قىسقارتىلۋى مەملەكەت باسشىسىنىڭ تىكەلەي ىقپال ەتۋىمەن جۇزەگە اسىرىلعان جەتىستىكتەر ەكەنىنە نازار اۋدارعان. پروفەسسور چەستەر نيۋلاند حاتىنىڭ سوڭىندا ەلىمىزدىڭ ارى قاراي وركەندەي بەرەتىنىنە سەنىم بىلدىرە وتىرىپ, قازاقستاننىڭ الەمدىك سىن-قاتەرلەر جاعدايىندا اتقارىپ وتىرعان ايرىقشا رولىنە ريزاشىلىعىن جەتكىزگەن. جولدىباي بازار. دەرەككوز: akorda.kz. فوتو: Dmk.kz.