25 تامىزدا ريگادا ورىس ءتىلدى قوعامداستىقتىڭ نارازىلىعىنا قاراماستان, كەڭەس ارمياسىنىڭ جاۋىنگەرلەرىنە ارنالعان جەڭىس ساياباعىنداعى ەسكەرتكىشتى بولشەكتەۋ اياقتالدى. 79 مەترلىك مەموريالدىق كەشەننىڭ سوڭعى ەلەمەنتى بۇزىلدى. اتالعان ەسكەرتكىشتى بولشەكتەۋ ءۇش كۇنگە سوزىلعان. 23 تامىزدا ءۇش جاۋىنگەردىڭ مۇسىندەرى الىنىپ تاستالىنىپ, 24 تامىزدا ايەل فيگۋراسى بولشەكتەلگەن.
جەڭىس ساياباعىنداعى بۇل مەموريالدىق كەشەن لاتۆيادا تۇراتىن كرەمل جاقتاستارىنىڭ جينالاتىن ورنىنا اينالعان. لاتۆيا حالقىنىڭ ۇشتەن بىرىنە جۋىعىن قۇرايتىن ورىس حالقى بىرنەشە كۇننەن بەرى ەسكەرتكىشتى بۇزۋعا قارسىلىق تانىتقان. رەسەي ۇكىمەتى دە بۇل ارەكەتكە قاتاڭ نارازىلىق ءبىلدىردى.
مەموريالدىق كەشەن 1985 جىلى كسرو-نىڭ فاشيستىك گەرمانيانى جەڭگەنىنە 40 جىل تولۋىنا وراي تۇرعىزىلعان. لاتۆيا بيلىگى ونى «باسقىنشىلىققا ارنالعان ەسكەرتكىش» دەپ اتادى.
لاتۆيا پرەزيدەنتى ەگيلس لەۆيتس مەموريالدىق كەشەننىڭ بولشەكتەنۋىن قۇپتادى.
«بۇل ەسكەرتكىش دەپورتاتسيا مەن رەپرەسسيانى ەسكە سالاتىن ءتۇرلى تاعدىرلارمەن بايلانىستى كەشەن. بىزگە مۇنداي ەسكەرتكىشتىڭ قاجەتى جوق», دەدى ول.
ايتا كەتەيىك, مامىر ايىندا لاتۆيا بيلىگى رەسەيمەن مەموريالدىق قۇرىلىمداردى ساقتاۋ تۋرالى كەلىسىمدى بۇزدى.
