قانداس مارتەبەسىن الۋعا نەمەسە ۇزارتۋعا, سونداي-اق قانداستار مەن قونىس اۋدارۋشىلاردى قابىلداۋدىڭ وڭىرلىك كۆوتاسىنا ەنگىزۋگە ءوتىنىشتى ەتنوستىق قازاقتار جەرگىلىكتى اتقارۋشى ورگاندارعا, «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق-عا جانە قازاقستان رەسپۋبليكاسىنىڭ شەتەلدەردەگى مەكەمەلەرىنە بەرە الادى.
قانداستار مەن قونىس اۋدارۋشىلاردى قابىلداۋدىڭ وڭىرلىك كۆوتاسى ەل ۇكىمەتى قانداستاردى قونىستاندىرۋ ءۇشىن ايقىنداعان وڭىرلەرگە – اقمولا, اتىراۋ, شىعىس قازاقستان, باتىس قازاقستان, قوستاناي, پاۆلودار جانە سولتۇستىك قازاقستان وبلىستارىنا بولىنەدى.
بۇل رەتتە وڭىرلىك كۆوتاعا ەنگىزىلگەن قانداستارعا كوشۋگە (وتباسىنىڭ ءاربىر مۇشەسىنە 70 اەك-تەن بىرجولعى تولەم) جانە 12 اي ىشىندە جالداۋ شىعىندارىن جابۋعا جانە كوممۋنالدىق قىزمەتتەردى تولەۋگە (وتباسىنا 15-تەن 30 اەك-كە دەيىنگى مولشەردە) سۋبسيديا تۇرىندە مەملەكەتتىك قولداۋ شارالارى قولجەتىمدى.
سونىمەن قاتار قانداس مارتەبەسىن العان ەتنوستىق قازاققا كەلەسى قىزمەتتەر قولجەتىمدى:
– قازاقستان رەسپۋبليكاسى اۋماعىنا كىرۋ كەزىندە كولىك قۇرالدارىن قوسا العاندا, جەكە پايدالانۋعا ارنالعان م ۇلىككە كەدەندىك تولەمدەردى تولەۋدەن بوساتۋ;
– قانداستاردى بەيىمدەۋ جانە ىقپالداستىرۋ ورتالىقتارىندا تەگىن بەيىمدەۋ جانە ىقپالداستىرۋ قىزمەتتەرىن قامتاماسىز ەتۋ;
– تەحنيكالىق جانە كاسىپتىك, ورتا بىلىمنەن كەيىنگى جانە جوعارى ءبىلىم بەرەتىن وقۋ ۇيىمدارىنا وقۋعا تۇسۋگە كۆوتا شەڭبەرىندە ءبىلىم الۋ (قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار ءۇشىن كۆوتا 4% مولشەرىندە بەلگىلەنگەن);
– قازاقستان ازاماتتارىمەن تەڭ جاعدايدا جۇمىسپەن قامتۋعا جاردەمدەسۋ شارالارىمەن قامتاماسىز ەتۋ;
– مەملەكەتتىك تۇرعىن ءۇي قورىنان تۇرعىن ءۇي الۋعا ءوتىنىش بەرۋ مۇمكىندىگى.
بۇدان باسقا ەلدە تۇراقتى تۇراتىن قانداستار جەڭىلدەتىلگەن تارتىپپەن (تىركەۋ تارتىبىمەن) قازاقستان رەسپۋبليكاسىنىڭ ازاماتتىعىن الا الادى.
ەستەرىڭىزگە سالا كەتەيىك, 2022 جىلعى 1 تامىزداعى جاعداي بويىنشا
9 077 ەتنوستىق قازاق تاريحي وتانىنا ورالىپ, قانداس مارتەبەسىن الدى. 1991 جىلدان باستاپ رەسپۋبليكاعا بارلىعى 1 ملن 96,9 مىڭ ەتنوستىق قازاق ورالدى.
وسى جىلدىڭ باسىنان باستاپ قازاقستانعا كەلگەن قانداستاردىڭ جارتىسىنان استامى (69,9%) وزبەكستاننان, 10,3% – قحر-دان, 7,1% – تۇرىكمەنستاننان, 4,0% – موڭعوليادان جانە 8,7% باسقا ەلدەردەن كەلگەن.
