1960 جىلى قازاق جازۋشىسى مۇحتار اۋەزوۆ كسرو-داعى بىرنەشە ارىپتەسىمەن بىرگە اقش مەملەكەتتىك دەپارتامەنتىنىڭ شاقىرۋىمەن امەريكاعا ساپارلاعان. جازۋشى قۇراما شتاتتاردا ءبىر اي بويى ارالاپ, سول ساپارى تۋرالى «امەريكا اسەرلەرى» اتتى ساپار ەستەلىگىن جازعان, بىراق جازۋشى تۇتقيىل قايتىس بولىپ, كىتاپ اياقتالماي قالادى.
الماتىداعى اقش باس كونسۋلى كەرولاين سەۆيدج: «60 جىل بۇرىن اقش پەن كەڭەس وداعى ەكى ەل اراسىندا مادەني بايلانىس ورناسا, ءوزارا قارىم-قاتىناس تا جاقسارا تۇسەر دەگەن كەلىسىمگە كەلەدى. ءدال سول جىلىمىق كەزىندە مادەني تاجىريبە الماسۋ ءۇشىن ۇيىمداستىرعان العاشقى ساپارعا مۇحتار اۋەزوۆ توپ جارىپ, العاشقىلاردىڭ ءبىرى بولىپ بارعان ەكەن. ەكى ەلىمىز سەرىكتەس بولۋعا العاش قادامىن باسقان كەزدە الەمنىڭ ۇلى سۋايرىعىندا تۇر ەدى. بىراق اۋەزوۆ ءبىزدى جاقىنداتاتىن ورتاق قۇندىلىقتاردى تابا ءبىلدى. جاڭا تۇسكەن بۇرشىكتەي شاعىن عانا مادەني تاجىريبەدەن باستالعان بۇل ساپار وسى كۇنى ەكى ەل اراسىندا وتىز جىلدان استام تاريحى بار مىزعىمايتىن ىنتىماقتاستىققا اينالىپ وتىر. وسى تاريحتىڭ باستاۋىن مۇحتار اۋەزوۆتىڭ ءبىرىنشى بولىپ جازىپ كەتكەنى دە بەكەر ەمەس بولار», دەپ اتاپ ءوتتى.
جازۋشىنىڭ «امەريكا اسەرلەرىن» اعىلشىن تىلىنە اۋدارعان دەننيس كيننىڭ ەڭبەگى كوپ. ونىڭ ايتۋىنشا, ول اۋەزوۆتىڭ امەريكاعا ساپارى تۋرالى امەريكالىق گازەت بەتتەرىندەگى ماقالالارعا كوپتەن بەرى نازار اۋدارىپ كەلگەن. «ساپارىنان ورالعاننان كەيىن اۋەزوۆ كوپشىلىككە بەيمالىم «امەريكا اسەرلەرى» دەگەن جولجازبالارىن جازادى. اۋەزوۆتىڭ بۇل وچەركى ورىس تىلىنە دە, الەمنىڭ باسقا تىلدەرىنە دە اۋدارىلماي قالادى. مەن اۋەزوۆ ورتالىعىنىڭ باسشىسى ديار اسقار ۇلى قوناەۆپەن كەزدەسىپ, بۇل تۋىندىنىڭ تاريحي ماڭىزى تۋرالى سويلەسىپ, اعىلشىن تىلىنە اۋدارساق تاماشا بولار ەدى دەپ كەلىستىك. باعىمىزعا وراي, اقش كونسۋلدىعى بۇل يدەيامىزدى قولداپ, اۋەزوۆ كىتابىنىڭ ارنايى شىعارىلىمىن بۇگىن كوپشىلىك نازارىنا ۇسىنىپ وتىرمىز», دەيدى اۋدارماشى د.كين.
كىتاپتىڭ تۇساۋكەسەرىنە اۋەزوۆ مۇراجاي-ءۇيى مەن اۋەزوۆ ورتالىعىن باسقاراتىن ديار اسقار ۇلى قوناەۆ تا قاتىستى. ول مۇراجايدا مۇحتار اۋەزوۆتىڭ ۇلى كانوندا تۇسكەن سۋرەتى ءالى دە ءىلۋلى تۇرعانىن ءسوز ەتتى. «اۋەزوۆ ءۇشىن امەريكاعا ساپارىنىڭ ورنى بولەك بولاتىن. وكىنىشكە قاراي, جازۋشى سول ساپارىنان العان اسەرلەرىن اياقتاپ ۇلگەرمەي, ومىردەن ءوتتى», دەدى د.اسقار ۇلى.
ايتالىق, «امەريكا اسەرلەرىنىڭ» قازاق جانە اعىلشىن تىلىندەگى العاشقى تيراجى ازىرگە ساتىلىمعا تۇسكەن جوق. بىراق جازۋشىنىڭ 125 جىلدىق مەرەيتويىنا وراي Kitap.kz ءموبيلدى قوسىمشاسىنان قىركۇيەك ايىنىڭ اياعىنا دەيىن تەگىن وقۋعا بولادى. سونداي-اق اۋەزوۆ مۇراجاي-ءۇيىنىڭ كەلۋشىلەرىنە تەگىن تاراتىلادى دەپ جوسپارلانىپ وتىر.
