حوككەي. قازاقستان قۇراماسى گەرمانياعا بۋلليتتەن ەسە جىبەردى

استانا. 10 مامىر. بەلارۋس استاناسى – مينسك قالاسىندا كەشە باستالعان حوككەيدەن الەم چەمپيوناتىنىڭ ءبىرىنشى تۋرى وينالىپ ءبىتتى. ونىڭ بارىسى تاعى دا سەنساتسيا اكەلدى. بۇل تۋرالى چەمپيونات.رۋ حابارلادى. وسى كۇنى قازاقستان قۇراماسى دا ءوزىنىڭ چەمپيوناتتاعى ءبىرىنشى ويىنىن وتكىزدى. ول گەرمانيامەن كەزدەسۋدە تەك بۋلليتتەن عانا ەسە جىبەردى – 1:2. ماتچتىڭ نەگىزگى بولىگى 1:1 ەسەبىمەن اياقتالدى. سودان كەيىنگى وۆەر-تايمدا وسى ەسەپ وزگەرگەن جوق. ال كەزدەسۋدە ەسەپتى قازاقستاندىق اندرەي گاۆريلين اشتى. نەمىستەر سول ءبىرىنشى كەزەڭنىڭ سوڭىندا ەسەپتى تەڭەستىردى. بۇدان ءارى كوماندالارعا شايبا سالۋدىڭ رەتى كەلمەدى. ال كەشە تۇندە چەحيا سلوۆاكيانى وۆەر-تايمدا تىزە بۇكتىرسە, اقش بەلارۋستى 6:1 ەتىپ تالقانداپ شىقتى. بۇگىن وينالعان قالعان ماتچتاردىڭ اراسىندا لاتۆيانىڭ فيندەردى 3:2 ەتىپ نەگىزگى ۋاقىتتا ۇتىپ كەتكەنى شىنىندا سەنساتسيا بولدى. قالعان ماتچتار مىناداي ناتيجەلەر اكەلدى: يتاليا – نورۆەگيا 0:3, شۆەتسيا – دانيا 3:0. ەندى بۇگىن تۇندە كانادا – سلوۆاكيا, اقش – شۆەيتساريا اراسىندا ويىندارمەن ەكىنشى تۋر باستالادى. ەرتەڭ, 11 مامىر كۇنى فرانتسيا – يتاليا, نورۆەگيا – دانيا, شۆەتسيا – چەحيا, گەرمانيا – لاتۆيا, فينليانديا – رەسەي كوماندالارى كۇش سىناسادى. ال قازاقستان حوككەيشىلەرى الاڭ يەلەرى – بەلورۋستارمەن دوپتاياق تۇيىستىرەدى. دامير قوجامقۇل. دەرەككوز: چەمپيونات.رۋ. فوتو: چەمپيونات.رۋ.