ەرلىك لايىقتى باعالانعان كۇن

جامبىل توپىراعىنان ۇلى وتان سوعىسىنا 120 مىڭعا جۋىق جاۋىنگەر اتتانىپ, تاعدىر سونىڭ 32 مىڭىنا تۋعان جەرگە قايتا ورالۋدى جازباپتى. «ەر ەسىمى – ەل ەسىندە» دەگەن, كەۋدەلەرىن وققا توسىپ, وتانى ءۇشىن جانىن پيدا ەتكەن بۇل جاۋىنگەرلەردىڭ ەسىمى, ەرلىگى ءاردايىم ەلدىڭ ەسىندە قالارى ءسوزسىز. تاراز تورىندە وتكەن جەڭىس مەيرامى وت پەن وقتىڭ ورتاسىندا ارپالىسقان باتىرلارىمىزدىڭ ەرلىگىن ۇلىقتاپ, تاعزىم ەتۋدەن باس­تالدى. ورتالىق «دوستىق» الاڭىندا وتكەن مەرەكەلىك جيىندا وبلىس اكىمى ك.كوكىرەكباەۆ ارداگەرلەردى جەڭىس مەرەكەسىمەن قۇتتىقتاپ, جاس­تار جاعى كەلەشەك ۇرپاقتىڭ بەيبىت ءومىرى ءۇشىن قولىنا قارۋ ۇستاعان, بۇگىندە كوزى ءتىرى مايدانگەرلەرگە قۇرمەت كورسەتتى. سوعىس جىلدارىنان ءتۇرلى تەاترلاندىرىلعان كورىنىستەر قويىلدى. بۇگىنگى تاۋەلسىز ەلىمىزدىڭ اسكەر ساپىنداعى ۇزدىك ساربازدار كاسىبي شەبەرلىكتەرىن كورسەتىپ, سوڭى كونتسەرتتىك باعدارلاماعا ۇلاستى. بيىل 90 جاسقا تولىپ وتىرعان قارت مايدانگەر ءجۇمانالى پازىلباەۆ اسكەرگە 1942 جىلى شاقىرىلىپ, ۆولحوۆ, لەنينگراد, سمولەنسك باعىتىندا قان مايدانعا قاتىسىپتى. كەيىننەن مينسك, كيشينەۆ قالا­لارىندا, ۋكراينا, ەستونيا, لاتۆيا, ليتۆا ەلدەرىن ازات ەتۋ ءۇشىن ايانباي شايقاسقان. 1948 جىلى ەلگە ورالعان ول ىشكى ىستەر ورگاندارىندا باسشىلىق قىزمەتتەر اتقاردى. ءتىپتى, زەينەتكە شىققاننان كەيىن دە قول قۋسىرىپ قاراپ وتىرماي, قالاداعى قارتتار ۇيىندە قىزمەت ەتتى. جەڭىس مەيرامى قارساڭىندا وبلىس اكىمى ك.كوكىرەكباەۆ ەل باسىنا كۇن تۋعاندا قولىنا قارۋ ۇستاپ قورعاپ, بەيبىت كۇندە ەسەلى ەڭبەگىمەن ۇلەس قوسقان قارت ارداگەردى ارنايى بارىپ قۇتتىقتاپ, سىي-سياپات جاسادى. سونداي-اق, بۇل كۇنى وبلىس باس­شى­لىعى تاعى دا بىرقاتار ارداگەرلەردىڭ ۇيىندە بولدى. بۇل كۇنى وبلىس ورتالىعىندا كونتسەرتتىك باعدارلاما, سولدات بوتقاسىن تاراتۋ, ەسكەرتكىشتەرگە گۇل شوقتارىن قويۋ ءراسىمى ءوتىپ, اسكەري تەحنيكا كورمەسى ۇيىمداستىرىلدى. ورالحان ءداۋىت, «ەگەمەن قازاقستان». جامبىل وبلىسى.