جاقسىدان قالعان ءسوز

قازاق عىلىمىنىڭ ايتۋلى وكىلى, ءال-فارابي بابامىزدى اتاجۇرتىنا ورالتقان اقجان ءال-ءماشانيدىڭ عىلىمي مۇراسىن قامتىعان جيناق تاياۋدا جارىق كوردى. وعان ۇيىتقى بولعان – كورنەكتى وقىمىستىنىڭ كەلىنى زادا دۇيسەنباەۆا. كىتاپقا عۇلامانىڭ قازاق عىلىمىنا قوسقان ۇلەسى, ءال-فارابي مەن ابايدى ۇشتاستىرا زەرت­تە­گەن زەر­دەلى ەڭبەكتەرى, قازاق ين­تەل­ليگەنتسياسىن قالىپ­تاس­تىرۋ باعىتىنداعى ىزدەنىستەرى, ۇلتتىق گەولوگيا, سونىڭ ءىشىن­دە بۇرىن اتالماي كەلگەن مار­كشەيدەرلىك ءىس, وزگە دە تا­قىرىپتار بويىنشا زەرت­تەۋشىلەردىڭ دۇنيەلەرى توپ­تاستىرىلىپ وتىر ەكەن. شىنىندا, ءال-ماشاني قازاق جۇرتىنان شىققان ايتۋلى تۇلعا ەدى. ول قانىش ساتباەۆ ىرگەتاسىن قۇيىپ, كەرەگەسىن قالاپ, شاڭىراعىن كوتەرگەن ۇلتتىق عىلىم اكادەمياسىن قۇرعانداردىڭ قاتارىندا بولدى. تۇڭعىش رەت ءال-فارابي تۋرالى وي ايتىپ, وتانىنا ورالتتى. قازاق ءتىلىنىڭ جاناشىرى بولىپ, قازاق سىنىپتارىن اشۋعا جاسى كەلىپ قالعان كەزدىڭ وزىندە بەلسەنە اتسالىسىپ, «ءتىلىڭ بولماسا ءال-فارابي, اباي كىمگە كەرەك. قازاق جۇرتى ءسوز قادىرىن بىلگەن, سوزگە توقتاعان, ەكى سويلەمەگەن, ايتقانىندا تۇرعان, مەڭزەگەنىن ورىن­داتقان», دەپ بابالار سال­تىن ساناڭا سۋداي سەپكەن. ەندى, مىنە, سول الىپ قازاق­تىڭ ءومىر جولىن, ونەگەلى جو­لىن قامتىعان ەڭبەكتىڭ تۇساۋ­كەسەر راسىمىندە بەلگىلى عالىم­دار: مىرجاقىپتانۋ­شى, تاريح عىلىمدارىنىڭ دوكتورى, ەلورداداعى ۇلتتىق مۇراعاتىنىڭ باس ديرەكتورى مارات ابسەمەتوۆ, پروفەسسور ديقان قامزابەك ۇلى, قوعام قايراتكەرى جەكەن قاليەۆ, وزگە دە زيالى قاۋىم وكىلدەرى ءسوز الىپ, ءال-ماشاني تۋرالى ەستەلىكتەر ايتتى. وي وربىتكەندەر ەندىگى جەردە ءال-ماشاني اتىن وتانىمىزدىڭ وڭىرلەرىندە جاڭعىرتىپ كوشەگە, مەكتەپكە بەرسە دەگەن تىلەكتەرىن دە العا تارتتى. شىنىندا, گەولوگيا-مينەرولوگيا عى­­­­لىمى مەن ۇلت رۋحانياتىن تارازىنىڭ باسىنداي تەڭ ۇستاپ, حالىقتىق ۇلگىنى, تىرەك بولار ءتىلدى كەيىنگى جاسقا سىرىن وڭدىرماي, سىنىن كەتىرمەي جەتكىزسەم دەپ ءومىر بويى ەڭبەك ەتكەن عالىمعا قانداي قۇرمەت كورسەتسەك تە جاراسارى ءسوزسىز. سۇلەيمەن مامەت, «ەگەمەن قازاقستان».