«وسى جىلدىڭ 1 تامىزىندا سىبايلاس جەمقورلىققا قارسى قىزمەتتىڭ ۇسىنىسى بويىنشا قر مەديتسينالىق جانە فارماتسەۆتيكالىق باقىلاۋ كوميتەتى توراعاسىنىڭ بۇيرىعىمەن ءوز لاۋازىمدىق مىندەتتەرىن تيىسىنشە ورىنداماعانى ءۇشىن كوميتەتتىڭ شىمكەنت قالاسى بويىنشا دەپارتامەنتى باسشىسىنىڭ ورىنباسارى دۋلات تۇرمانوۆ قىزمەتىنەن بوساتىلدى. ال 3 تامىزدا كوميتەتتىڭ شىمكەنت قالاسى بويىنشا دەپارتامەنتىنىڭ باسشىسى سەيىتجامال پاكەەۆ ۆەدومستۆولىق باقىلاۋدىڭ جوقتىعى ءۇشىن «سوگىس» تۇرىندە تارتىپتىك جاۋاپكەرشىلىككە تارتىلدى», دەلىنگەن ANTIKOR حابارلاماسىندا.
ايتا كەتسەك, وسى جىلدىڭ شىلدەسىندە سوت ۇكىمىمەن باسشىنىڭ ورىنباسارى تۇرمانوۆ بىرقاتار تۇلعادان كلينيكالىق پراكتيكاعا جىبەرۋگە مامان سەرتيفيكاتىن بەرگەنى ءۇشىن جالپى سوماسى 60 مىڭ تەڭگە كولەمىندە پارا العانى ءۇشىن كىنالى دەپ تانىلعان. وعان 20 ميلليون تەڭگە كولەمىندە ايىپپۇل سالىندى.
