ساپا جايلى ءسوز قوزعاعاندا, ەڭ الدىمەن, قالاداعى ەمحانا مەن اۋرۋحانالاردىڭ سوڭعى ۇلگىدەگى زاماناۋي مەديتسينالىق قۇرالدارمەن جابدىقتالىپ جاتقانىن ايتا كەتۋ كەرەك. بۇدان وزگە ءتۇرلى ءىس-شارالار ارقىلى دا حالىقتىڭ دەنساۋلىعىن كۇشەيتۋ باعىتىندا جۇمىستار قولعا الىنىپ كەلەدى.
ماسەلەن, قالالىق №1 كلينيكالىق اۋرۋحاناسىنىڭ باس دارىگەرى ابىلاي دونبايدىڭ ايتۋىنشا, اتالعان مەديتسينالىق ۇيىم «ىزگىلىكتە جارىسايىق» اتتى قورمەن ءوزارا مەموراندۋمعا قول قويعان. سوعان سايكەس قور تىزىمىندەگى 100 اناعا جانە ولاردىڭ بالالارىنا تەگىن مەديتسينالىق كومەكتەر كورسەتىلە باستادى. كلينيكالىق اۋرۋحانا انالاردى اقىسىز مەديتسينالىق تەكسەرۋدەن وتكىزسە, مەكتەپكە ەندى باراتىن بالالارىن تەگىن سۇندەتكە وتىرعىزىپ جاتىر, ياعني مەديتسينا تىلىمەن ايتقاندا, تسيركۋمتسەزيا جاساۋدا.
كلينيكالىق اۋرۋحانانىڭ تاعى ءبىر جاڭالىعى, جالپى, بۇگىنگى تاڭدا ادام ەمدەۋ ورنىنا كەلسە, ونداعى جاتقان ناۋقاس تۋرالى نەمەسە باسقا دا كەرەكتى مالىمەت الۋدا قينالاتىنى راس. وسى ولقىلىقتىڭ ورنىن تولتىرۋ ماقساتىندا كلينيكادا اقپارات الۋ ورتالىعى اشىلدى. ونىڭ باستى ەرەكشەلىگى جوعارىدا ايتىلعانداي, اۋرۋحاناعا كەلگەن ادامعا وزىنە كەرەكتى ماعلۇماتتى تەز الۋعا, ەمدەلىپ جاتقان جاقىنىنىڭ ناقتى قاي بولىمشەدە, پالاتادا جاتقانىن بىلۋگە كومەكتەسەدى. اقپاراتتىق ورتالىقتا, ماسەلەن, بىلىكتى دارىگەرلەر كەڭەس بەرە الادى نەمەسە ورتا مەديتسينا قىزمەتكەرلەرى سول جەرگە بولىمشە مەڭگەرۋشىلەرىن شاقىرىپ, سولاردىڭ ءوز اۋزىنان ەمدەلۋشىنىڭ احۋالى تۋرالى ناقتى جاعدايدى ەستىپ, بىلە الادى.
كلينيكا باس دارىگەرىنىڭ ايتۋىنشا, تىلىكسىز وتا جاسايتىن لاپروسكوپيالىق 5 اپپارات, تراۆماتولوگيادا قولدانىلاتىن ارتروسكوپيالىق جابدىق جانە زاماناۋي ۋدز اپپاراتتارى ساتىپ الىنسا, سونىمەن قوسا ميعا, جۇرەككە وتا جاسايتىن انگيوگرافيالىق كابينەتتىڭ اشىلۋى كۇتىلىپ وتىر. ونىڭ اشىلۋ سالتاناتىنا رەسپۋبليكانىڭ وسى سالاداعى بىلىكتى دارىگەرى سەرىك اقشولاقوۆ قاتىسادى دەپ جوسپارلانۋدا. بۇگىندە ەلورداداعى نەيروحيرۋرگيالىق ورتالىقتان كەلگەن 2 مامان قالالىق كلينيكادا جۇمىس ىستەيدى. ولار ج ۇلىن ومىرتقاسىنا, ميعا بايلانىستى كۇردەلى وپەراتسيا جاسايدى. شىمكەنتتە №1 كلينيكالىق اۋرۋحاناسىنىڭ بازاسىندا تراۆماتولوگيا, ورتوپەديا سالاسى جەدەل دامىپ كەلەدى. بۇل دا ەلوردانىڭ بىلىكتى ماماندارىنىڭ ارقاسىندا مۇمكىن بولىپ وتىر. وسى سەكىلدى مۇرىن, تاماقتى ەمدەيتىن ماماندى دا رەسپۋبليكانىڭ باس قالاسىنان شاقىرتىپ, ارنايى لور بولىمشەسىن اشقان. اتالعان كلينيكادا كۇنى كەشە 187-ءشى بۇيرەك ترانسپلانتاتسياسى جاسالدى. مۇنىمەن قوسا وتىز شاقتى باۋىر الماستىرىلدى. اپتاسىنا ءبىر رەت بۇيرەك, ايىنا ءدال سولاي باۋىر مۇشەسى اۋىستىرىلادى. سوندىقتان باس دارىگەردىڭ ايتۋىنشا, ترانسپلانتولوگيا كلينيكانىڭ كۇندەلىكتى جۇمىسىنا اينالعان. كلينيكا شىمكەنتتە مەديتسينالىق ءتۋريزمدى دامىتۋعا ۇلكەن سەپتىگىن تيگىزىپ وتىر. وعان دالەل, نەيروحيرۋرگتەر وزبەكستان, قىرعىزستان, تاجىكستانعا بارىپ, شەبەرلىك سىنىپتارىن وتكىزىپ ءجۇر, ال سول ەلدەردىڭ ناۋقاستارى ەمدەلۋ ءۇشىن وسى كلينيكاعا كوپ كەلەدى.
– كلينيكا شارۋاشىلىق جۇرگىزۋ قۇقىعىنداعى مەكەمە بولعان سوڭ تاجىريبەسى مول مامانداردى سىرتتان الدىرتىپ, ولارعا بارىنشا جاعداي جاساۋعا ۇمتىلىپ جاتىرمىز. بىرىنشىدەن, بارلىق بىلىكتى دارىگەرگە ءوز جالاقىسىنان بولەك قوسىمشا ۇستەمەاقى تولەنەدى, ەكىنشىدەن, زاماناۋي قۇرال-جابدىقتارمەن قامتاماسىز ەتەمىز. ۇشىنشىدەن, قىزمەتتىك پاتەر الىپ بەرەمىز. ولاردان تالاپ ەتەتىنىمىز – تەك ناۋقاستارعا ساپالى مەديتسينالىق قىزمەت كورسەتۋ, – دەدى ابىلاي دونباي.
ال ەندى دەنساۋلىق ساقتاۋ سالاسىنىڭ 2022 جىلعى 6 ايداعى كورسەتكىشتەرىنە نازار اۋدارساق, اتقارىلعان جۇمىستار كوڭىل كونشىتەرلىكتەي. دەنساۋلىق ساقتاۋ باسقارماسىنىڭ ۆەدومستۆالىق باعىنىستى 33 مەديتسينالىق ۇيىمى بار. وعان 12 ەمحانا, 15 اۋرۋحانا, 6 باسقا دا ۇيىم كىرەدى. ولار – دياگنوستيكالىق ورتالىق, مەديتسينالىق كوللەدج, قان ورتالىعى, ججس, بالالار ءۇيى جانە جيتس ورتالىعى. قالادا تاۋلىكتىك 4 125 توسەكتىك ورىن بولسا, كۇندىزگى ستاتسيونار 1 959 توسەكتىك ورىنمەن جابدىقتالعان. بۇگىنگى تاڭدا قالادا
4 760 دارىگەر قىزمەت ەتەدى. 10 مىڭ حالىققا شاققاندا دارىگەر سانى 42,1-ءدى قۇرايدى. سونىمەن بىرگە 10 مىڭنان استام ورتا بۋىن مەديتسينا مامانى قىزمەت كورسەتەدى. ولاردىڭ ۇلەس سالماعى 10 مىڭ حالىققا شاققاندا 92,8-گە تەڭ.
شىمكەنت قالاسىنىڭ تۇرعىندارىنا مەديتسينالىق كومەكتىڭ قولجەتىمدىلىگىن ارتتىرۋ ماقساتىندا 4 جاڭا – №14 ەمدەۋ ورتالىعى, «داريا مەديكۋس», «سابي مەد» جانە «تۋرلان مەديكال» دەپ اتالاتىن مەديتسينالىق ورتالىقتار اشىلىپ, 50 مىڭ حالىقتى مەديتسينالىق قىزمەتپەن قامتاماسىز ەتۋدە. سونىمەن قاتار ءبىر دارىگەردىڭ جۇكتەمەسى 1 616-عا دەيىن تومەندەدى. ال جوسپار بويىنشا 1 700-دەن اسپاۋ قاجەت.
مەديتسينا سالاسىندا قول جەتكىزىلگەن وڭ وزگەرىستەر وتە كوپ. ايتالىق, قالالىق ونكولوگيالىق ورتالىقتا, №1 قالالىق كلينيكالىق اۋرۋحانادا, قالالىق كلينيكالىق بالالار اۋرۋحاناسىندا جانە شىمكەنت جۇرەك ورتالىعىندا رەسپۋبليكالىق مەديتسينالىق ورتالىق ماماندارىمەن بىرگە 120 مەديتسينا قىزمەتكەرىن قامتىعان 8 شەبەرلىك سىنىبى وتكىزىلدى.
جەدەل مەديتسينالىق جاردەم ستانساسىنداعى ورتالىقتاندىرىلعان سيمۋلياتسيالىق ورتالىقتا حالىقارالىق ستاندارتتار بويىنشا 108 مەديتسينالىق قىزمەتكەرگە پراكتيكالىق دارىستەر وقىلدى. ستاتيستيكا بويىنشا مەگاپوليستەگى ەمدەۋ مەكەمەلەرىنىڭ ماتەريالدىق-تەحنيكالىق جابدىقتارمەن قامتاماسىز ەتىلۋى 77 پايىزدى قۇرايدى.
– قالالىق ونكولوگيالىق ورتالىقتا ونكوگەماتولوگيا بولىمشەسى اشىلدى, ال ساۋلەلى تەراپيا بولىمشەسىندە پەت, كت جانە سىزىقتىق ۇدەتكىش اپپاراتتارى ورناتىلدى, – دەيدى ونكولوگيالىق ورتالىق ديرەكتورىنىڭ ەمدەۋ ءىسى بويىنشا ورىنباسارى سامات يسمايلوۆ.
ماماننىڭ ايتۋىنشا, دياگنوستيكالىق زەرتتەۋ ادىستەرىنىڭ وزىق ۇلگىلەرى ەنگىزىلۋىنە بايلانىستى ونكولوگيالىق دەرت ەرتە انىقتالا باستادى. مۇنىڭ ءبىر جاقسى جەرى, ەگەر قاتەرلى ىسىك ءى-ءىى ساتىلارىندا ەرتە انىقتالسا, ناۋقاستىڭ كەسەلدەن قۇلان-تازا ايىعىپ كەتۋىنە ءجۇز پايىز مۇمكىندىك بار. ونكولوگيالىق دەرتكە شالدىعۋ, ودان بولاتىن ءولىم-ءجىتىم كورسەتكىشى بويىنشا شىمكەنت رەسپۋبليكا بويىنشا ەڭ تومەنگى ورىنداردا تۇر. ماسەلەن, 100 مىڭ ادامعا شاققاندا قاتەرلى ىسىكپەن اۋىراتىندار مەگاپوليستە 123 ادام بولسا, سول 100 مىڭنان ونكولوگيالىق دەرتتىڭ كەسىرىنەن كوز جۇماتىندار سانى – 48 ادام. وسىدان جيىرما جىل بۇرىن ونكولوگيالىق اۋرۋحانادا ەمدەلىپ شىققانداردىڭ بار-جوعى 20 پايىزى 5 جىلدان ارتىق ءومىر سۇرسە, قازىر بۇل كورسەتكىش 50 پايىزعا جەتكەن. بۇگىنگى تاڭدا زاماناۋي ەندوۆيدەو قۇرىلعىسىمەن تىلىك ارقىلى ءىش قۋىسىنا, كەۋدە قۋىسىنا كۇردەلى وتالار جاسالادى. بۇرىن ولار اشىق ادىسپەن جاسالىپ كەلگەن ەكەن. ودان ناۋقاستار كوپ قينالاتىن. اسقىنۋلار كوپ بولاتىن. ناۋقاس وتادان كەيىن قالپىنا كەلگەنشە كوپ ۋاقىت وتەتىن. سونىمەن بىرگە بۇرىن تەك رەسپۋبليكالىق ونكولوگيالىق ورتالىقتا جاسالاتىن وڭەشتىڭ قاتەرلى ىسىگىنە قارسى وتا بيىل قاڭتاردان باستاپ شىمكەنتتە دە قولعا الىنا باستادى. ەندوپروتەزدەۋ وپەراتسياسىن جاساۋدى دا شىمكەنتتىك ونكوحيرۋرگتەر ابدەن مەڭگەرىپ الدى. ول ءۇشىن باياعىدا ناۋقاستار سوناۋ الماتى قالاسىنا بارۋعا ءماجبۇر بولاتىن. ال زاماناۋي انگيوگرافيالىق قۇرىلعى ارقىلى جىلىنا ورتالىقتا 200-دەي ەندوۆوسكۋليارلى وپەراتسيا جۇزەگە اسادى. رەسپۋبليكا وڭىرلەرىندەگى كوپتەگەن جەتەكشى مامان وسى شىمكەنت ورتالىعىندا تاجىريبە الماسقاندار. قازاقستان رەسپۋبليكاسىنىڭ ونكولوگيالىق قىزمەت ساپاسىن جاقسارتۋ جونىندەگى 2018-2022 جىلدارعا ارنالعان كەشەندى باعدارلاماسىنا سايكەس ونكولوگيالىق ورتالىقتاردا پوزيتروندى-ەميسسيوندى توموگراف جانە جوعارى زاماناۋي ساۋلەلى ەمدەۋ قۇرىلعىسى بولۋى شارت. وسى ورايدا شىمكەنت قالالىق اكىمدىكتىڭ قولداۋىمەن مەملەكەت-جەكەمەنشىك ارىپتەستىگى اياسىندا ونكولوگيالىق مەكەمەدە يادرولىق مەديتسينا ورتالىعى اشىلدى. سونىڭ ناتيجەسىندە, زاماناۋي ساۋلەلى قوندىرعى ورناتىلدى. ونىڭ باستى ارتىقشىلىعى, ىسىككە قاراي باعىتتالعان رادياتسيالىق ساۋلە اۋىرعان نۇكتەگە عانا اسەر ەتىپ, اينالاسىنداعى جاسۋشالاردى زاقىمدامايدى. وسىنىڭ ناتيجەسىندە, ناۋقاس ءوزىن جاقسى سەزىنىپ, ساۋلەنىڭ جاناما اسەرلەرىنەن زارداپ شەكپەيدى. زاماناۋي قوندىرعى جوق كەزدە مەديتسينانىڭ مۇنداي مۇمكىندىگىن ەمدەلۋشىلەر كورىپ, سەزىنە المايتىن ەدى. مامان ءوز سوزىندە بۇگىنگى تاڭدا مەملەكەتتىڭ ونكولوگيالىق اۋرۋمەن اۋىراتىندارعا جاساپ جاتقان كومەگى وراسان ەكەنىن ايتادى. ماسەلەن, ءبىر كۋرس ەم قابىلداۋدىڭ وزىنە ءار ناۋقاسقا 3 ملن تەڭگەدەن ارتىق قارجى كەتەدى. ال شىمكەنتتىڭ ونكولوگيالىق ورتالىعىندا قازىرگى تاڭدا 6 977 ادام تىركەۋدە تۇر. وسىعان قاراپ, مەملەكەتتىڭ الەۋمەتتىك سالاعا, سونىڭ ىشىندە مەديتسيناعا قانشالىقتى كوڭىل ءبولىپ وتىرعانىن كورۋگە بولادى. سونداي-اق 2022 جىلدىڭ 1 ساۋىرىنەن باستاپ اۋرۋحانانىڭ بازاسىندا امبۋلاتورلىق كوروناروانگيوگرافيا جانە ستەندتەۋ بويىنشا دا قىزمەتتەر كورسەتىلە باستادى.
باسقارما تاراپىنان جىلدىڭ باسىندا مەديتسينالىق جابدىق ساتىپ الۋ ءۇشىن 1,1 ملرد تەڭگە بولىنگەن. ناتيجەسىندە, دياگنوستيكالىق تەكسەرۋ جۇمىستارى مەن كۇردەلى وتالاردى جاساۋ ءۇشىن جەتى اپپارات ساتىپ الىندى. بۇعان قوسا, جىلدىڭ سوڭىنا دەيىن ءۇش مەديتسينالىق تەحنيكا ساتىپ الىنادى.
امبۋلاتوريالىق دەڭگەيدە شىمكەنت قالاسىنىڭ 44 مەديتسينالىق ۇيىمى 2022 جىلعا 9,4 ملرد تەڭگە سوماسىنا دارىلىك زاتتار ساتىپ الۋعا وتىنىمدەر ۇسىنسا, بۇگىنگە دەيىن سونىڭ 6,3 ملرد تەڭگەسىنە دارىلىك زاتتار جەتكىزىلدى. ورفاندىق, ياعني سيرەك كەزدەسەتىن اۋرۋى بار 36 بالانى دارىلىك زاتتارمەن قامتاماسىز ەتۋ ءۇشىن جەرگىلىكتى بيۋدجەتتەن 1,5 ملرد تەڭگە ءبولىندى. سونىڭ ناتيجەسىندە, 32 بالا ءتيىستى مەديتسينالىق ەمىن قابىلداپ جاتىر.
التى اي ىشىندە 2 938 مەديتسينالىق قىزمەتكەر شەتەلدە جانە رەسپۋبليكالىق ورتالىقتاردا بىلىكتىلىكتەرىن ارتتىرىپ قايتتى. ارنايى وقىتۋدان وتكەن مەديتسينا ماماندارى اراسىنان قالادا العاش رەت بالالارعا كەڭەس بەرۋ ماقساتىندا پەدياتريالىق 10 ءموبيلدى بريگادا قۇرىلدى. بۇل ءموبيلدى توپ دارىگەرلەرى قاۋىپتى كەسەلگە دۋشار بولعان بالالاردى ۋاقتىلى انىقتاۋ, ولاردى ستاتسيونارلىق ەمدەۋگە جىبەرۋ جۇمىستارىمەن اينالىسادى.
بۇگىنگى تاڭدا مەگاپوليستىڭ ەمدەۋ مەكەمەلەرىنە نەوناتولوگ, رەانيماتولوگ, گەماتولوگ, يممۋنولوگ, سۋردولوگ ماماندارعا قوسىمشا قاجەتتىلىك تۋىنداپ وتىر. ۇلتتىق دەنساۋلىق ساقتاۋدى دامىتۋ عىلىمي ورتالىعى كادرلاردى قولداۋ ماقساتىندا رەزيدەنتۋراعا وقۋعا 87 دارىگەردى جولداۋعا جوسپار دايىنداۋدا.
2022 جىلدىڭ I جارتى جىلدىعىندا شىمكەنت قالاسىندا 15 325 بالا دۇنيەگە كەلدى. ونىڭ ىشىندە ەگىزدەر – 194, ۇشەمدەر – 1 تۋدى قۇرايدى. وتكەن جىلمەن سالىستىرعاندا, ەگىزدەردىڭ تۋ كورسەتكىشى 18 مارتە وسكەن.
بالالارعا مامانداندىرىلعان كومەكتىڭ قولجەتىمدىلىگى مەن ساپاسىن جاقسارتۋ ءۇشىن قالالىق كلينيكالىق بالالار اۋرۋحاناسىنىڭ ماتەريالدىق-تەحنيكالىق جاراقتاندىرىلۋى 96 پايىزعا دەيىن جەتكىزىلدى. سونىڭ ەسەبىنەن كلينيكاعا زاماناۋي مەديتسينالىق جابدىقتار ساتىپ الىندى. سونداي-اق بۇرىن بولماعان ونكوگەماتولوگيا, نەيروحيرۋرگيا, ينتەرۆەنتسيالىق كارديوحيرۋرگيا, نەفرولوگيا بولىمشەلەرى قوسىمشا اشىلىپ, بۇگىنگى تاڭدا قالىپتى جۇمىس ىستەۋدە. قازىر جوعارىدا اتالعان مەديتسينالىق جابدىقتاردىڭ كومەگىمەن تسەرەبرالدى سال اۋرۋى, ورتالىق جۇيكە جۇيەسىنىڭ تۋا ءبىتتى اقاۋلارى, ىسىكتەر, گەماتومالار, مي تامىرلارىنىڭ ترومبوزى سياقتى كۇردەلى وپەراتسيالار مەن مانيپۋلياتسيالار جۇرگىزىلىپ جاتىر. جىل باسىنان بەرى قالالىق كلينيكالىق بالالار اۋرۋحاناسىندا 76 نەيروحيرۋرگيالىق وتا جاسالدى.
قالادا بالالاردى وڭالتۋ قىزمەتى دە دامىپ كەلەدى. قازىرگى ۋاقىتتا شىمكەنت قالاسى بويىنشا 9 مەديتسينالىق ۇيىمدا قالپىنا كەلتىرۋ مەن وڭالتۋ ەمى جۇرگىزىلەدى. بالالار توسەكتىك ورنىنىڭ تاۋلىكتىك سانى 391 بولسا, كۇندىزگى توسەكتىك ورىن 101-ءدى قۇرايدى.
2022 جىلدىڭ 6 ايىندا وڭالتۋدان وتكەن جالپى بالا سانى – 3 773. وتكەن جىلى 2 908 بولعان ەدى. ياعني 2021 جىلمەن سالىستىرعاندا وڭالتۋ شارالارىن قابىلداعان بالا سانى 865-كە ارتقان. تاۋلىك بويى ستاتسيوناردا – 2 842, كۇندىزگى ستاتسيوناردا 931 بالا وڭالتۋ كۋرستارىنان وتكەن. سونىمەن بىرگە ايتا كەتۋ كەرەك, شىمكەنت قالاسىنداعى بالالار دەنساۋلىعىن تۇزەيتىن ورتالىقتار ءمۋلتيتارتىپتى كوماندامەن جابدىقتالعان. ولاردىڭ قاتارىنا رەابيتولوگ, ەمدىك دەنە شىنىقتىرۋ نۇسقاۋشىلارى, ەرگوتەراپەۆت, پسيحولوگ, لوگوپەد, دەفەكتولوگ, الەۋمەتتىك پەداگوگ سەكىلدى ءتۇرلى ماماندار كىرەدى. سونداي-اق وڭالتۋ ورتالىقتارىندا پەداگوگتەر ناۋقاس بالالارعا ويىن, مۋزىكا تەراپياسى, مونتەسسوري ءادىسى سەكىلدى ەمدەۋ تاسىلدەرىن قولدانادى.
دەرەك بويىنشا شىمكەنت قالاسىندا جۇيكە اۋرۋلارىمەن ديسپانسەرلىك ەسەپتە 2 497 بالا تۇرادى, ونىڭ ىشىندە سال اۋرۋىنا شالدىققان 1 164 بالانىڭ 893-ءى وڭالتۋ ەم-شارالارىن قابىلدادى. جالپى وڭالتۋ شاراسىنا كەلسەك, دەنساۋلىق ساقتاۋ ءمينيسترى ا.عينيات 2022 جىلعى 21 شىلدەدە شىمكەنت قالاسىنا جاساعان ءىسساپارىندا مۇمكىندىگى شەكتەۋلى ازاماتتارعا ارنالعان وڭالتۋ ورتالىقتارىن جانداندىرۋ قاجەتتىگى جونىندە ارنايى تاپسىرما بەرگەن بولاتىن.
بۇدان بولەك, قالاداعى 142 ورتا ءبىلىم بەرەتىن مەكتەپتە مەديتسينالىق پۋنكتەر جۇمىس ىستەيدى. پروفيلاكتيكالىق تەكسەرۋگە جاتاتىن 225 737 وقۋشىنىڭ وقۋ جىلى ىشىندە 146 729-ى تەكسەرۋدەن ءوتتى. بۇل جوسپارلانعان 50 پايىزدىق قامتۋدان 15 پايىزعا اسىپ وتىر. ياعني وقۋشىلاردىڭ دەنساۋلىعىن الدىن الا تەكسەرۋ بويىنشا مەديتسينالىق باقىلاۋ جۇمىستارى مەگاپوليستە ارتىعىمەن ورىندالىپ جاتىر دەگەن ءسوز. پروفيلاكتيكالىق يممۋنداۋمەن ءارتۇرلى جاس كەزەڭىندەگى بالالاردىڭ 33 پايىزى قامتىلعان. مۇندا دا جوسپار مەجەگە ساي تولىق ورىندالعان.
2023-2025 جىلدارى دەنساۋلىق سالاسى بويىنشا قىزمەتكەرلەردىڭ ورتاشا تابىس دەڭگەيى ارتاتىن بولادى.
پرەزيدەنت قاسىم-جومارت توقاەۆتىڭ 2025 جىلعا دەيىن دەنساۋلىق ساقتاۋعا ارنالعان جالپى شىعىستاردى جالپى ىشكى ءونىمنىڭ 5 پايىزىنا دەيىن ۇلعايتۋ جونىندەگى تاپسىرماسىنىڭ شەڭبەرىندە جۇزەگە اسپاق. («قر پرەزيدەنتىنىڭ سايلاۋالدى باعدارلاماسىن ىسكە اسىرۋ جونىندەگى شارالار تۋرالى» 2019 جىلعى 19 ماۋسىمداعى №27 جارلىعى). وسىعان سايكەس دارىگەرلەردىڭ جانە ورتا مەديتسينا قىزمەتكەرلەرىنىڭ ورتاشا ايلىق جالاقىسىن قازاقستان رەسپۋبليكاسىنىڭ ەكونوميكالىق دامۋ كورسەتكىشىنە قاراي كەزەڭ-كەزەڭىمەن ۇلعايتۋ قاراستىرىلعان. بۇل بويىنشا دارىگەردىڭ ورتاشا جالاقىسىن 2023 جىلى 561 مىڭ تەڭگەگە, ورتا بۋىن مەديتسينالىق قىزمەتكەرلەرىنىڭ جالاقىسىن 209 مىڭ تەڭگەگە ۇلعايتۋ كوزدەلۋدە.
سونىمەن بىرگە دەنساۋلىق ساقتاۋدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىندا دارىگەرلەر مەن ورتا مەديتسينالىق پەرسونالدىڭ جالاقىسىن كەزەڭ-كەزەڭىمەن ۇلعايتۋ جونىندە دە ايتىلعان.
ۇكىمەتتىڭ 2015 جىلعى 31 جەلتوقسانداعى №1193 قاۋلىسىنا سايكەس 2021 جىلعى 1 قاڭتاردان باستاپ جالاقى ورتاشا ەسەپپەن دارىگەرلەرگە 30 پايىزعا, ورتا بۋىن مەديتسينا ماماندارىنا 20 پايىزعا ءوستى.
قازىرگى تاڭدا دارىگەرلەردىڭ ورتاشا جالاقىسى 302 139 تەڭگە (2021 جىلى 228 515 تەڭگە), ورتا بۋىن ماماندارىنىڭ ايلىق تابىسى 175 799 (2021 جىلى 144 290 تەڭگە) تەڭگەگە جەتتى. وسى ستاتيستيكالىق دەرەكتەرگە قاراي وتىرىپ, 2021 جىلمەن سالىستىرعاندا دارىگەرلەر جالاقىسى 30 پايىزعا, ورتا بۋىن ماماندارىنىڭ ايلىق ەڭبەكاقىسى 20 پايىزعا وسكەنىن كورەمىز.
قالالىق اكىمدىكتىڭ مەديتسينا سالاسىنا جاۋاپتى وكىلدەرىنىڭ ايتۋىنشا, الداعى ۋاقىتتا حالىقتىڭ دەنساۋلىعىن جاقسارتۋ ماقساتىندا اۋقىمدى جۇمىس اتقارىلماق. وسىعان وراي ءتيىستى جوسپارلار بەكىتىلگەن. ماسەلەن, بۇگىنگە دەيىن كوروناۆيرۋس ينفەكتسياسىنا قارسى 100 پايىز ۆاكتسينالاۋ جۇرگىزىلدى. دەي تۇرعانمەن رەۆاكتسينالاۋ جانە قايتا رەۆاكتسينالاۋ جۇمىستارى قولعا الىنادى. 5 جىل ءومىر سۇرەتىن ونكولوگيالىق ناۋقاستاردىڭ ۇلەس سالماعى 51,3 پايىزعا جەتكىزىلەدى. 30 پايىز مەديتسينالىق پەرسونالدىڭ قاتىسۋىمەن يزرايل, گەرمانيا, رەسەي جانە ليتۆانىڭ جەتەكشى ماماندارىمەن شەبەرلىك ساباقتارى وتكىزىلەدى. شجق «قالالىق پەريناتالدىق ورتالىق» مكك كۇردەلى جوندەلىپ, بوساندىرۋ مەكەمەلەرىنىڭ ماتەريالدىق-تەحنيكالىق بازاسى جاقسارتىلادى. سونداي-اق بوساندىرۋ ۇيىمدارى باكتەريولوگيالىق زەرتحانالارمەن قامتاماسىز ەتىلەدى. العاشقى مەديتسينالىق كومەك كورسەتۋ پۋنكتەرى دە زاماناۋي مەديتسينالىق قۇرال-جابدىقتارمەن جاڭارتىلادى. ءبىر جاسقا دەيىنگى بالالاردى پرواكتيۆتى باقىلاۋمەن جانە سكرينينگپەن قامتۋ 100 پايىزعا ۇلعايادى. بالالار اۋرۋحاناسىنىڭ بازاسىندا كارديوحيرۋرگيا, وفتالمولوگيا سىندى جاڭا بولىمشەلەر اشىلادى.
ايتا كەتكەن ءجون, ەمحانالار ۇكىمەتتىك ەمەس ۇيىمدارمەن بىرگە سالاماتتى ءومىر سالتىن ۇستانۋ بويىنشا 4 الەۋمەتتىك جوبانى جانە سالاماتتى ءومىر سالتى باعدارلاماسى بويىنشا 29 ءىس-شارانى وتكىزۋگە ارنايى جوسپار تۇزسە, ولاردى جۇزەگە اسىرۋعا 30,1 ملن تەڭگە بولىنگەن.
ءبىلىم باسقارماسىمەن بىرلەسىپ مەكتەپتەردە دۇرىس تاماقتانۋ راتسيونىن ازىرلەۋ جانە «دەنساۋلىقتى نىعايتۋعا ىقپال ەتەتىن مەكتەپتەر» جوباسىن ىسكە اسىرۋ كوزدەلىپ وتىر.
مالىمەتكە ساي بۇگىنگى تاڭدا ەمحانالاردا 68 ءموبيلدى توپ قىزمەت اتقارۋدا. ءموبيلدى توپتارعا ءبىر كۇندە 120-عا دەيىن شاقىرتۋلار كەلىپ تۇسەدى. ەپيدەميولوگيالىق احۋال كۇرت ناشارلاعان جاعدايدا 214 ءموبيلدى توپ قىزمەت كورسەتۋ ءۇشىن ساپقا تۇراتىن بولادى.
وسى تۇستا مىنا ماسەلەنى دە ايتپاي كەتۋگە بولماس, «حالىق دەنساۋلىعى جانە دەنساۋلىق ساقتاۋ جۇيەسى تۋرالى» قازاقستان رەسپۋبليكاسىنىڭ 2020 جىلعى 7 شiلدەدەگi № 360-VI قرز كودەكسىنىڭ 135-بابىنا سايكەس, پاتسيەنتتەر ءوز دەنساۋلىعىن ساقتاۋعا جانە نىعايتۋعا شارالار قولدانۋعا مىندەتتەلگەن. سونداي-اق باستاپقى مەديتسينالىق-سانيتارلىق كومەك ۇيىمدارىنان پاتسيەنتتەر ۋاقتىلى پروفيلاكتيكالىق تەكسەرۋلەردەن وتۋلەرى قاجەت. سوندىقتان اۋرۋدىڭ الدىن الۋ ماقساتىندا بۇگىنگى تاڭدا مەگاپوليستىڭ مەديتسينا سالاسى قىزمەتىنىڭ ءبىر باعىتىن وسى ارناعا قاراي بۇرىپ جاتىر. جانە وعان بولىنەر كومەك تە, كورسەتىلەر قولداۋ دا قالالىق اكىمدىك تاراپىنان اۋقىمدى بولماق.
شىمكەنت
