استانا. 9 مامىر. رەسەيدىڭ اتى اڭىزعا اينالعان حوككەيشىسى يگور لاريونوۆ مينسكىدە وتكەلى جاتقان الەم چەمپيوناتى الدىندا ءوزىنىڭ وسىعان قاتىستى وي-پىكىرلەرىن ءبىلدىردى. بۇل تۋرالى «چەمپيونات.رۋ» ۆەب-سايتى حابارلادى.
وليمپيالىق ويىنداردىڭ ەكى دۇركىن چەمپيونى يگور لاريونوۆ رەسەيدىڭ مينسك چەمپيوناتىندا وتەتىن العاشقى ماتچتارىن ءوز كوزىمەن كورمەكشى. ول ءوز ەلىنىڭ قۇراماسى سوچيدەگى قاراعاندا, مۇندا جيناقى ويىن كورسەتەدى دەپ ەسەپتەيدى.
-تۋرنيردە رەسەي قۇراماسىنان قانداي ناتيجە كۇتۋگە بولادى؟
-مەن ونىڭ ويىنى قورعانىستان گورى شابۋىلدا كوبىرەك وتەدى عوي دەپ ويلايمىن. ءبىز ەكى جاعىن ۇيلەستىرە ۇستايتىن ويىن كورەتىن بولامىز. مەنىڭ كۇتەتىنىم وسى. كوماندانىڭ قۇرامىنا قاراپ تۇرىپ, جاتتىقتىرۋشىنىڭ يمپروۆيزاتسياعا كوپتەپ بارۋىنا مۇمكىندىگى بار دەپ ەسەپتەيمىن.
-ويىن جارقىلداپ وتە مە؟
-بۇعان ناقتى جاۋاپ بەرۋ قيىن. سەبەبى, مەن وليمپيادادا ونىڭ اقش پەن سلوۆاكياعا قارسى وتكەن ەكى ويىنىن عانا كوردىم. ءبارى دە ويىنشىلاردىڭ وزدەرىن قالاي ۇستاۋلارىنا بايلانىستى. ال ويىنعا شىققان كەزدە, قاتەلىك جىبەرىپ الۋدان قورقىپ, جاسقانشاماقتاۋ كەرەك. ەگەر كوماندا وزىنە ءوزى سەنىمدى بولسا, ونىڭ جەڭۋگە دەگەن مۇمكىندىگى دە ارتادى.
-ۇحل ويىنشىلارىنىڭ كوپشىلىگى كەلۋگە كەلىسكەنى تاڭ قالدىرماي ما؟
-جوق, بۇل قالىپتى جايت. جىگىتتەر وزدەرى وتكىزگەن قيىن ماۋسىمنان كەيىن قۇرامادا ويناۋ ولار ءۇشىن بورىش بولىپ سانالادى.
-ياگردىڭ تۋرنيردەگى شەشىمى تاڭ قالدىرعان جوق پا؟
-تاڭ قالعان جوقپىن. ماۋسىم ساۋىردە اياقتالادى, ال سەن ءۇزىلىستىڭ ايتارلىقتاي ۇزاققا سوزىلىپ كەتەتىنىن بايقايسىڭ. سوسىن ۇزاعىراق ويناعىڭ كەلەدى. ەگەر پلەي-وفف بولعاندا, ول سوندا وينار ەدى. بىراق كلۋبتىڭ ەندى وينايتىن ويىندارى جوق. ال ءتورت-بەس ايدا ويىندى جوعالتىپ الۋىڭ مۇمكىن. ونى ارداگەرلەر بىلاي تۇرسىن, ويناماي جۇرسە, جاستاردىڭ ءوزى دە جوعالتىپ الادى. سوندىقتان مەن ياگردىڭ شەشىمىن دۇرىس دەپ سانايمىن. ۋاقىت بولسا كەتىپ بارا جاتىر. بۇل, بالكي, ونىڭ سوڭعى الەم چەمپيوناتى دا شىعار.
-وليمپيالىق ويىندار جىلى وتەتىن الەم چەمپيوناتىندا قىزىق قالمايدى دەسەدى...
-مەن ولاي دەمەس ەدىم. الەم چەمپيوناتى – بۇل الەم چەمپيوناتى, جاس تالانتتى ويىنشىلاردىڭ بايقاۋى. ءسوز جوق, مۇندا كروسبي, كەين, تەيۆز, داتسيۋك, گرانلۋد جەتىسپەيدى. بىراق وزگەلەرگە وزدەرىن كورسەتەتىن مۇمكىندىك بار. مۇندا, بەلارۋستە جاڭا ەسىمدەردى اشاتىن جاڭا حوككەي فەستيۆالى وتكەلى تۇر. ماسەلەن, ءبىز بۇعان دەيىن ماككيننوندى كوزبە-كوز كورگەن جوق ەدىك.
-جاستار رەسەي قۇراماسىندا دا بار.
-ءيا, بۇل جاقسى. جاتتىقتىرۋشىلار جاس جىگىتتەرگە نەندەي قابىلەتتەرى بار ەكەندەرىن كورسەتۋلەرىنە مۇمكىندىكتەر بەرىپ وتىر. ەندى شە؟ ويىنشىلارعا ەۋروتۋرلاردا ەمەس, باعا جەتپەس تاجىريبە الاتىن وسىنداي تۋرنيرلەردە كوز سالۋ كەرەك قوي. قاي كەزدە دە تاۋەكەل ەتپەسە بولمايدى. ءدال قازىرگى جاعدايدا ول ءوزىن ءوزى اقتايدى. بۇعان قوسا, رەسەي قۇراماسىندا تاجىريبەلى جانە جاس ويىنشىلاردىڭ تەڭ جينالىپ قالعان. مۇنىڭ بولعانىنىڭ ءوزى جاقسى.
-ۇحل پلەي-وفف ويىندارىن قاداعالاپ وتىردىڭىز با؟
-مەن ماتچتارىن كورگەن جوقپىن, تەك ۇحل-دى قاداعالاپ تۇردىم.
-وۆەچكيننىڭ ويىنى تۋرالى نە ايتاسىز؟ ول پايدالى اسەرى تومەندىگى ءۇشىن سىنالىپ ءجۇر.
-ول كەشەگى كۇننىڭ اڭگىمەسى. قازىر جاڭا پاراق اشىلادى. ول نە بولعاندا دا, كوماندانىڭ ليدەرى. ەندى جۇرتتىڭ ءبارى ءبارىن باسىنان باستايدى. ءوۆيدىڭ اتى – وۆي, ول گول سوعا الاتىن, كوماندانى سوڭىنا ەرتە الاتىن جانە توعىز ويىننان تۇراتىن شاعىن سەريادا قۇرامانى چەمپيون اتاندىرا الاتىن ادام. ونىڭ ەندى باسپاسوزدەن اۋلاق بولىپ, باسىن تىنىش ساقتاعانى ابزال. مەنىڭ وعان جانە باسقا ويىنشىلارعا بەرەتىن كەڭەسىم مىناۋ – ويىنعا ءتاستۇيىن بولىپ كىرىسۋ كەرەك, سوندا ءبارى دە ورىن-ورنىنا كەلەدى.
رۋسلان يگىلىك.
دەرەككوز: چەمپيونات.رۋ.
فوتو: چەمپيونات.رۋ.
