مەملەكەت باسشىسى قازاقستاندىقتاردى جەڭىس كۇنىمەن قۇتتىقتادى

استانا. 9 مامىر. بۇگىن پرەزيدەنت جەڭىستىڭ 69 جىلدىعىنا وراي استاناداعى «وتان قورعاۋشىلار» مونۋمەنتىنە گۇل شوقتارىن قويىپ, سول ءبىر سۇراپىل سوعىستا قازا تاپقان بوزداقتاردى ءبىر ءسات ۇنسىزدىكپەن ەسكە الدى. سودان كەيىن مەملەكەت باسشىسى بۇكىل قازاقستاندىقتاردى جەڭىس كۇنىمەن قۇتتىقتادى. بۇل تۋرالى egemen.kz حابارلادى. جيىندا نۇرسۇلتان نازارباەۆ: «قۇرمەتتى قازاقستاندىقتار, بارشالارىڭىزدى بۇگىنگى ۇلىق مەرەكە – ۇلى وتان سوعىسىنداعى جەڭىسپەن شىن جۇرەكتەن قۇتتىقتايمىن! ءبىز - ارداگەرلەرىمىزدى ارداقتايتىن, قارتتارىمىزدى قادىرلەيتىن حالىقپىز», – دەدى. سونداي-اق, مەملەكەت باسشىسى ارداگەرلەردىڭ كەشەگى ەرەن ەرلىكتەرىنە توقتالا كەلە: «ۇلتشىلدىق پەن ءفاشيزمنىڭ نە ەكەنىن ءبىزدىڭ اتالارىمىز, اعالارىمىز جاقسى بىلەدى, سوعان قاراپ جاستارىمىز بىرلىككە, وتاندى قورعاۋعا  ۇيرەنسە ەكەن دەيمىز», – دەدى. استانادا ارداگەرلەر مەن قالا تۇرعىندارى «وتان قورعاۋشىلار» مونۋمەنتىنە جينالىپ, جەڭىس كۇنىن اتاپ وتۋدە. جينالعان قاۋىم سارباز بوتقاسىنىڭ ءدامىن تاتىپ ءارى سوعىس كەزىندە شىرقالعان اندەر ايتىلدى. بۇكىل الەمدى شارپىعان, ءۇزىلىسسىز 1418 كۇنگە سوزىلعان بۇل سۇراپىل سوعىستىڭ بەل ورتاسىندا قازاقستاندىقتار مايداندا دا, تىلدا دا ەرلىكتىڭ جارقىن ۇلگىسىن كورسەتتى. ەلىمىزدەن مايدان دالاسىنا 1 ملن. 200 مىڭنان استام جاۋىنگەر اتتاندى. ولاردىڭ 600 مىڭى مايداننان ەلگە قايتىپ ورالمادى. جولدىباي بازار. دەرەككوز: egemen.kz. فوتو: «قازاقپارات».