جامبىل وبلىسىندا 361 ورتا, 33 نەگىزگى جانە 50 باستاۋىش مەكتەپ بار. بۇگىنگى تاڭدا اتالعان مەكتەپتەردىڭ 29-نىڭ ديرەكتورى روتاتسيا تارتىبىنە ساي اۋىستىرىلدى. باسقا مەكتەپتىڭ ديرەكتورى قىزمەتىنە كىرىسكەندەردىڭ باسىم بولىگى تاراز قالاسىنداعى ءتىس قاققان ماماندار. بىلايشا ايتقاندا, ءبىر مەكتەپتى ۇزاق ۋاقىت باسقارىپ, ازدى-كوپتى «ديكتاتورعا» اينالا باستاعان باسشىلار دەسەك تە بولادى.
كەزىندە مينيستر ءدال وسى روتاتسيالاۋ ءتارتىبىنىڭ ءبىلىم بەرۋ ۇيىمدارىنداعى جۇمىستى جاڭا دەڭگەيگە كوتەرەتىنىنە سەنىم بىلدىرگەن بولاتىن. ا.ايماعامبەتوۆ بۇل ءۇردىس ءبىلىم بەرۋ ۇيىمدارى جۇمىسىنىڭ تيىمدىلىگىن ارتتىراتىنىنا, ءبىرىنشى باسشىلاردىڭ باسقارۋشىلىق بىلىكتىلىگىن كاسىبي تۇرعىدان دامىتاتىنىنا سەنىم بىلدىرگەن ەدى. جالپى, روتاتسيا دەگەنىڭىز ءبىر اكىمشىلىك اۋماقتا عانا جۇرگىزىلگەندىكتەن, ونىڭ اسەرى قانداي بولاتىنىن ۋاقىت كورسەتە جاتار. ءبىر انىعى, وبلىس ورتالىعىنداعى ديرەكتورلاردىڭ جۇمىس ىستەۋ ءتارتىبىن مۇعالىمدەر جاقسى بىلەدى. ويتكەنى ءبارى ءبىر-بىرىمەن جاقسى تانىس. سوندىقتان ءار ديرەكتور جۇمىس ىستەۋ مودەلىن جاڭا قازاقستاننىڭ كوزقاراسىنا سايكەس جاڭاشالاماسا, ءوزىنىڭ مۇمكىندىگىن جاڭا باعىتتارمەن رەفورمالاماسا, ءبارى بەكەر سەكىلدى. ويتكەنى ولار الىسقا كەتىپ بارا جاتقان جوق...
«وڭىردە 443 مەكتەپ بار بولسا, ونىڭ ىشىندە 29 مەكتەپتىڭ ديرەكتورى وسى جىلى روتاتسيا قاعيداتىنا سايكەس باسقا مەكتەپتىڭ ديرەكتورى قىزمەتىنە كىرىسەتىن بولدى. ودان بولەك مەكتەپكە دەيىنگى ۇيىمداردىڭ جەتەكشىلەرى دە اۋىستىرۋ تارتىبىنە سايكەس باسقا قىزمەتتەردى اتقارماق. ولاردىڭ سانى – 30. جالپى العاندا, مينيسترلىك بەكىتكەن قاعيداتقا سايكەس ءبىر ءبىلىم بەرۋ ۇيىمىندا جەتى جىلدان استام ۋاقىت باسشىلىق قىزمەت اتقارعان ديرەكتورلار روتاتسياعا ءتۇستى. جالپى, بۇل جۇمىس مەكتەپتەردىڭ كورسەتكىشىنە, بالا سانىنا, ءبىلىم بەرۋدەگى جاڭاشىلدىعىنا ساي جۇزەگە اسىرىلدى. باسقا قىزمەتكە اۋىسقان باسشىلاردىڭ باسىم بولىگى تاراز قالاسىنداعى ديرەكتورلار بولىپ وتىر», دەيدى وبلىستىق ءبىلىم باسقارماسى پەداگوگ كادرلارمەن جۇمىس ءبولىمىنىڭ باس مامانى قارلىعاش قونىسبەكوۆا جاعدايدى تولىقتاي ءتۇسىندىرىپ.
ءبىلىم باسقارماسىنىڭ وكىلى كەلتىرگەن دەرەكتەرگە سۇيەنسەك, تالاس, مەركى, سارىسۋ, قورداي اۋداندارىندا ەكى مەكتەپتىڭ ديرەكتورى قىزمەت اۋىستىرسا, شۋ اۋدانىندا بەس مەكتەپتىڭ ديرەكتورى ەندى جاڭا ءبىلىم بەرۋ مەكەمەسىن باسقارماق. قالعان اۋىس-تۇيىستەر تاراز قالاسىن قامتىعان. بىلايشا ايتساق, اۋىس-ءتۇيىستىڭ جارتىسىنان استامى وبلىس ورتالىعىندا ورىن العان. روتاتسياعا تۇسكەن ديرەكتورلاردىڭ ىشىندە ءبىر قىزمەتتى 18 جىلعا جۋىق ۋاقىت اتقارعان مامان دا بار.
مينيسترلىك بەكىتكەن قاعيداتقا سايكەس اتقارىلاتىن روتاتسيالاۋ جۇمىسى توقسان سايىن جالعاسىن تاپپاق. ق.قونىسبەكوۆانىڭ ايتۋىنشا, وسى جىلدىڭ اياعىنا دەيىن تاعى ءۇش مەكەمەنىڭ باسشىسى اۋىسادى. سونداي-اق 16 مەكتەپكە دەيىنگى ءبىلىم بەرۋ ۇيىمىنىڭ باسشىسى جاڭا ورىندا جۇمىسقا كىرىسپەك. بۇدان سوڭ كەلەسى جىلدىڭ جاعدايى زەردەلەنبەك.
ادەتتە باسشىلار اۋىسقان كەزدە كوماندالىق اۋىس-ءتۇيىس ورىن الىپ جاتاتىنى ءمالىم. بۇل جاعداي ءبىلىم سالاسىندا دا قايتالانباسىنا كىم كەپىل؟ باسشى مىقتى دەگەن كادرلاردى وزىمەن بىرگە ەرتىپ كەتۋى مۇمكىن بە؟ وسى ساۋالدى وبلىستىق ءبىلىم باسقارماسىنىڭ مامانىنا قويعان ەدىك.
«وڭىرىمىزدەگى جۇمىستار ءمينيستردىڭ تاپسىرماسىنا سايكەس جۇرگىزىلىپ جاتقانىن ايتا كەتكەن ءلازىم. ا.ايماعامبەتوۆتىڭ ءوزى كوماندالىق اۋىس-ءتۇيىس بولماۋى كەرەگىن شەگەلەپ تاپسىرعان بولاتىن. باسشىلار ورىنباسارىن, باس بۋحگالتەرىن وزىمەن ەرتىپ كەتپەۋى كەرەك. باسقا دا مامانداردى شۇبىرتىپ اكەتۋىنە تىيىم سالىنادى. بۇل جاعدايدى مەكتەپ ديرەكتورلارىنا قاتاڭ ەسكەرتتىك. سوندىقتان جاڭادان تاعايىندالعان ديرەكتورلار ءوزى باسشى بولعان مەكەمەدەگى قىزمەتكەرلەرمەن تىعىز قارىم-قاتىناستا جۇمىس ىستەيتىن بولادى. ءبىز بۇل ماسەلەنى قاتاڭ قاداعالايمىز», دەيدى ول.
روتاتسيا ءتارتىبى نەلىكتەن اۋدانداردا لايىقتى دەڭگەيدە جۇرگىزىلمەگەن؟ نەگە تاراز قالاسىندا عانا كوپتەگەن باسشى اۋىسقان؟ الدىمەن ويىمىزعا وسى ساۋال ورالدى. الايدا باسقارماداعى مامانداردىڭ ايتۋىنشا, روتاتسيا ءتارتىبى جالعىز مەكتەبى بار ەلدى مەكەندەردى قامتىمايدى. سول سەبەپتى باسقا مەكتەپكە اۋىسقان ديرەكتورلاردىڭ باسىم بولىگى تاراز قالاسىن قامتىپ وتىر. بالكىم, الداعى ۋاقىتتا وسى ماسەلە مينيسترلىك دەڭگەيىندە قايتا قارالۋى كەرەك شىعار؟
راسىندا دا, جامبىل وبلىسىندا مويىنقۇم اۋدانىندا عانا كەيبىر ەلدى مەكەندەردىڭ اراقاشىقتىعى 180-250 شاقىرىمدى قۇرايدى. باسقا اۋداندارداعى اۋىلداردىڭ اراسى ايتارلىقتاي الىس ەمەس. ال كەيبىر ەلدى مەكەندەردە تاپجىلماي وتىرعان ديرەكتورلاردىڭ باسقا قىزمەتكە اۋىسپاۋى اتالعان مەكتەپتەردەگى جۇيەنىڭ وزگەرمەيتىنىن ايقىنداي تۇسسە كەرەك. وسى ماسەلە ەسكەرىلسە دەيسىڭ. اسىرەسە اراسى 5-10 شاقىرىمدى عانا قۇرايتىن مەكتەپتەردىڭ ديرەكتورلارى اۋىسقاننان ەشكىم ۇتىلا قويماس. ءبىرىنشى كەزەكتە ۇجىمداعى جۇمىستى جۇرگىزۋ, ءبىلىم بەرۋ ىسىندەگى پروتسەستەر وزگەرەدى. قالاي بولعان كۇندە دە جاڭا باسشى كەلگەن جەردە جۇمىس جاڭاشا سيپات الادى عوي. روتاتسيا قاعيداتىندا وسى ماسەلەنىڭ ەسكەرىلمەگەنى قاپالاندىرادى.
«مينيسترلىك تاراپىنان ارنايى بۇيرىق بولسا, اۋىلدارداعى ديرەكتورلاردى اۋىستىرۋعا بولادى. ازىرگە جالعىز مەكتەبى بار ەلدى مەكەندەردەگى باسشىلاردى اۋىستىرۋ ماسەلەسى قارالماعان. نەگىزى وسى ماسەلە قامتىلسا ەشكىم ۇتىلمايدى», دەيدى ماماندار.
وڭىردەگى مەكتەپ ديرەكتورلارىنىڭ باسىم بولىگى – نازىك جاندىلار. سوڭعى دەرەكتەرگە زەر سالساق, بۇگىندە 282 ديرەكتەر ايەل بولسا, 121 باسشى ەر ازامات ەكەن.
جامبىل وبلىسى
