سوعىس سالعان جارانىڭ ورنى ءالى سىزدايدى. ءبىز اۋىر جارالانساق تا, امان قالدىق. ال مىڭداعان قاندى كويلەك جولداستارىمىز تۋعان جەردىڭ توپىراعى دا, اۋاسى دا بۇيىرماي, مايدان دالاسىندا ءبىر-ءبىر تومپەشىككە اينالىپ, قالىپ قويدى. ولاردىڭ دا ەلگە قايتىپ كەلىپ, بالا ءسۇيىپ, ۇرپاق تاربيەلەۋىنە, باقىتتى بولۋعا, ەلدىڭ تاۋەلسىزدىگىن, بۇگىنگى بەيبىت ءومىرىن كورۋىنە تولىق قۇقى بار ەدى عوي. ولار قىرشىن كەتتى, ءبىز ءتىرى قالدىق. قازىر قاتارىمىز دا سيرەپ كەتتى. قوستاناي وبلىسى بويىنشا بۇگىندەرى 435 مايدانگەر عانا جەڭىس مەرەكەسىن اتاپ ءوتىپ وتىر. سوعىستا ەرلىكپەن قازا تاپقانداردى ەسكە الۋ, ۇمىتپاۋ, جاستاردى پاتريوت ەتىپ ءوسىرۋ – تىرىلەردىڭ پارىزى. مەن مايدانعا اتتانعاندا ءالى 17 جاسقا تولماعان كەزىم ەدى. جاسى جەتكەن ەر-ازاماتتاردى مايدانعا الىپ, ءبىز سەكىلدى بالالاردى فابريكا-زاۋىت ۋچيليششەسىنە وقۋعا جىبەردى.
مەن قاراعاندىداعى فزۋ-عا وقۋعا باردىم. قاسىمدا ەكى دوسىم بار, ۇشەۋمىز مايدانعا سۇرانىپ, اسكەري كوميسسارياتقا تالاي باردىق. «جاستارىڭ جەتپەيدى», دەپ شىعارىپ سالادى. بىردە مايدانعا سولداتتار اپارا جاتقان ەشەلونعا جاسىرىنىپ ءمىنىپ, تارتىپ وتىردىق. ءبىزدىڭ ۋچيليششەدەگى تاربيەشىمىز وسى ۆاگونعا مىنگەن بولاتىن, سول كىسىنى دە ارقا تۇتتىق-اۋ دەيمىن. سونىمەن پويىز ءجۇرىپ كەتكەن سوڭ, ءبىزدى قايتا ءتۇسىرىپ تاستامادى. جاسىمىزدى ءبىر جاس ۇلكەيتىپ جازىپ, سول ەشەلوننان تۇسپەي, مايدانعا كىرىسىپ كەتكەنىمىزدى ءبىر-اق بىلدىك. سوعىستىڭ قىرعىنىن باستان وتكەردىم. سولتۇستىك باتىس مايداندا, كۋرسك ءيىنى ءۇشىن بولعان شايقاستا بولدىم. ۋكراينانى ازات ەتۋ ۇرىستارىنا, كورسۋن-شەۆچەنكو وپەراتسياسىنا قاتىستىم.
بۇل اۋىر, شىعىنى كوپ ۇرىس بولعانى تاريحتان بەلگىلى. سول شايقاستا مەن اۋىر جارالاندىم. اتا-اناما «قارا قاعاز» كەلىپتى. ال مەنى گوسپيتالدان شىققان سوڭ, پولتاۆاداعى تانك ۋچيليششەسىنە جىبەردى. جەڭىستى سوندا ءجۇرىپ قارسى الدىم. ماسكەۋدەگى اسكەري پارادتى كورۋ مەن ءۇشىن ۇلكەن قۇرمەت دەپ بىلەمىن. قازىر ارقايسىسى بولەك ەل بولسا دا, سول كەزدەگى كەڭەس وداعى قۇرامىنداعى رەسپۋبليكالاردىڭ بارلىعى تىزە قوسىپ, فاشيزمگە قارسى بىرگە كۇرەستى. ماسكەۋدى ءبىزدىڭ قازاقستاندىقتار جاۋدان قورعادى. مەن پارادتى تاماشالاپ تۇرىپ, مايدانداستارىمدى ەسكە الامىن.
ەگەر مەنەن ماسكەۋلىكتەر, پارادتى قىزىقتاۋعا كەلگەن وزگە دە قوناقتار سۇراسا, تاۋەلسىز قازاقستانىم تۋرالى ايتىپ بەرەمىن. ماسكەۋدەن كەلگەن سوڭ, قوستانايداعى جاستارعا, بالالارعا پاراد تۋرالى, ۇلى وتان سوعىسىنداعى مەنىڭ زامانداستارىم, دوستارىم جاساعان ەرلىك ىستەر تۋرالى اڭگىمەلەۋدەن جالىقپايمىن. ولار بىزگە قاراپ وتانىن قورعايتىن پاتريوتتىق تاربيە الۋى ءتيىس. ماسكەۋ پارادى وزگە ەلدە بولسا دا, ميلليونداردىڭ سوعىسقا, فاشيزمگە ورتاق قارسىلىعىن, بەيبىتشىلىك تىلەگىن پاش ەتەدى.
قوستاناي.
