اتالعان جارىستا قازاقستاننىڭ نامىسىن جانسايا ابدىمالىك پەن ءبيبىسارا اساۋباەۆا قورعايدى. 22 جاستاعى جانسايا قازىرگى كەزدە الەمدىك رەيتينگتە 14-ورىندى يەلەنۋدە. بۇل – قازاقستاننىڭ شاحماتشىلارى اراسىنداعى ەڭ ۇزدىك كورسەتكىش. سول سەبەپتى ول وسى تۋرنيرگە بىردەن جولداما الىپ وتىر. سونىمەن قاتار ۇيىمداستىرۋشى تاراپ Women Grand Prix-2022 دوداسىنا تاعى ءبىر ويىنشىنى قوسا الادى. بۇل رەتتە تاڭداۋ 18 جاستاعى بيبىساراعا ءتۇستى. ۇزدىكتەر تىزىمىندە ول 31-ورىندى ەنشىلەۋدە. وسى باسەكەلەردىڭ قورىتىندىسى بويىنشا ەڭ كوپ ۇپاي جيعان بۇرىمدى فيدە-ءنىڭ ۇمىتكەرلەر تۋرنيرىنە قاتىسۋ قۇقىعىنا يە بولادى. سونداي-اق توپ-10 شاحماتشىنىڭ قاتارىندا دينارا سادۋاقاسوۆا (33-ورىن) مەن مەرۋەرت كاماليدەنوۆا (63-ورىن) سىندى قازاق قىزدارى بار.
ال الەمدىك رەيتينگتە ۇزدىك وندىقتىڭ ساناتىنا مىنا شاحماتشىلار ەنىپ وتىر: حوۋ يفان (قىتاي), الەكساندرا گورياچكينا (رەسەي), تسزيۋي ۆەنتسزيۋن (قىتاي), ەكاتەرينا لاگنو (رەسەي), لەي تينتسزە (قىتاي), نانا دزاگنيدزە (گرۋزيا), ماريا مەن اننا مۋزىچۋكتار (ۋكراينا), تان تجۋني (قىتاي) جانە الەكساندرا كوستەنيۋك (رەسەي).
