«بۇل – ەلىمىزدىڭ سپورت سالاسىنداعى ايتۋلى وقيعا. قازاقستاندا شاحماتقا دەگەن قىزىعۋشىلىق جىلدان-جىلعا ارتىپ كەلەدى. وسى سپورت ءتۇرىنىڭ وركەندەۋىنە مەملەكەت تاراپىنان بارلىق جاعداي جاسالۋدا. حالىقارالىق تۋرنيرلەردە ەل نامىسىن لايىقتى قورعاپ جۇرگەن شاحماتشىلارىمىز از ەمەس. سپورتشىلارىمىزدىڭ جۋىردا ءۇندىستاندا وتكەن شاحمات وليمپياداسىنداعى جەتىستىكتەرى – سونىڭ ايقىن دالەلى. كوپتەگەن حالىقارالىق سپورت شەبەرلەرى قاتىساتىن «Atyrau Chess Festival-2022» دوداسى شاحمات ونەرىن ودان ءارى دامىتۋعا ۇلەس قوسادى دەپ سەنەمىن!» دەلىنگەن مەملەكەت باسشىسىنىڭ قۇتتىقتاۋىندا.
حالىقارالىق فەستيۆالدى ۇيىمداستىرعان ازيا جانە الەم چەمپيونى, حالىقارالىق گروسسمەيستەر دينارا سادۋاقاسوۆانىڭ ايتۋىنشا, وعان 300-گە جۋىق شاحمات اۋەسقويى قاتىسىپ جاتىر. ونىڭ ىشىندە قازاقستانمەن قوسا, اقش, نيدەرلاند, ليتۆا, ۋكراينا, تاجىكستان, وزبەكستان, بەلارۋس جانە رەسەي فەدەراتسياسى سەكىلدى ەلدەردىڭ ويىنشىلارى بار.
– حالىقارالىق العاشقى فەستيۆالدى قازاقستاندا شاحماتتى سپورت ءتۇرى رەتىندە تانىمال ەتۋ جانە دامىتۋ, سالاماتتى ءومىر سالتىن ناسيحاتتاۋ, سونداي-اق جاس سپورتشىلاردىڭ شەبەرلىگىن ارتتىرۋ, جاس تالانتتاردى ىزدەۋ ماقساتىمەن وتكىزىپ وتىرمىز. فەستيۆالدىڭ جۇلدە قورى 13 ميلليون تەڭگەدەن اسادى. سونىمەن قاتار قازاقستان-بريتانيا تەحنيكالىق ۋنيۆەرسيتەتى (قبتۋ) باكالاۆريات پەن ماگيستراتۋرادا وقۋعا گرانت بولەدى. گرانت يەگەرلەرىنىڭ ەسىمى ءتۋرنيردىڭ جابىلۋ سالتاناتىندا جاريالانادى, – دەدى د.سادۋاقاسوۆا.
اتىراۋ وبلىسىنىڭ اكىمى سەرىك شاپكەنوۆتىڭ پىكىرىنشە, العاش رەت وتكىزىلىپ جاتقان مۇنداي سايىس وسكەلەڭ ۇرپاقتى وتانسۇيگىشتىككە, سالاماتتى ءومىر سالتى قۇندىلىقتارىنا تاربيەلەۋ ۇدەرىسىنە وڭ اسەرىن تيگىزەدى. بۇل وڭىردە 1984 جىلى سپورت مەكتەپتەرىندە شاحمات ۇيىرمەسى اشىلعان. قازىر وبلىستا شاحمات سپورتىمەن 18 355 ادام شۇعىلدانادى. ونىڭ ىشىندە اۋىلدارداعى ۇيىرمەلەرگە 11 330 ادام بارىپ ءجۇر.
فەستيۆالگە كاسىبي سپورتشىلار مەن حالىقارالىق گروسسمەيستەرلەردەن بولەك, د.سادۋاقاسوۆانىڭ شاحمات اكادەمياسىنان 58 تاربيەلەنۋشى قاتىسىپ جاتىر. ماسەلەن, 6 جاسقا دەيىنگى كاتەگوريادا وبلىس چەمپيونى بولعان ءالي ساپاروۆ ەكى جىلدان استام ۋاقىت اتالعان اكادەميادا ءبىلىم العان. ول ەندى العاش رەت حالىقارالىق سايىستا باق سىناۋعا بەكىنگەن. تاعى ءبىر قاتىسۋشى – نۇرپەيىس ۇمبەتقاليدىڭ جاسى 13-تە. شاحمات اكادەمياسىندا تاجىريبەلى جاتتىقتىرۋشىلاردان ءدارىس العان ول رەسپۋبليكالىق جارىستا جەڭىسكە جەتكەن. ەندى ول دا ءبىرىنشى رەت حالىقارالىق شاحمات جارىسىندا باق سىناۋدى ماقسات ەتكەن.
اتىراۋدا حالىقارالىق شاحمات فەستيۆالى العاش رەت وتكىزىلىپ وتىرعانىنا قاراماستان, جارىسقا قاتىسۋشىلار ۇيىمداستىرۋ دەڭگەيىنە ريزاشىلىعىن ءبىلدىردى. «شىنىمدى ايتسام, تاڭدانىسىمدى جاسىرا الار ەمەسپىن. فەستيۆال جوعارى دەڭگەيدە ۇيىمداستىرىلعان. قازىر قازاقستاندا كوپتەگەن شاحمات ءتۋرنيرى وتكىزىلىپ ءجۇر. بۇل فەستيۆال ۇيىمداستىرۋ تۇرعىسىنان – ۇزدىكتەردىڭ ءبىرى», دەدى نۇر-سۇلتان قالاسىنان قاتىسىپ جاتقان حالىقارالىق شەبەر پاۆەل گنۋسارەۆ. ال اقش-تىڭ كولورادو شتاتىنان كەلگەن گروسسمەيستەر تيمۋر گارەەۆتىڭ پىكىرىنە سۇيەنسەك, «Atyrau Chess Festival-2022» – كەرەمەت فەستيۆال. مۇنداي سايىسقا قاتىسۋدىڭ ءوزى كوڭىلگە قۋانىش سىيلايدى.
الەمدىك دودالاردا توپ جارىپ, قازاقتىڭ داڭقىن اسىرعان گروسسمەيستەر دينارا سادۋاقاسوۆانىڭ ايتۋىنشا, ارقايسىسىنىڭ ناتيجەسى ايگىلى شۆەيتساريالىق جۇيەمەن باعالاناتىن ءۇش نەگىزگى ءتۋرنيردى وتكىزۋ كوزدەلگەن. شەبەرلىك ساباقتارى مەن ءبىر مەزگىلدە وتەتىن ويىن سەانستارى ۇيىمداستىرىلادى. بۇدان بولەك, فەستيۆال اياسىندا تورەشىلەر ەمتيحان تاپسىرىپ, FIDE تورەشىسى اتاعىن الاتىن حالىقارالىق اربيترلەردىڭ العاشقى سەمينارى وتەدى.
اتىراۋ وبلىسى
