جارىستىڭ العاشقى كۇنى «بارىس» ەكاتەرينبۋرگتىڭ «اۆتوموبيليسىنەن» وۆەرتايمدا 3:4 ەسەبىمەن ۇتىلدى. ماگنيتوگورسكىنىڭ «مەتاللۋرگى» نيجنەكامسكىنىڭ «نەفتەحيميگىنەن» باسىم ءتۇستى – 4:1. كەلەسى كۇنى جەڭىلگەن قوس كوماندا ءوزارا كۇش سىناستى. بۇل باسەكەدە جەرلەستەرىمىز قارسىلاستار قاقپاسىنا جاۋاپسىز ءۇش گول سوقتى – 3:0. «مەتاللۋرگ» «اۆتوموبيليستەن» ايلاسىن اسىردى – 2:1. ءسويتىپ, باس جۇلدەنىڭ تاعدىرى سوڭعى باسەكەدە شەشىلدى.
شەشۋشى ويىننىڭ ءبىرىنشى كەزەڭىندە ەسەپ اشىلعان جوق. ۇزىلىستەن كەيىن ويىن الما-كەزەك شابۋىلمەن ءوتتى. العاشقى شايبانى 28 مينۋتتا فيليپپ مايە سالىپ, «مەتاللۋرگتى» العا شىعاردى. ەسەسىنە اينالدىرعان بەس مينۋتقا جۋىق ۋاقىت ارالىعىندا ايدىن يەلەرى قاتارىنان ءۇش مارتە نىسانانى ءدال كوزدەدى. بۇل گولداردىڭ اۆتورلارى – دىنمۇحامەد قايىرجان, دجەرەمي براككو جانە ەنتوني لۋيس. ءۇشىنشى كەزەڭنىڭ بەل ورتاسىندا ۆالەري ورەحوۆ ەسەپ ايىرماشىلىعىن قىسقارتتى. بىراق ودان ارىگە قوناقتاردىڭ كۇش-جىگەرى جەتپەدى. وسىلايشا, 3:2 ەسەبىمەن جەڭىسكە جەتكەن «بارىس» ءوز تاريحىندا بەسىنشى رەت پرەزيدەنت كۋبوگىن ولجالادى. «مەتاللۋرگ» ەكىنشى ورىن السا, «اۆتوموبيليست» ءۇشىنشى ساتىعا تۇراقتادى. ال «نەفتەحيميك» كوش سوڭىندا قالىپ قويدى.
