ەردوعان الدىمەن پوتوتسكي سارايىندا ۋكراينا پرەزيدەنتى ۆلاديمير زەلەنسكيمەن كەزدەستى. تاراپتار ستراتەگيالىق سەرىكتەستىك دەڭگەيىندەگى تۇركيا-ۋكراينا قارىم-قاتىناستارىنىڭ بارلىق اسپەكتىسىن تالقىلادى. وسىدان كەيىن بۇۇ باس حاتشىسى انتونيۋ گۋتەرريشتىڭ قاتىسۋىمەن ۇشجاقتى كەزدەسۋ ءوتتى. نەبارى 40 مينۋتقا سوزىلعان كەزدەسۋ بارىسىندا ۋكرايناداعى قاقتىعىستان باستاپ, بىرقاتار ماڭىزدى ماسەلە تالقىلاندى.
زەلەنسكي بىرىككەن ۇلتتار ۇيىمىمەن كيەۆ-ماسكەۋ اراسىنداعى استىق كەلىسىمىنە مۇرىندىق بولعان ەردوعاننىڭ ۋكرايناعا ساپارىنا قۋانىشىن ءبىلدىرىپ, «تۇركيا پرەزيدەنتىنىڭ ۋكرايناعا ساپارى – مىقتى ەلدىڭ مىقتى قولداۋى» دەپ باعالادى. رەسەي-ۋكراينا قاقتىعىسى باستالعان 24 اقپاننان بەرى ۋكرايناعا العاش رەت بارعان پرەزيدەنت ەردوعان ورتاق ءباسپاسوز ءماسليحاتىندا: «ۋكراينانىڭ جەر تۇتاستىعى مەن ەگەمەندىگىن قولدايتىنىمىزدى تاعى ءبىر رەت اتاپ وتەيىن» دەپ ۇستانىمىن ايقىن كورسەتتى. ۋكراينا مەن رەسەي اراسىنداعى سوعىستىڭ ۇستەل باسىندا شەشىلەتىنىنە سەنىم بىلدىرگەن ەردوعان ديپلوماتيالىق پروتسەستى جانداندىرۋ ءۇشىن حالىقارالىق قاۋىمداستىقتىڭ كوبىرەك جاۋاپكەرشىلىك الۋى كەرەگىن العا تارتتى.
ۋكراينا پرەزيدەنتى لۆوۆتاعى كەزدەسۋدە رەجەپ تايپ ەردوعانمەن استىق كاسىپورنىن جاقسارتۋ مۇمكىندىگىن, زاپوروجە اەس-ى توڭىرەگىندەگى جاعدايدى جانە باسقىنشىلاردىڭ يادرولىق قارۋمەن بوپسالاۋىن, رەسەي ۋاقىتشا باسىپ العان ۋكراينا تەرريتورياسىنان استىقتىڭ ءىرى كولەمدە ۇرلانۋى سەكىلدى ماسەلەلەر تالقىلاعانىن ايتتى. تاراپتار قورعانىس سالاسىنداعى ىنتىماقتاستىق ماسەلەلەرىنە دە توقتالعان.
تۇركيانىڭ انادولى اگەنتتىگىنىڭ حابارلاۋىنشا, ۋكراينانىڭ قاقتىعىس كەزىندە قيراعان ينفراقۇرىلىمىن قالپىنا كەلتىرۋ ءۇشىن انكارا مەن كيەۆ اراسىندا كەلىسىمگە قول قويىلدى. كەلىسىم بويىنشا ەكى ەل اراسىندا قالپىنا كەلتىرۋ جۇمىستارىن جۇرگىزۋ ءۇشىن ارنايى جۇمىس توبى قۇرىلادى. ارنايى توپ ۋكرايناداعى جولدار, كوپىرلەر, سۋ جانە ەلەكتر ينفراقۇرىلىمى, اۋرۋحانالار مەن مەكتەپتەر سياقتى نىسانداردى قالپىنا كەلتىرۋ بويىنشا جۇمىستار اتقارادى.
كەلىسسوزدەردىڭ باستى تاقىرىپتارىنىڭ ءبىرى – جاھاندىق يادرولىق اپات قاۋپىن ارتتىراتىن زاپوروجە اتوم ەلەكتر ستانساسى توڭىرەگىندەگى اسكەري بەلسەندىلىك. بۇل تۋرالى ەردوعان ءباسپاسوز ءماسليحاتىندا: «زاپوروجە اتوم ەلەكتر ستانساسى توڭىرەگىندە جالعاسىپ جاتقان قاقتىعىستارعا الاڭداۋشىلىق بىلدىرەمىز. جاڭا چەرنوبىلدى باستان وتكەرگىمىز كەلمەيدى», دەدى.
ۋكراينا پرەزيدەنتى زەلەنسكي دە بەيسەنبى كۇنى بىرىككەن ۇلتتار ۇيىمىن زاپوروجە اتوم ەلەكتر ستانساسىنداعى قاۋىپسىزدىكتى قامتاماسىز ەتۋگە شاقىردى.
زەلەنسكي لۆوۆتا بۇۇ باس حاتشىسى گۋتەرريشپەن كەزدەسكەننەن كەيىن: «بۇۇ قاۋىپسىزدىكتى, وسى ستراتەگيالىق ورتالىقتى اسكەرلەردەن جانە رەسەي كۇشتەرىنەن تولىق بوساتۋدى قامتاماسىز ەتۋى كەرەك», دەدى. سونداي-اق ۋكراينا پرەزيدەنتى رەسەيلىكتەردىڭ نىسانعا جاساعان شابۋىلىن «ادەيى جاسالعان» دەپ سىنادى.
بىرىككەن ۇلتتار ۇيىمىنىڭ باس حاتشىسى گۋتەرريش رەسەي باسىپ العان زاپوروجە اتوم ەلەكتر ستانساسىنداعى جاعدايعا الاڭداۋشىلىق ءبىلدىرىپ, ول جەرگە جاسالعان كەز كەلگەن زالال «سۋيتسيد» بولاتىنىن جانە اسكەرلەردەن بوساتىلۋى كەرەگىن العا تارتتى.
تۇركيا پرەزيدەنتى ەردوعان ءباسپاسوز ءماسليحاتىندا تۇركيانىڭ ۋكرايناعا جاساعان گۋمانيتارلىق كومەگىنە دە ەرەكشە توقتالدى. «قاقتىعىس باستالعاننان بەرى ءبىز ۋكراين حالقىنىڭ شۇعىل گۋمانيتارلىق قاجەتتىلىكتەرىن قاناعاتتاندىرۋ ءۇشىن 98 جۇك كولىگى گۋمانيتارلىق كومەك جىبەردىك جانە 325 مىڭعا جۋىق ۋكرايندىقتى ۋاقىتشا ەلىمىزگە قابىلدادىق», دەدى ول.
سونىمەن قاتار ۇشجاقتى كەزدەسۋدە ۋكراينا-رەسەي قاقتىعىسىن ديپلوماتيالىق جولدارمەن توقتاتۋ ماقساتىندا ۋكراينا استىعىن الەمدىك نارىققا شىعارۋ ءۇشىن قۇرىلعان مەحانيزمنىڭ بەلسەندىلىگىن ارتتىرۋ ماسەلەسى جان-جاقتى تالقىلاندى.
گۋتەرريش بۇۇ-نىڭ قىس كەلمەي تۇرىپ ۋكراينادان استىق ەكسپورتىن ارتتىرعىسى كەلەتىنىن ايتتى. گۋتەرريش ۋكراينا مەن رەسەيدىڭ تۇركيا مەن بىرىككەن ۇلتتار ۇيىمىنىڭ اراسىندا جاسالعان استىق ەكسپورتى كەلىسىمىن ماقتاپ: «الداعى قىسقا قاراي وپەراتسيالارىمىزدى كەڭەيتۋ ءۇشىن بار كۇشىمىزدى سالامىز», دەدى.
ال بەيسەنبى كۇنى كيەۆ جاساعان مالىمدەمەدە استىق تاسىمالدايتىن 25-ءشى جۇك كەمەسى ۋكراينادان شىققانى تۋرالى اقپارات تارادى.
