ۆەنەسۋەلادا تۋىپ-ءوسىپ, كەيىننەن پيرەنەي تۇبەگىنە قونىس اۋدارعان 28 جاستاعى گاربينە ءوزىنىڭ سپورتتىق كارەراسىندا WTA دودالارىندا 10 مارتە دارا شىققان. 2016 جىلى رولان گارروس جانە 2017 جىلى ۋيمبلدوننىڭ باس جۇلدەسىن ولجالاپ, 2020 جىلى اۋستراليانىڭ اشىق بىرىنشىلىگىنىڭ فينالىندا وينادى. كەزىندە ونىڭ الەمدىك رەيتينگتە كوش باستاعانى دا ەسىمىزدە. بۇعان دەيىن ايتۋلى تەننيسشىلەر ءوزارا ەكى مارتە كۇش سىناستى. بىلتىرعى جىلدىڭ ماۋسىم ايىندا بەرليندە ۇيىمداستىرىلعان تۋرنيردە 6:4, 6:3 ەسەبىمەن يسپانيانىڭ وكىلى ۇتقان. ارادا ءبىر ايدان اسا ۋاقىت وتكەندە ەكى مىقتىنىڭ جولى توكيو وليمپياداسىندا قيىستى. ول باسەكەدە جەرلەسىمىزدىڭ جولى بولدى – 7:5, 6:1.
ەكىنشى كەزەڭدە ەلەنا رىباكينا وتە جاقسى ونەر كورسەتتى. العاشقى سەتتى ول 6:3 ەسەبىمەن اياقتاسا, ەكىنشىسى تاي-برەيككە دەيىن ۇلاستى. شەشۋشى تۇستا شيراق قيمىلداعان وتانداسىمىز بۇل باسەكەدە دە باسىمدىق تانىتتى – 7:6. بۇل ويىن 1 ساعات 15 مينۋتقا سوزىلدى. ءۇشىنشى اينالىمدا رىباكينا الەمنىڭ 28 راكەتكاسى, امەريكالىق ەليسون ريسكەمەن كەزدەسەدى.
