سپورت • 18 تامىز، 2022

مەدال سانى 70-تەن استى

48 رەت كورسەتىلدى

تۇركيادا ءوتىپ جاتقان V يسلام ىنتىماقتاستىعى ويىندارىندا قازاقستان سپورتشى­لارى­نىڭ جەڭىپ العان جۇلدەلەر سانى 70-تەن استى. ناقتىلاپ ايتساق، ازىرگە 19 التىن، 20 كۇمىس جانە 32 قولا مەدالدى ولجالادىق. الايدا وسى ناتيجەمەن بەسىنشى ورىننان جوعارىلاي الماي وتىرمىز.

قازاقستاننىڭ اۋىر اتلەتتەرى ءوز جانكۇيەر­لەرىن تاعى ءبىر قۋانتتى. بۇل جولى اسا اۋىر سالماقتا كۇش سىناسقان ايزادا ءمۇپتىلدا تاماشا ونەر كورسەتتى. قوسسايىستىڭ قورىتىندىسى بويىنشا 266 (116+150) كيلولىق زىلتەمىردى ەڭسەرگەن ول التىننان القا تاعىپ قانا قويماي، وسى ويىنداردىڭ رەكوردىن جاڭارتتى. ءدال وسى سالماقتا ونەر كورسەتكەن تاعى ءبىر جەرلەسىمىز – ليۋبوۆ كوۆالچۋك كۇمىس مەدالدى موينىنا ءىلدى. ونىڭ ناتيجەسى – 261 (114+147) كيلو. ال ونىڭ الدىندا عانا 102 كيلو سالماقتا سايىسقا تۇسكەن ارتەم انتروپوۆ تا (96 كيلو) ەكىنشى ورىنعا تۇراقتادى. وسىلايشا، وسى سپورت ءتۇرىن سەرىك ەتكەن ورەندەرىمىز بارلىق جاتتىعۋ تۇرلەرىن قوسا ەسەپتەگەندە 8 التىن، 15 كۇمىس جانە 3 قولا مەدالدى يەلەندى.

دزيۋدوشىلار دا ءوز بەلدەسۋلەرىن باستاپ كەتتى. وتانداستارىمىزدىڭ اراسىنان العاشقى بولىپ تاتاميگە شىققان قانات سەيىلحان (60 كيلو) قولا جۇلدەنى ەنشىلەدى. جالپى، وسى جارىسقا ءبىزدىڭ بالۋاندار مىقتى قۇرامدا اتتاندى. سول سەبەپتى دە الداعى ۋاقىتتا تاتامي شەبەرلەرى قورجىنىمىزدى تاعى بىرنەشە مەدالمەن تولىقتىرادى دەگەن ءۇمىت بار.

كەشە 100 مەترگە براسس ادىسىمەن جۇزۋدە ادەلايدا پچەلينتسەۆا قولا مەدال ەنشىلەدى. مارەگە 1 مينۋت 11،08 سەكۋندتا جەتكەن ول قوس تۇركيالىق – ۆيكتوريا زەينەپ گيۋنەش پەن حازال وكاننان عانا قالىپ قويدى. وسىدان بىرەر كۇن بۇرىن باتتەرفلياي ادىسىمەن جۇزۋدە ەڭ قىسقا قاشىقتىقتا سايىسقا تۇسكەن پچەلينتسەۆا باس جۇلدەنى ولجالاعان بولاتىن. 50 مەترلىك براسس سايىسىندا كسەنيا يگناتوۆا دا ءۇشىنشى ورىنعا تابان تىرەدى.

جالپى ەسەپتە جارىس قوجايىندارى جەكە-دارا كوش باستاپ تۇر. تۇركيالىقتاردىڭ قورجىنىندا 265 (106 التىن+89 كۇمىس+70 قولا) جۇلدە بار. 121 (43+30+48) مەدال ولجالاعان وزبەكستان قۇراماسى ەكىنشى ورىنعا كوتەرىلدى. يران ءۇشىنشى ساتىعا سىرعىپ ءتۇستى. پارسى ەلىنىڭ وكىلدەرى 116 (37+35+44) جۇلدەگە يەلىك ەتۋدە. ءتورتىنشى ورىنداعى ازەربايجان 71 (22+28+21) مەدالدى ەنشىلەۋدە.

سوڭعى جاڭالىقتار

ءرۋبلدى ساتىپ الۋ 31%-عا ءوستى

ەكونوميكا • بۇگىن، 15:23

ۇقساس جاڭالىقتار