مىنە, سودان بەرى ءتورت اي وتە شىعىپتى. وڭىردەگى جول قۇرىلىسىنىڭ جوسپارداعى مەرزىمىندە ورىندالماۋىنا كىنالىلەر جازالانىپ, ءبىراز باسشى جۇمىسىنان كەتتى. ۇكىمەت باسشىسى ءاليحان سمايىلوۆ باتىس قازاقستان وبلىسىنا جۇمىس ساپارىمەن كەلىپ, وڭىردەگى اۆتوجولدار جاعدايىن كوزىمەن كوردى.
اسىرەسە ماقالادا ايتىلعان بوكەي ورداسى مەن جانىبەك اۋداندارىنا اپاراتىن جولدىڭ قۇرىلىسىنا جان ءبىتىپ, ەكىنشى تىنىسى اشىلعانداي بولدى. قازتالوۆ – جانىبەك – رف شەكاراسى باعىتىنداعى جول قۇرىلىسىنىڭ 53-95 شاقىرىمىندا مەردىگەرلىك ەتكەن ADFstroy دەگەن «ۇلتاراق» كومپانيا جوبادان شەتتەتىلىپ, تەرگەۋ جۇرگىزىلۋدە. جولدىڭ بۇل بولىگىنە ەندى قايتا تەندەر ۇيىمداستىرىلىپ, جاڭا مەردىگەر تارتىلماق.
ال كۇرە جولدىڭ وزگە بولىكتەرىندە بۇگىندە قىزۋ جۇمىس ءجۇرىپ جاتىر ەكەن. مۇنى جاقىندا ءوز كوزىمىزبەن كورىپ قايتتىق.
100 شاقىرىم دايىن
اڭگىمەگە وزەك بولىپ وتىرعان قازتالوۆ – جانىبەك – رف شەكاراسى جانە ونەگە – بيسەن – سايقىن اۆتوجولىنىڭ جالپى ۇزىندىعى 248 شاقىرىمدى قۇرايدى. ورال قالاسىنان 500-600 شاقىرىم شالعايدا جاتقان بوكەي ورداسى مەن جانىبەك اۋداندارىن وبلىس ورتالىعىمەن جالعايتىن بۇل جولدىڭ ماڭىزى وتە ۇلكەن. باتىس قازاقستان وبلىسىنىڭ وڭتۇستىك اۋداندارى تۇرعىندارى بۇل جولدى تاۋەلسىزدىك العالى تالاپ ەتىپ كەلەدى. كوكتەم مەن كۇزدە جول ازابىن تارتىپ, مي بالشىققا باتاتىن جولاۋشىلار وسى ازاپتان قۇتىلاتىن كۇندى تاعاتسىزدانا كۇتۋدە.
– اۋا رايىنىڭ قولايسىز كۇندەرى جولاۋشىلار ەرەكشە قينالاتىن جول بولىگى – ونەگە مەن بيسەن اراسىنداعى 14 شاقىرىم, نۇرساي اۋىلى تۇسىنداعى 3-4 شاقىرىم ەدى. بۇل ايماقتىڭ توپىراعى سونداي, جاڭبىر مەن قار سۋىنان مي باتپاققا اينالىپ, بۇكىل كولىكتى تۇساپ تاستايتىن. قۇرىلىسشىلار جولدىڭ وسى بولىكتەرىنە ەرەكشە كۇش سالدى. ءسويتىپ, قازىردىڭ وزىندە بۇل جەرلەردە جول قۇرىلىسى نەگىزىنەن دايىن بولىپ قالدى. الداعى كۇزدە لايساڭ باستالعاندا ءدال وسى جەرلەردەن جولاۋشىلار قيىندىق كورمەي وتەدى, – دەيدى «قازاۆتوجول» ۇلتتىق كومپانياسى» اق-نىڭ باتىس قازاقستان وبلىسىنداعى فيليالىنىڭ ديرەكتورى قازبەك مامبەتوۆ.
جاقىندا عانا «قازاۆتوجول» ۇلتتىق كومپانياسىنىڭ ءباسپاسوز قىزمەتى ونەگە – بيسەن – سايقىن اۆتوجولىنىڭ ۇشتەن ءبىرى, ياعني 35 شاقىرىمى دايىن بولعانىن حابارلادى. 103 شاقىرىمدىق جول قۇرىلىسى 2 ۋچاسكەگە بولىنگەن, جۇمىستى وتاندىق كومپانيالار اتقارۋدا. پرەزيدەنت سىنىنان كەيىن بۇل جەردە دە جۇمىس شيراپ, 140-تان استام ارنايى تەحنيكا, 200-دەن استام جۇمىسشى جۇمىلدىرىلعان بولاتىن. مۇندا ەكى اسفالت-بەتون زاۋىتى كۇنى-ءتۇنى توقتاماي جۇمىس ىستەپ تۇر. رەسپۋبليكالىق مارتەبەلى جول 2023 جىلدىڭ سوڭىندا تولىعىمەن پايدالانۋعا بەرىلۋى كەرەك.
جول قۇرىلىسىن جوسپارعا ساي جانە ساپالى جۇرگىزىپ جاتقان كومپانيانىڭ ءبىرى – «Uniserf» جشس. قازتالوۆ – جانىبەك – رف شەكاراسى باعىتىنداعى جولدىڭ العاشقى 53 شاقىرىمى وسى مەكەمەنىڭ ەنشىسىندە. ونىڭ ۇستىنە 5 كوپىر, بىرنەشە مال وتكەلى سەكىلدى كۇردەلى قۇرىلىمدار دا جولدىڭ وسى بولىگىندە ورنالاسقان. بۇل بولىكتەگى قىزۋ جۇمىستى ءوز كوزىمىزبەن كوردىك. «Uniserf» كومپانياسى باس ديرەكتورىنىڭ ءوندىرىس جونىندەگى ورىنباسارى, باس ينجەنەر نيكولاي كوندوپۋلو ءبىزدى جول قۇرىلىسىنىڭ بارىسىمەن تانىستىرىپ شىقتى.
– كۇرە جولدى جوندەۋگە 90 تەحنيكا جۇمىلدىرىلعان. قۇرىلىس بريگادالارىندا ەكى اۋىسىممەن 164 ادام جۇمىس ىستەپ جاتىر. جۇمىسشىلاردىڭ 20 پايىزى – جەرگىلىكتى تۇرعىندار. ءبىزدىڭ كومپانياعا بەس كوپىردى جوندەۋ تاپسىرىلعان بولسا, قازىر ونىڭ ءبىرى دايىن بولىپ قالدى. ەكىنشىسىنىڭ قۇرىلىسى جاقىندا اياقتالادى. قالعان كوپىرلەردى دە رەتتەپ جاتىرمىز. جۇمىس كەستەگە ساي جۇرۋدە. تەك قانا ءبىر ۋايىمىمىز بار, ول – قۇرىلىس ماتەريالدارىنىڭ ۋاقتىلى جەتكىزىلۋى ماسەلەسى. بۇل – وسى جول بويىنداعى بارلىق مەردىگەردىڭ باس اۋرۋى. قازىر شيكىزاتتى جەتكىزىلگەن بويدا بىردەن پايدالانىپ جاتىرمىز. بيىل 18 شاقىرىم جولدى كۇردەلى جوندەۋگە ءتيىسپىز. سونىڭ 11 شاقىرىمى قازىردىڭ وزىندە قولدانىسقا بەرىلدى. جوسپار بويىنشا تامىز ايىندا قالعان 6 شاقىرىم جولعا اسفالت-بەتون قوسپاسىن قۇيىپ ۇلگەرۋىمىز كەرەك. بۇگىنگە دەيىن 2,5 شاقىرىم جول بولىگىنە قۇم-قيىرشىقتاس قوسپاسىن توسەدىك. بىرنەشە كۇندە اسفالت توسەۋدى باستايمىز, – دەدى نيكولاي يۆان ۇلى.
مىنە, وسىلايشا, قازىردىڭ وزىندە قازتالوۆ پەن جانىبەك, بوكەي ورداسى اراسىنداعى ءتۇرلى بولىكتە جالپى ۇزىندىعى 100 شاقىرىمداي جول جولاۋشىلاردىڭ پايدالانۋىنا جاراپ تۇر.
ۆاگون تاپشى بولماسا ەكەن
مەردىگەر كومپانيا وكىلى ايتقانداي, جول قۇرىلىسىنا قاجەتتى ماتەريالدىڭ تۇگەلگە جۋىعى وبلىس اۋماعىنان تىس جەردەن اكەلىنەدى. ولاردى وڭىرگە ۋاقتىلى جەتكىزۋ ءۇشىن تەمىرجول ۆاگوندارى كەرەك. مامانداردىڭ ايتۋىنشا, ءبىر شاقىرىم جول قۇرىلىسىنا قاجەتتى ءتۇرلى شيكىزات 104 ۆاگونعا جۇك بولادى ەكەن. ال ءبىز اڭگىمە ەتىپ وتىرعان رەسپۋبليكالىق جول قۇرىلىسى ءۇشىن بيىل جالپى سانى 12 مىڭ ۆاگون قاجەت بولادى. مىنە, قيىندىق وسى جەردەن تۋىنداپ وتىر.
– ۇكىمەتتىڭ قولداۋىمەن, «قازاقستان تەمىر جولى» ۇلتتىق كومپانياسى ايىنا ءبىزدى كەمىندە 500 ۆاگونمەن قامتاماسىز ەتۋگە ءتيىس. وسىنداي مەموراندۋمعا قول قويىلعان. الايدا ءبىز جول قۇرىلىسىن جوسپارعا ساي جۇرگىزۋىمىز ءۇشىن اي سايىن 1 500 ۆاگون شيكىزات, ينەرتتى ماتەريالدار پايدالانۋعا ءتيىسپىز. مىسالى, اقتوبەدەن اكەلىنەتىن قيىرشىق تاس ورالعا دەيىن 2 اپتا جول جۇرەدى. مەملەكەتتىك شەكارادان وتەدى. وسىنىڭ ءبارىن ەسكەرۋ قاجەت. ەگەر جول قۇرىلىسىنا قاجەتتى ماتەريالدار ۋاقتىلى جەتكىزىلمەسە, بيىلعى جوسپار ورىندالماي قالۋى دا مۇمكىن, – دەيدى قازبەك مامبەتوۆ.
ارينە, مەردىگەر كومپانيالار بۇل جاعدايدان حاباردار. جول قۇرىلىسىنىڭ العاشقى كۇنىنەن-اق تاپ بولعان ماسەلە بۇل. سوندىقتان دا بارىنشا قور جيناپ, ساقتىق قىلۋدا. «قازاۆتوجول» فيليالى ديرەكتورىنىڭ ايتۋىنشا, قازىرگى تاڭدا مەردىگەر كومپانيالاردىڭ قولىندا قۇرىلىس ماتەريالىنىڭ 45 پايىزى بار. كوڭىلگە مەدەۋ تۇتارلىعى, بيىل بيتۋم تاپسىرىسقا ساي ۋاقتىلى جەتكىزىلگەن.
الدا
جوسپار بويىنشا 2023 جىلدىڭ سوڭىندا قازتالوۆ – جانىبەك – رف شەكاراسى جانە ونەگە – بيسەن – سايقىن اۆتوجولى تولىعىمەن پايدالانۋعا بەرىلۋگە ءتيىس. قۇرىلىستىڭ قازىرگى قارقىنىنا قاراپ بۇعان سەنۋگە دە بولادى. ازىرگە جۇمىسى جۇرمەي, جولاۋشىلاردى جابىرقاتىپ تۇرعان – قازتالوۆ پەن جانىبەك اراسىنداعى 53-95 شاقىرىم ارالىعى. جوعارىدا ايتىلعانداي, وسى اۋماقتىڭ باس مەردىگەرى «تەمىرجول جوندەۋ» جشس-نا قاراستى ADFstroy كومپانياسىنىڭ جوسىقسىز ارەكەتى سالدارىنان كۇردەلى جوندەۋ توقتاپ قالدى. باس مەردىگەر جوبادان شەتتەتىلدى. بۇل بولىكتە ءالى كۇنگە جاڭا مەردىگەر انىقتالماعان. تاپسىرىس بەرۋشى ۇلتتىق كومپانيا مەملەكەتتىك ساتىپ الۋ بويىنشا ءۇشىنشى مارتە كونكۋرس جاريالاعان. ياعني ونەگە مەن نۇرساي اۋىلدارى ارالىعىنداعى 43,5 شاقىرىم جولدى جوندەيتىن مەردىگەر تامىز ايىندا عانا بەلگىلى بولماق. بۇل جەرگە بىلتىر 8 شاقىرىم عانا اسفالت-بەتون قوسپاسى توسەلگەن ەكەن. بيىل تەندەر ءوتىپ, مەردىگەر انىقتالعان كۇننىڭ وزىندە جاڭا كومپانيا بىردەن قۇرىلىسقا كىرىسىپ كەتە المايتىنى انىق.
مەردىگەر كومپانيا وكىلدەرىمەن اڭگىمە بارىسىندا جول قۇرىلىسىنا بولىنگەن قاراجات ماۋسىم ايىندا ۋاقىتىنان كەشىرەك بولىنگەنىن ەستىدىك. بۇل ءوز كەزەگىندە مەردىگەرلەردىڭ قاجەتتى ينەرتتى ماتەريالداردى دەر كەزىندە ساتىپ الۋىنا كەدەرگى بولعان. ارينە, مۇندايعا جول بەرۋگە بولمايدى.
بيىل قازتالوۆ – جانىبەك – رف شەكاراسى جانە ونەگە – بيسەن – سايقىن باعىتىنداعى كۇرە جولدى جوندەۋگە رەسپۋبليكالىق بيۋدجەتتەن 15 ملرد تەڭگە بولىنگەن ەكەن. جىل باسىنان بەرى سول قارجىنىڭ 6 ملرد تەڭگەسى يگەرىلگەن. باتىس قازاقستان وبلىسىنىڭ ءۇش اۋدانىندا ءجۇرىپ جاتقان جول قۇرىلىسىنا 600-گە جۋىق تەحنيكا مەن 700-دەي ادام تارتىلعان. جاقىندا «بەكەت ءسات جول» جشس جانىبەك اۋىلى مەن رف شەكاراسىنا دەيىنگى 7 شاقىرىم جولدى جوندەۋدى باستاپ كەتتى.
«قازاۆتوجول» ۇلتتىق كومپانياسى وبلىستىق فيليالىنىڭ ديرەكتورى قازبەك مامبەتوۆ چاپاەۆتان جالپاقتال باعىتىنا شىعاتىن بولىكتەگى 17 شاقىرىمدى كۇردەلى جوندەۋ ءۇشىن ەسەپ-قيساپ جوباسى جاسالاتىنىن ايتادى. وڭىردە ورال مەن اتىراۋ قالالارىن جالعايتىن رەسپۋبليكالىق جول بولىگىنىڭ وبلىستاعى بولىگىن كەڭەيتۋ, ءتورت جولاقتى جولعا اينالدىرۋ ماسەلەسى دە قولعا الىنباق. قازىر جوبالىق-سمەتالىق قۇجاتتارى قاتتالۋ ۇستىندە ەكەن.
مىنە, مەملەكەت باسشىسىنىڭ ءوزى باقىلاۋىنا الىپ وتىرعان كۇرە جول قۇرىلىسىنىڭ قازىرگى احۋالى وسىنداي. جول سالىپ جاتقان مەردىگەرلەر دە, تاپسىرىس بەرۋشى «قازاۆتوجول» ۇلتتىق كومپانياسى فيليالىنىڭ باسشىسى دا باتىسقازاقستاندىقتار ءۇشىن عاسىر جوباسىنا اينالعان كۇرە جولدى تەزىرەك بىتىرۋگە كۇش سالىپ جاتىر. ءبىز وسىنى كوردىك.
باتىس قازاقستان وبلىسى
