اقىن و.سۇلەيمەنوۆ «ءسوز سىرى» اتتى كىتابىن تانىستىردى

الماتى. 9 مامىر. الماتىداعى «عىلىم ورداسىندا» اقىن, جازۋشى, قوعام قايراتكەرى ولجاس سۇلەيمەنوۆتىڭ «ءسوز سىرى» («كود سلوۆا») اتتى جاڭا كىتابى تانىستىرىلدى. بۇل تۋرالى Tengrinews.kz ءتىلشىسى حابارلادى. اتالمىش كىتاپ و.سۇلەيمەنوۆتىڭ «مىڭ ءبىر ءسوز» («تىسياچا ي ودنو سلوۆو») اتتى ەتيمولوگيالىق سوزدىگىنىڭ العىسوزى ىسپەتتەس. ءبىلىم جانە عىلىم ءمينيسترى اسلان ءسارىنجىپوۆ جاڭا عىلىمي ەڭبەكتىڭ «از ي يا» سياقتى ناتيجەگە قول جەتكىزەتىنىنە سەنىم ءبىلدىردى. «بۇل كىتاپتىڭ ونىڭ 1975 جىلى العاشقى كىتابى – «از ي يا»-نى تانىستىرعان عىلىم اكادەمياسىندا جاريا ەتىلۋىنىڭ سيمۆولدىق ءمانى بار دەپ ويلايمىن», - دەدى مينيستر. «ءسوز سىرى» - ەتيمولوگيانىڭ پارمەندى ءادىسىن بايانداۋ, ياعني مەنىڭ 50 جىل بويعى زەردەلەۋىم بويىنشا سوزدەردىڭ شىعۋ توركىنىن انىقتاۋ», - دەدى ولجاس سۇلەيمەنوۆ. ول ارنايى سايتتىڭ كومەگىمەن ستۋدەنتتەردى وسى سالاعا مامانداندىرۋدى جوسپارلاپ وتىرعانىن ايتتى. جيىندا عالىمدار جاڭا ەڭبەك جونىندە ءوز ويلارىن ورتاعا سالدى. ولاردىڭ پايىمىنشا, كىتاپتىڭ وزەكتى قوعامدىق-ساياسي ءمانى بار جانە وقىرمانعا تاريح پەن تىلدەردىڭ شىعۋى تۋرالى جاقسى ماعلۇمات بەرەدى. «ليتەراتۋرنىي اليانس» قوعامدىق قورى قامقورشىلىق كەڭەسىنىڭ مۇشەسى اۋەلبەك توقجانوۆ ەتيمولوگيالىق سوزدىگىن تولىقتىرعىسى كەلەتىندەردى جازۋشىنىڭ سايتىنا كىرۋگە شاقىردى. «ءبىز ەتيمولوگيالىق سوزدىكتىڭ كىرىسپەسىن ورىس, قازاق, اعىلشىن جانە فرانتسۋز تىلدەرىنە اۋداردىق. وسى تىلدەردىڭ كەز كەلگەنى ارقىلى بۇل كىتاپپەن تانىسۋعا بولادى. ماقسات - الەم تىلدەرى سوزدىگىن قۇرۋ. كىتاپ ءتورت تىلدە ينتەراكتيۆتى رەجيمدە جۇمىس ىستەيتىن بولادى. ءبىز الەمدىك اۋديتوريادان كەرى بايلانىسقا قول جەتكىزگىمىز كەلەدى», - دەدى توقجانوۆ. ايتا كەتەيىك, بۇل پورتالدان «ءسوز سيپاتى» كىتابىنىڭ تولىق نۇسقاسىن جۇكتەپ الۋعا دا بولادى. بۇل سايتتا سۇلەيمەنوۆتىڭ جاڭا العىسوز جازىلعان «از ي يا» كىتابى دا بار. مۇرات ايتقوجا. دەرەككوز: Tengrinews.kz. فوتو: Tengrinews.kz.