«يسپانيا ۆۋەلتاسىنىڭ» 87 جىلدىق تاريحى بار. العاش رەت ول 1935 جىلى ۇيىمداستىرىلدى. بۇل جارىستا ەڭ كوپ ولجاعا كەنەلگەن – روبەرتو ەراس ەرناندەس. يسپانيانىڭ سالامانكا قالاسىنىڭ تۋماسى 2 000 جانە 2003-2005 جىلدارى ءتورت رەت باس جۇلدەنى ولجالادى. 2006 جىلى پيرەنەي تۇبەگىندە «استانا» كلۋبىنىڭ مۇشەسى الەكساندر ۆينوكۋروۆتىڭ كەرەمەت ونەر كورسەتكەنى بارشا جانكۇيەردىڭ جادىندا. قازاقستاندىق ۆەلوشاباندوز اتالعان باسەكەنىڭ ءۇش كەزەڭىندە شاشاسىنا شاڭ جۇقتىرماي, اقىرى جالپى ەسەپتە باس جۇلدەنى ولجالادى. سول ماۋسىمدا تاعى ءبىر وتانداسىمىز – اندرەي كاشەچكين دە اسقان شەبەرلىك تانىتىپ, ءۇشىنشى ورىندى يەلەنگەن ەدى. سونداي-اق 2008 جىلى «استانانىڭ» ساپىندا ونەر كورسەتكەن يسپانيالىق لەگيونەر البەرتو كونتادور دا قارسىلاسقا شاق كەلتىرمەدى.
2019-2021 جىلدارى جالاۋى جەلبىرگەن سوڭعى ءۇش جارىس نيدەرلاندتا ىرگەتاسى قالانعان «Jumbo-Visma» كلۋبى ساپىندا ونەر كورسەتىپ جۇرگەن 32 جاستاعى سلوۆەنيانىڭ ساڭلاعى پريموج روگليچتىڭ ايقىن جەڭىسىمەن اياقتالدى. 2019 جىلى ول شەشۋشى تۇستا الەحاندرو ۆالۆەردە (يسپانيا) مەن تادەي پوگاچاردان (سلوۆەنيا) وزسا, 2020 جىلى ماركس سولەر (يسپانيا) مەن دانيەل ءمارتيندى (يرلانديا) ارتقا تاستادى. بىلتىرعى ماۋسىمدا روگليچتەن كەيىنگى ورىنداردى ەنريك ماس (يسپانيا) پەن دجەك حەيگ (اۋستراليا) يەلەندى.
بيىلعى جىلى «استانا» كلۋبىنىڭ نامىسىن قازاقستاندىق الەكسەي لۋتسەنكو, ۆاديم پرونسكي, ەۆگەني فەدوروۆ, يتاليالىق ۆينچەنتسو نيبالي مەن سامۋەلە باتتيستەللا, كولۋمبيالىق ميگەل انحەل لوپەس پەن حارولد تەحادا جانە يسپانيالىق داۆيد دە لا كرۋز سىندى ساقا سپورتشىلار قورعايدى.
