وقيعا • 17 تامىز، 2022

جامبىل وبلىسىندا گەروين ساتقان تۇرعىن ۇستالدى

ەسىرتكى تۋرالى ءسوز بولا قالسا، وڭىرگە قاراستى شۋ اۋدانىن اڭگىمەگە ارقاۋ ەتەتىندەر از ەمەس. ءتىپتى، اڭگىمەنىڭ سوڭىن ازىلگە بۇرىپ جىبەرەتىندەر دە جەتىپ ارتىلادى. الايدا، ەسىرتكىگە ەسى كەتكەندەردىڭ قاراسى ءبىر وڭىردە از، ەندى ءبىر اۋداندا كوبىرەك كەزدەسەدى دەمەسەك، قاي جەردە دە بارشىلىق...

تابيعات مۇسىلمانقۇل

جامبىلدىق پوليتسەيلەر ەسىرتكىنىڭ ەڭ اۋىر تۇرلەرىنىڭ ءبىرى سانالاتىن گەروين ساتۋمەن اينالىسقان كۇدىكتىنى قولعا ءتۇسىردى. مامانداردىڭ ايتۋىنشا، ءدال وسى گەروين ادامداردى العاش تۇتىنعاننان-اق وزىنە تاۋەلدى ەتىپ تاستايدى ەكەن. دەرەكتەرگە سەنسەك، قولعا تۇسكەن كۇدىكتى وبلىس ورتالىعىندا ۇزاق ۋاقىت بويى گەروين زاتىن ساتۋمەن اينالىسىپ كەلگەن. پوليتسەيلەردىڭ كۇدىكتىنى ۇستاۋ وپەراتسياسىنىڭ بەينەجازباسى الەۋمەتتىك جەلىدە تاراپ كەتتى.

قۇزىرلى ورگان قىزمەتكەرلەرى كەلتىرگەن مالىمەتتەرگە سەنسەك، كۇدىكتىنىڭ تۇرعىلىقتى جەرىنە ءتىنتۋ جۇمىستارىن جۇرگىزۋ بارىسىندا 10 گرامم گەروين زاتى تاركىلەنىپتى.

«جەدەل-ىزدەستىرۋ شارالارى جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسى قىزمەتكەرلەرىنىڭ بەلسەندىلىگىمەن جۇزەگە اسقانىن ايتا كەتكەن ءلازىم. بۇل وپەراتسيا قر ۇلتتىق ۇلانىنىڭ №5513 اسكەري ءبولىمىنىڭ «بۇركىت» ارنايى ماقساتتاعى بولىنىسىمەن بىرلەسە ۇيىمداستىرىلعان «قاراسورا – 2022» رەسپۋبليكالىق ءىس-شاراسى اياسىندا وتكىزىلدى.

ۇستالعان ازامات قازىرگى كەزدە ءوز كىناسىن تولىق مويىنداپ، ۋاقىتشا ۇستاۋ يزولياتورىنا قاماۋعا الىندى.

قازىرگى ۋاقىتتا اتالعان دەرەككە قاتىستى قازاقستان رەسپۋبليكاسى قىلمىستىق كودەكسىنىڭ 297-بابى 3-بولىگى بويىنشا (ەسىرتكى زاتتارىن وتكىزۋ ماقساتىندا اسا ءىرى مولشەردە زاڭسىز ساقتاۋ) سوتقا دەيىنگى تەرگەۋ امالدارى باستالدى. بۇگىنگى كۇنى وسى قىلمىسقا قاتىسى بار باسقا دا تۇلعالاردى انىقتاۋعا باعىتتالعان بىرقاتار تەرگەۋ جۇمىسى جۇرگىزىلۋدە. اتالعان باپقا سايكەس كۇدىكتى 15 جىلعا دەيىنگى مەرزىمگە باس بوستاندىعىنان ايىرىلۋى مۇمكىن»، دەيدى جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى پوليتسيا پولكوۆنيگى اسقار جۇمابەكوۆ.