قۇرىلىسشىلار كۇنى اياسىندا قالادا تاعى 3 نىساننىڭ ىرگەتاسى قالاندى. سونىمەن قاتار قارماقشى اۋدانىنداعى تورەتام كەنتى مەن اقاي اۋىلىنا, ارال اۋدانىنداعى سەكسەۋىل كەنتىندە اۋىلىشىلىك گاز قۇبىرىن تارتۋ, شيەلى اۋدانى تارتوعاي ەلدى مەكەنىندە اۆتوماتتاندىرىلعان گاز تاراتۋ ستانساسىنىڭ قۇرىلىسى باستالدى.
وبلىس ورتالىعىندا قۇرىلىسى باستالعان نىساننىڭ ءبىرى – جاڭا ۇلگىدەگى نەكە سارايى. وبلىس اكىمى نۇرلىبەك نالىباەۆ وتباسىلىق ومىرگە جولداما بەرەتىن نەكە سارايىنىڭ حالىقارالىق جاستار كۇنى اياسىندا بوي كوتەرۋىن جاقسى ىرىمعا بالاپ, جولاشار تىلەگىن ايتتى.
– ءبىر قۋانتارلىعى, ايماعىمىزدا دەموگرافيالىق ءوسىم جىلدان-جىلعا جاقسارىپ, شاڭىراق كوتەرگەن جاستاردىڭ قاتارى ارتىپ كەلەدى. بيىل 6 ايدا 2 276 جۇپ نەكەگە تۇرىپ, وتباسىلىق ومىرگە قادام باستى. كەلەشەكتە نەكە سارايىندا وتباسى قۇندىلىقتارىن دارىپتەيتىن الەۋمەتتىك-مادەني ءىس-شارالار دا تۇراقتى تۇردە وتكىزىلەتىن بولادى, – دەدى وبلىس باسشىسى.
ءوڭىر باسشىسى كوپ الدىندا سويلەگەن سوزىندە استانا بولعان اقمەشىتتىڭ اجارىن كىرگىزگەن قۇرىلىسشىلار ەڭبەگىنە ايرىقشا توقتالدى. قازىر باسشىلىققا تۇرعىندار تاراپىنان ايتىلاتىن تالاپ-تىلەكتىڭ باسىمى قالادا زاماناۋي ساۋلەتتىك ۇلگىدەگى جاڭا نىساندار قاتارىن كوبەيتۋ بولىپ وتىر. وسىعان بايلانىستى جاسالعان جۇمىستار اياسىندا تۋعان توپىراعىنا جاناشىر مەتسەنات ازاماتتار بىرلەسە وتىرىپ, قۇنى 45 ملرد تەڭگەنى قۇرايتىن 391 نىساننىڭ جوباسى ازىرلەندى. بۇل باستامالار كەلەسى جىلدان باستاپ ىسكە اسادى. از ۋاقىتتىڭ ىشىندە وڭىرگە 20 ملرد تەڭگە ينۆەستيتسيا تارتىلدى.
سوڭعى 10 جىلدا وبلىستا 33 كلۋب, 6 مۋزەي, 1 مەملەكەتتىك ارحيۆ عيماراتى سالىنىپ, قازىر وڭىردە 409 مادەنيەت جانە ونەر مەكەمەسى حالىققا مادەني قىزمەت كورسەتىپ كەلەدى. كوپ ۇزاماي وسىلاردىڭ قاتارىنا 1 مىڭ ورىندىق ونەر ورتالىعى قوسىلادى. قۇنى
3,7 ملرد تەڭگە بولاتىن ەكى قاباتتى ونەر سارايى ءبىر جارىم جىلدا سالىنىپ بىتەدى. قۇرىلىسشىلار كۇنى ىرگەتاسى قالانعان ورتالىقتا كەلەشەكتە سيمفونيالىق, ەسترادالىق جانە ۇلتتىق ونەر باعىتىنداعى كونتسەرتتىك باعدارلامالار مەن ءتۇرلى فورماتتاعى قوعامدىق ءىس-شارالار وتكىزىلەدى.
سوڭعى جىلدارى سىردىڭ سول جاعالاۋىنان بوي تۇزەگەن تۇتاس ءبىر شاعىن اۋدان تاعى سول قۇرىلىسشىلار ەڭبەگىنىڭ جەمىسى ەكەندىگى داۋسىز. كەلەشەكتە بۇل اۋداننان قاسبەتتەرى زاماناۋي تالاپتارعا ساي كەلەتىن 7-9 قاباتتى تۇرعىن ءۇي, فيزيكا-ماتەماتيكالىق مەكتەپ عيماراتى بوي كوتەرمەك. بالالار جىلىنا تارتۋ رەتىندە «قازگەرمۇناي» كاسىپورنى وقۋشىلار سارايىن سالىپ بەرۋدى ءوز مىندەتىنە الدى.
وسى سول جاعالاۋدا ىرگەتاسى قالانعان قان ورتالىعى جىلىنا قان مەن ونىڭ كومپونەنتتەرىن دوناتسيالاۋ كورسەتكىشىن 500-دەن 10 مىڭعا دەيىن جەتكىزەدى دەپ جوسپارلانىپ وتىر. بۇل جوبا ءتيىستى مينيسترلىكتەرمەن تىعىز جۇمىس ىستەۋ ارقىلى رەسپۋبليكالىق بيۋدجەت ەسەبىنەن قارجىلاندىرىلادى. بارلىق قاجەتتى قۇرالمەن جابدىقتالعان قان ورتالىعى وبلىس حالقىنا ساپالى قىزمەت كورسەتىپ, ەكولوگيالىق ايماق تۇرعىندارىنىڭ دەنساۋلىعىن جاقسارتۋعا مۇمكىندىك بەرمەك.
كەلەر جىلى قونىس تەبۋشىلەر قاتارى كوبەيە باستاعان سول جاعالاۋدا ءبىر اۋىسىمدا 100 كەلۋشىگە ارنالعان ەمحاناسى بار 300 توسەكتىك ورىندىق كوپبەيىندى اۋرۋحانا قۇرىلىسى باستالادى.
وسى كۇنى قالاداعى جاڭا قونىس – بايتەرەك شاعىن اۋدانىندا سۋ جيناعىش قۇرىلعى قۇرىلىسى باستالدى. قۇنى
1 ملرد تەڭگەدەن اساتىن جوبا جەكە تۇرعىن ۇيلەردى تۇراقتى قىسىمدا ساپالى اۋىز سۋمەن قامتۋعا مۇمكىندىك بەرەدى. قۇرىلىس بارىسىندا 7 ۇڭعىما بۇرعىلانىپ, 3 رەزەرۆۋار سالىنادى.
قالا ورتالىعىندا ۇيىمداستىرىلعان سالتاناتتى جيىندا وبلىس اكىمى نۇرلىبەك نالىباەۆ سوڭعى 5 جىلدا تۇرعىن ءۇي قۇرىلىسى كولەمى 108 پايىزعا وسكەنىن اتاپ ءوتتى. بيىل «نۇرلى جەر» مەملەكەتتىك باعدارلاماسى اياسىندا 1 294 پاتەرلىك 31 تۇرعىن ءۇي قۇرىلىسىن سالىپ, جىل سوڭىنا دەيىن اياقتاۋ جوسپاردا بار.
قىزىلوردا وبلىسى
