كومەكشى قۇرىلعىلار تارتۋ ەتىلدى

ۇلى جەڭىس مەرەكەسى قارساڭىندا ۇلتتىق كاسىپكەرلەر پالاتاسى قولعا العان «ءومىر جولى» جوباسىنىڭ ارقا­­سىندا 150 ارداگەرگە شۇعىل جاعدايدا كومەك شاقىرۋعا ارنالعان قۇرىلعىلار تارتۋ ەتىلدى. ۇلتتىق كاسىپكەرلەر پالاتاسى قۇرىل­عىنى تانىستىرۋ ماقساتىندا ارنايى ءباسپاسوز ءماسليحاتىن ۇيىمداستىردى. وعان باسقارما توراعاسىنىڭ ورىنباسارى نۇرجان التاەۆ, «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ توراعاسى ومىرزاق وزعانباەۆ, «ءومىر جولى» جوباسىنىڭ وكىلى ءىلياس وماروۆ قاتىستى. ۇلتتىق كاسىپكەرلەر پالاتاسى باس­قارما توراعاسىنىڭ ورىنباسارى ن.التاەۆتىڭ ايتۋىنشا, پالاتا  بيىل بۇل قۇرىل­عىنى استانادا 100 جانە الماتى قالاسىندا تۇراتىن 50 ارداگەرگە تەگىن ورناتتى. سونداي-اق, ءبىر جىلعى قىزمەت اقىسىن وتەدى. بيزنەس-قاۋىمداستىق ۇلى جەڭىستىڭ 70 جىلدىعىنا وراي ەلىمىزدەگى سوعىس ارداگەرلەرىن اتالعان قۇرىلعىمەن تۇگەل قامتۋدى كوزدەپ وتىر. سونىمەن قاتار, بۇل جوبانى حالىقتى الەۋمەتتىك قورعاۋ جونىندەگى وڭىرلىك باعدارلامالارى ارقىلى قار­جىلاندىرۋ ۇسىنىلۋدا. اتاپ ايتساق, اقش, ەۋروپا ەلدەرىندە «SOS» تەتىگىن قولداناتىن ازاماتتاردىڭ 55 پايىزىنا قۇرىلعى مەملەكەت قارجىسى ەسەبىنەن ورناتىلادى ەكەن. «ءومىر جولى» الەۋمەتتىك-كوممەر­تسيالىق جوباسى سوعىس ارداگەرلەرى, ەگدە ازاماتتار مەن مۇمكىندىگى شەكتەۋلى, كومەككە اسا ءزارۋ جانداردى قولداۋ ماقساتىندا قۇرىلعان بولاتىن. ال وسى جوبا نەگىزىندە قولعا الىنىپ وتىرعان قوندىرعىلار ادامدارعا جەدەل كومەك شاقىرتۋعا وتە قولايلى قۇرال بولىپ وتىر. ارنايى تەتىكتى باسۋ ارقىلى ازاماتتار تاۋلىك بويى جۇمىس ىستەيتىن بىرىڭعاي كومەك ورتالىعىنىڭ قىزمەتىنە جۇگىنە الادى. الەمنىڭ دامىعان ەلدەرىندە مۇنداي قىزمەت 30 جىلدان بەرى كومەككە ءزارۋ ازاماتتارعا ءتيىمدى جۇمىس ىستەپ تۇر. وتكەن جىلى «ءومىر جولى» «Atameken Start-up» باي­قاۋىندا ۇزدىك جوبا اتانعان بولاتىن. دينارا بىتىكوۆا, «ەگەمەن قازاقستان».