سپورت • 16 تامىز، 2022

قىتايدان قالىپ قويدىق

34 رەت كورسەتىلدى

اقتاۋدا دزيۋدودان تۇرات جولدىباەۆتى ەسكە تۇسىرۋگە ارنالعان حالىقارالىق تۋرنير اياقتالدى. بۇل جارىستا جەرلەس­تەرىمىز 5 التىن، 7 كۇمىس جانە 13 قولا مەدال يەلەندى.

كاسپي جاعالاۋىندا وتكەن جارىسقا قازاقستانىڭ قوسالقى قۇرامداعى بالۋاندارى قاتىستى. سولاردىڭ اراسىنان سۇڭعات جۇباتقان (66 كيلو)، اسقار نارقۇلوۆ (73 كيلو)، ەرزات ارعىنوۆ (81 كيلو)، ەرقانات مولداعۇلوۆ (100 كيلو) جانە ەلامان ەرعاليەۆ (+100 كيلو) سۋىرىلىپ شىعىپ، باس جۇلدەنى ولجالادى. قالعان ەكى سالماقتا وزبەكستاندىق دوستون رۋزيەۆ (60 كيلو) پەن موڭعوليالىق مۋنحبايار باتتوگتوو (90 كيلو) توپ جاردى. فينالدا ەكەۋى دە ءبىزدىڭ دزيۋدوشىلاردان ايلاسىن اسىردى. ايەلدەر اراسىنداعى جارىس­تا قىتاي قۇراما كومانداسى مۇشەلەرىنىڭ مەرەيلەرى ۇستەم بولدى. ولار بارلىق جەتى سالماق دارەجەسىندە دارا شىقتى. تاياۋدا عانا ازيا چەمپيوناتىنىڭ قولا جۇلدەگەرى اتانعان ارۋنا جانكەلدينا اقتاۋدا كۇمىس مەدالدى موينىنا ءىلىپ، ءوز جانكۇيەرلەرىن تاعى ءبىر قۋانتتى. جالپى ەسەپتە قازاقستان قۇراماسى قىتايدى العا جىبەرىپ، ەكىنشى ورىندى يەلەندى.

تاعى ءبىر ايتا كەتەرلىك جايت، اتالعان جارىس ازيا كۋبوگى مارتەبەسىنە يە. سول سەبەپتى قاتىسۋشىلارعا رەيتينگتىك ۇپاي بەرىلەدى.

سوڭعى جاڭالىقتار

ۇقساس جاڭالىقتار