جالپى وڭىردە 14 پەن 29 جاس ارالىعىندا 124 مىڭعا جۋىق جاس بار, سونىڭ 31 پايىزى قالادا, 69 پايىزى اۋىلدىق جەرلەردە تۇرادى. بيىل جاستاردىڭ جوعارى ءبىلىم الۋعا قولجەتىمدىلىگىن ارتتىرۋ جانە ولاردى وڭىردە سۇرانىسقا يە اۋىل شارۋاشىلىعى, تەحنيكالىق, تۋريستىك, مەديتسينالىق جانە پەداگوگيكالىق ماماندىقتارعا وقىتۋ ماقساتىندا وبلىس اكىمىنىڭ 90 گرانتى ءبولىندى. وبلىستىق ءبىلىم باسقارماسىنىڭ ايتۋىنشا, وسى 90 گرانتتىڭ 65-ءى از قامتىلعان وتباسىلارىنىڭ بالالارىنا بەرىلەدى.
قوعامدىق دامۋ باسقارماسىنىڭ مالىمەتىنە قاراعاندا, وبلىستا الەۋمەتتىك ءالجۋاز توپتاعى جاستاردىڭ جوبالارىن ىسكە اسىرۋعا باعىتتالعان Zhas project شاعىن گرانتتار كونكۋرسى وتەدى. كونكۋرس شەڭبەرىندە ءاربىر قاتىسۋشىعا قايتارىمسىز 1 ملن تەڭگەگە دەيىن بەرىلەدى. وندا جالپى 63 جوبا قارالىپ, 63 ملن تەڭگە بولىنگەن.
وسى جىلدىڭ 1 تامىزىنداعى مالىمەت بويىنشا كاسىپكەرلىكتى دامىتۋ جونىندەگى 2021-2025 جىلدارعا ارنالعان ۇلتتىق جوبا شەڭبەرىندە جۇمىسپەن قامتۋدىڭ بەلسەندى ءىس-شارالارىنا 4 585 جاس تارتىلىپتى. سونداي-اق 2 961 ادام جۇمىسقا ورنالاستىرىلدى, سونىڭ 1 253-ءى تۇراقتى جۇمىسقا تۇردى.
جاستاردى ناقتى قولداۋ ءىس-شارالارىنىڭ ءبىرى – «ديپلوممەن – اۋىلعا!» جوباسى. بۇل جوبانىڭ حالىققا بەرەر پايداسى مول, اسىرەسە اۋىلدىڭ الەۋەتىن كوتەرەدى. بۇگىندە 266 مامانعا 81,5 ملن تەڭگە كولەمىندە كوتەرمە جاردەماقى, ال 143 مامانعا 650,9 ملن تەڭگەگە بيۋدجەتتىك نەسيە بەرىلگەن. ولار ەندى اۋىل-ايماقتاردا جۇمىس ىستەيدى.
ءوڭىر شەڭبەرىندە «جاسىل ەل» باعدارلاماسىن ىسكە اسىرۋ جالعاسىپ جاتىر. باعدارلاما بويىنشا 635 جاساقشىنى جۇمىسقا ورنالاستىرۋ جوسپارلانىپ, وعان 70 ملن تەڭگە قاراستىرىلعان. سونىمەن قاتار وبلىستا بولاشاق جاس ۇرپاق ءۇشىن جارقىن باستاما بولاتىن «ۇلت تاربيەسى» اتتى جاڭا جوبا جۇزەگە اسىرىلدى. اتالعان جوبانىڭ «ومىرلىك باعدار» باعىتى بويىنشا ءبىلىم, جۇمىسپەن قامتۋ, ىشكى ساياسات سالالارىنىڭ بىلىكتى ماماندارىنان اقپاراتتىق-ناسيحات توبى قۇرىلدى. ونىڭ مۇشەلەرى وبلىستىڭ اۋدان, قالالارىنداعى مەكتەپتەردىڭ 9-11 سىنىپ وقۋشىلارى مەن NEET ساناتىنداعى جاستارعا كاسىپتىك باعدار بەرۋ تۋرالى تۇسىندىرمە جۇمىستارىن جۇرگىزدى. جوبا اياسىندا ماماندىق تاڭداۋ, تۇلەكتەرگە ارنالعان گرانتتار, قىسقا مەرزىمدى وقىتۋ كۋرستارى جانە جاستارعا ارنالعان مەملەكەتتىك باعدارلامالار مەن جوبالار جايلى كەڭىنەن ءتۇسىندىرىلدى. بۇل ىستە وبلىس بويىنشا 630 مەكتەپ, 63 534 وقۋشى, اتا-انالارى مەن 10 مىڭنان استام مۇعالىم قامتىلدى.
جاستاردى قولجەتىمدى تۇرعىن ۇيمەن قامتاماسىز ەتۋ ماقساتتا «جەتىسۋ جاستارى: 0-5-25» باعدارلاماسى ازىرلەنىپ جاتىر. باعدارلامانى ىسكە اسىرۋعا بارلىعى ءبىرىنشى كەزەكتە 40 قاتىسۋشىعا 400 ملن تەڭگە ءبولىندى. باعدارلامانىڭ نەگىزگى شارتتارى بويىنشا باستاپقى جارنا ءنول پايىز, قارىز بويىنشا سىياقى مولشەرلەمەسى 5 پايىز, ال نەسيە مەرزىمى 25 جىلعا دەيىن سوزىلادى. باعدارلاما 2023 جىلى ىسكە قوسىلادى دەپ جوسپارلانىپ وتىر.
اۋدان, قالالاردا قۇرىلعان «باقىت» كلۋبتارى جاستار اراسىندا وتباسى ينستيتۋتىن نىعايتۋعا بەلسەنە اتسالىسىپ كەلەدى. ونداعى پسيحولوگتەر جىل باسىنان بەرى 700-گە جۋىق اداممەن اڭگىمەلەسىپ, كاسىبي كەڭەستەر بەردى. سونىڭ ناتيجەسىندە 95 جاس وتباسى اجىراسۋدان باس تارتقان. جاستاردىڭ ۆولونتەرلىك قوزعالىستارى بارعان سايىن قانات جايىپ كەلەدى. وبلىستا 4 800-دەن اسا ەرىكتى تىركەلگەن, 49 ۆولونتەرلىك ۇيىم بار. جىل باسىنان بەرى ولار 2 200-دەن اسا ءتۇرلى اكتسيا وتكىزگەن.
«جاستار – قوعامنىڭ كرەاتيۆتى, بەلسەندى مۇشەسى. سوندىقتان العا نىق قادام باسىپ, جاڭا قۇرىلعان جەتىسۋىمىزدى, جالپى ەلىمىزدى دامىتۋعا ءبارىمىز اتسالىسۋىمىز كەرەك. 2019 جىلدى پرەزيدەنت «جاستار جىلى» دەپ جاريالاعان بولاتىن, مۇنان سوڭ 2020 جىل – «ۆولونتەر جىلى» دەپ بەلگىلەندى. بۇل ءبىز ءۇشىن ۇلكەن قولداۋ بولدى. بيىل حالىقارالىق جاستار كۇنىنەن ەرەكشە ءمان بەرىلىپ جاتىر. بۇل جاس ۇرپاقتىڭ الدىنان كوپتە-
گەن مۇمكىندىكتەردىڭ اشىلۋىنا ىقپال ەتەدى دەپ سەنەمىن. ءبىز ءوز تاراپىمىزدان ارتىلعان سەنىمدى اقتاۋعا بار كۇش-جىگەرىمىزدى جۇمسايمىز», دەيدى وبلىستىق ۆولونتەرلەردىڭ Birgemiz فرونت-كەڭسەسىنىڭ جەتەكشىسى جانەركە بەكسەيىتوۆا.
جاستاردىڭ بوس ۋاقىتىن ءتيىمدى ۇيىمداستىرۋ دا ۇمىت قالمايدى. جالپى, جىل باسىنان بەرى وسى ماقساتتا 12 مىڭداي ءىس-شارا وتكىزىلگەن. سول سياقتى قىركۇيەك ايىنىڭ باسىندا تەكەلى قالاسىندا جاستارعا قىزمەت كورسەتۋ ورتالىعى اشىلادى دەپ جوسپارلانىپ وتىر. جەتىسۋ ايماعىندا 11 جاستار رەسۋرستىق ورتالىعى جۇمىس ىستەيدى, سونىڭ ىشىندە 10-ى – اۋداندىق, قالالىق فيليال.
جەتىسۋ وبلىسى
