رەسپۋبليكالىق «بايگە» فەدەراتسياسى مەن قوستانايداعى ۇلتتىق ات سپورتى فەدەراتسياسى ۇيىمداستىرعان ايتۋلى سپورت شاراسىندا قازاقتىڭ ەجەلدەن كەلە جاتقان قىز قۋ, تەڭگە الۋ, اۋدارىسپاق, كوكپار ويىندارى مەن الامان, قۇنان جارىستارى ۇيىمداستىرىلدى. بايگە دەسە «ىشكەن اسىن جەرگە قوياتىن» كوپشىلىك جانكۇيەردىڭ دەلەبەسىن قوزدىرعان شاشاسىنا شاڭ جۇقپاس جۇيرىكتەردىڭ جۇلدە قورىن «Olimpbet» بۋكمەكەرلىك كەڭسەسى تاعايىندادى. بايگەنىڭ جالپى جۇلدە قورى – 16 ملن تەڭگە, جارىس ناتيجەسىندە, بەس بىردەي جۇلدەلى ورىنعا اقشالاي سىيلىقتار تابىس ەتىلدى.
تۇلپارلار تىزگىن جىبەرمەس بۇرىن جينالعان سپورتسۇيەر كوپشىلىكتى وبلىستىق دەنە شىنىقتىرۋ جانە سپورت باسقارماسىنىڭ باسشىسى قايىرجان ەسىمتاەۆ, وڭىردەگى ات سپورتى فەدەراتسياسىنىڭ ۆيتسە-پرەزيدەنتى نۇربول ءابدىراحمانوۆ, ۇلتتىق ات سپورتى تۇرلەرى قاۋىمداستىعىنىڭ اتقارۋشى ديرەكتورى راحات جاقسىباي قۇتتىقتاپ, اتالعان شارانىڭ باستى ماقساتى قوستاناي جىلقىسىن ناسيحاتتاۋ ەكەنىن, بۇگىندە وسى تۇقىمدى كوبەيتۋ جولدارى قاراستىرىلىپ جاتقانىن ايتتى.
– بيىل ەلىمىزدە ات سپورتىنا, سونىڭ ىشىندە بايگەگە ەرەكشە كوڭىل ءبولىنىپ وتىرعانى قۋانتادى. بۇعان دەيىن بايگەدەن ەل چەمپيوناتى مەن كۋبوگى ءبىر مەزەتتە ءوتىپ كەلدى. ودان كەيىن شاعىن بايگەلەر بولماسا, ءىرى جارىستار وتە قويمايتىن. ال ۇلتتىق سپورتتىڭ دامۋىنا سونى سەرپىن بەرەتىن مۇنداي ءىس-شارالار ءبىر دەمەۋشىنىڭ قولداۋىمەن جان-جاقتى ۇيىمداستىرىلعانىن بۇرىن-سوڭدى كورە الماي كەلدىك. مۇنى اتبەگىلەر مەن ات يەلەرى دە ايتىپ, ريزاشىلىقتارىن ءبىلدىرىپ جاتىر, – دەدى وبلىستىق ات سپورتى فەدەراتسياسىنىڭ ۆيتسە-پرەزيدەنتى نۇربول ءابدىراحمانوۆ.
سونىمەن 10 شاقىرىمدا سىنعا تۇسكەن 19 قۇنان اراسىنان قاراعاندى وبلىسىنان كەلگەن جاندوس ىرزىقباەۆتىڭ ۇكىلەپ قوسقان جۇيرىگى تايفۋن اتتى ارعىماق قاتارىنان قارا ءۇزىپ, جەڭىمپاز اتاندى. تايفۋننىڭ قوستاناي تۇقىمى ەكەنىن ەستىگەن جۇرت «وي, ءپالى!» دەسىپ, ءسۇيسىنىسىپ جاتتى. ال ون التى شاقىرىمدىق توپ بايگەدە 20 جۇيرىكتەن سۋىرىلىپ العا شىققان الماتىلىق تەلقوڭىرعا تالايلار تاڭداي قاعىپ جاتتى.
بايگەنىڭ ەڭ شەشۋشى كەزەڭى جيىرما ەكى شاقىرىمعا كەتەتىن الاماندا 22 جۇيرىكتىڭ اراسىنان سۋىرىلىپ شىققان اباي وبلىسىنان كەلگەن جارقىن تەمىرباەۆتىڭ نارقىزىلى مارەنى ءبىرىنشى كەسىپ ءوتتى. الامان باستالعاندا بىرنەشە اينالىم بويى الماتى قالاسىنىڭ سايگۇلىگى زابالەتتو الدىنا قارا تۇسىرمەي كەلىپ ەدى, بىراق «باق شابا ما, باپ شابا ما, ات شابا ما» دەمەكشى, مارە جاقىنداعاندا نارقىزىل باسىپ وزىپ, 4 ملن تەڭگەنىڭ باس بايگەسىن قانجىعاسىنا بايلادى.
توبىل ءتورىن دۇبىرلەتكەن دۇلدۇلدەردى تىزگىندەگەن شاباندوزداردىڭ دا ەڭبەگى ەرەكشە ەكەنىن ايتا كەتكەن ءجون. مىسالى, قاراعاندى وبلىسىنان كەلگەن ميرلان نۇربولات تاقىمىنداعى تۇلپارىنىڭ تىنىسىن تاقىمىمەن سەزەتىن تاجىريبەلى شاباندوزدىڭ ءوزى ەكەن. شىناشاقتاي بولسا دا, بۇعان دەيىن دە تالاي ءدۇبىرلى باسەكەلەردە تۇلپار ءمىنىپ, توپ جارعان ميرلان قوستانايدا دا ءوز بيىگىنەن كورىنىپ, ارالاس تۇقىمدى بايگەدە دە, الاماندا دا ەكىنشى ورىنعا يە بولدى.
– مەنىڭ جالپى اتقا دەگەن قىزىعۋشىلىعىم سول ءسابي كەزىمنەن-اق باستالدى. 9 جاستان بەرى تۇلپار تىزگىندەپ, شاباندوز بولىپ كەلەم. ەڭ باستىسى, مۇنداي ۇلكەن الامانداردا استىڭداعى اتتىڭ كۇشىن سارقىپ الماۋ كەرەك, – دەيدى جاس شابوندوز.
وكىنىشكە قاراي, بابى كەم بولدى ما, ايتەۋىر ءبىر اينالىمنان, ەكى اينالىمنان كەيىن جارىس جولىنان شىعىپ قالىپ جاتقان اتتار بولدى.
– بۇل ەندى ۇلكەن الامان بولعاننان كەيىن اتقا دا, اتتىڭ يەسىنە دە وبال. ەندى الداعى بايگەلەرگە جاقسى دايىندىقپەن كەلگەن دۇرىس, – دەيدى باستان-اياق ءىس-شارانى جۇرگىزىپ, ۇيىمداستىرۋ شارالارىنىڭ باسى-قاسىندا جۇرگەن ۇلتتىق ونەر جاناشىرى قىدىربەك قيىسحان.
جالپى, بايگە وتە جوعارى دەڭگەيدە ءوتتى. ءبىر ەرەكشەلىگى, وزگە وڭىرلەردەن ارنايى كەلگەن جانكۇيەرلەر كوپ بولدى. سولاردىڭ ءبىرى – اتىراۋ قالاسىنان كەلگەن بەلگىلى اتبەگى شاڭىراق ەرمەكباەۆ اعامىز كوپشىلىككە باتاسىن بەرىپ, سايگ ۇلىكتەردىڭ سۇرىنبەي شابۋىنا تىلەكتەستىك ءبىلدىردى.
شارانى ۇيىمداستىرۋشىلاردىڭ ايتۋىنشا, الداعى ۋاقىتتا وڭىردە قوستاناي تۇقىمدى ارعىماقتار مەن قوستاناي بۋداندارىنا عانا ارنالعان 20 شاقتى بايگە وتكىزۋ جوسپارلانعان. ال ەل چەمپيوناتىنىڭ ەندىگى كەزەڭدەرى پاۆلودار مەن نۇر-سۇلتان قالالارىندا ءوتىپ, سوڭى قازان ايىندا الماتى قالاسىندا قورىتىندىلانادى.
قوستاناي وبلىسى
