شيەلى اۋدانى جەرىندە كولىك اپاتىنان 10 ادام قازا تاپتى

قىزىلوردا. 7 مامىر. بۇگىن تاڭعى ساعات 9-دار شاماسىندا «باتىس ەۋروپا- باتىس قىتاي» تاس جولىنىڭ شيەلى اۋدانى, تارتوعاي ەلدى مەكەنى ماڭىندا جول اپاتى ورىن الىپ, ول 10 ادامنىڭ ءومىرىن ءۇزىپ كەتتى. بۇل تۋرالى قىزىلوردا وبلىستىق ىشكى ىستەر دەپارتامەنتى ءباسپاسوز قىزمەتىنىڭ دەرەگىنە سىلتەمە جاساعان egemen.kz ءتىلشىسى حابارلادى. اپات وڭتۇستىك قازاقستان وبلىسىنا قاراي بەت العان «مەرسەدەس سپرينتەر» شاعىن اۆتوبۋسى مەن قىزىلوردا قالاسىنا كەلە جاتقان «تويوتا لاند كرۋزەر پرادو» اۆتوكولىگى ءبىر-بىرىمەن بەت-بەت سوقتىعىسۋى ناتيجەسىندە ورىن العان. مالىمەت بويىنشا, ەكى كولىكتە بارلىعى 19 ادام وتىرعان. بۇلاردىڭ اراسىنان 10 جولاۋشى, ونىڭ ىشىندە ەكى كولىكتىڭ دە جۇرگىزۋشىلەرى قازا تاپقان. بۇلاردان باسقا, اۋىر جارالانعان 6 ادام اۋداندىق اۋرۋحاناعا, 2 ادام وبلىستىق مەديتسينا ورتالىعىنا جەدەل جەتكىزىلدى. كولىك اپاتى تۋرالى اقپارات كەلىپ تۇسكەن بەتتە وقيعا ورنىنا بىردەن قۇرامىندا نەيروحيرۋرگ, تراۆماتولوگ, حيرۋرگ جانە باسقا دا دارىگەرلەر بار 2 وبلىستىق جانە 2 اۋداندىق رەانيموبيل باردى. بۇدان بولەك, اپات ورنىندا توتەنشە جاعدايلار دەپارتامەنتى مەن ىشكى ىستەر دەپارتامەنتىنىڭ ماماندارى جانە تەحنيكالارى جۇمىس ىستەۋدە. وبلىس اكىمىنىڭ تاپسىرماسىمەن ونىڭ ورىنباسارى نۇرجان الىباەۆ پەن شيەلى اۋدانىنىڭ اكىمى قايراتبەك سارسەنباەۆ وقيعا ورنىنا بارىپ, ءتيىستى ورگان باسشىلارىنىڭ قاتىسۋىمەن شۇعىل شتاب وتىرىسىن وتكىزدى. قازىر جول كولىك وقيعاسىنا بايلانىستى قىلمىستىق ءىس قوزعالىپ, سەبەپتەرى انىقتالۋ ۇستىندە. قۇرىش نۇرىمبەت. دەرەككوز: قىزىلوردا وبلىستىق ىشكى ىستەر باسقارماسىنىڭ ءباسپاسوز قىزمەتى. فوتو: www.pro-goroda.ru.