ماسەلەن, سوڭعى ون جىلدا جىلىوي اۋدانىنىڭ ورتالىعى – قۇلسارى قالاسىنىڭ ينفراقۇرىلىمىن دامىتۋعا شامامەن 10 ملرد تەڭگە قارالىپتى. الايدا اتالعان مونوقالادا بىرقاتار پروبلەما ءالى شەشىمىن تاپپاي وتىر.
– قۇلسارى قالاسىندا سۋمەن قامتۋ مەن جول ماسەلەسى وتكىر تۇر. جالپى شاھاردىڭ ينفراقۇرىلىمىن جاقسارتۋعا جەتكىلىكتى قاراجات ءبولىنىپ جاتىر. بۇل قالانىڭ ەڭ وزەكتى پروبلەمالارىن بىرتىندەپ شەشۋگە مۇمكىندىك بەردى, – دەيدى ب.وماربەكوۆ.
مينيستر ورىنباسارىنىڭ ايتۋىنشا, قۇلسارى قالاسىندا ەڭبەك نارىعى مەن شاعىن جانە ورتا بيزنەستى دامىتۋعا قاتىستى تەرىس ۇردىستەر ءالى جويىلماي كەلەدى. مۇندا جۇمىسپەن قامتىلعان ادامداردىڭ سانى از. قۇرىلىس جۇمىستارىنىڭ كولەمى تومەندەگەن.
جىلىوي اۋدانىنىڭ اكىمى جۇمابەك قاراجانوۆتىڭ پىكىرىنە قاراعاندا, ينفراقۇرىلىمداردى دامىتۋ مەن الەۋمەتتىك نىساندار سالۋعا قاتىستى بىرنەشە جوبانى ىسكە اسىرۋ جوسپارلانىپ وتىر. ونىڭ ىشىندە قۇلسارى قالاسىندا ەمحانالار مەن بالاباقشالار, مەكتەپتەر, تۇرعىن ۇيلەر, سۋ قۇبىرلارى مەن جول سالۋ كوزدەلگەن.
اتىراۋ وبلىسىنىڭ الەۋمەتتىك-ەكونوميكالىق دامۋىنىڭ كەشەندى جوسپارىن ىسكە اسىرۋعا ارنالعان كەڭەسكە قاتىسقان ءمينيستردىڭ ورىنباسارى بىرنەشە ۇسىنىس بەردى. ەڭ باستىسى, بيىلعا جوسپارلانعان ءىس-شارالاردى ساپالى ورىنداۋ.
قازىر اتىراۋ قالاسىنداعى بالىقشى شاعىن اۋدانىنان زاروسلىي اۋىلى ارالىعىنداعى اۆتوموبيل جولىن قايتا جاڭعىرتۋ جۇمىسى جالعاسىپ جاتىر. جولدىڭ جالپى ۇزىندىعى – 5,7 شاقىرىم. جاڭعىرتۋ جۇمىستارىنىڭ ناتيجەسىندە جول ساپاسىن, كولىك قاتىناسىن جاقسارتۋعا مۇمكىندىك بەرەدى. جالپى قۇنى 3,6 ملرد تەڭگەنى قۇرايتىن جوبا وسى جىلدىڭ سوڭىنا دەيىن اياقتالادى.
ال ماحامبەت اۋدانىنىڭ ورتالىعى – ماحامبەت اۋىلىندا 600 ورىندىق مەكتەپ-ينتەرناتتىڭ قۇرىلىسى قولعا الىنعان. جاڭا ءبىلىم ۇياسىن الداعى جىلدىڭ ءساۋىر ايىندا پايدالانۋعا بەرۋ جوسپارلانعان. جوباعا سايكەس, جاڭا مەكتەپتە فۋتبول الاڭى, باسكەتبول, ۆولەيبول, گيمناستيكا جانە تەننيسكە ارنالعان سپورت زالدارى قاراستىرىلعان.
اتىراۋ وبلىسى
