بۇل رەتتە قازاقستان ازاماتتارىنىڭ ۇلتتىق بىرەگەيلىگىن قالىپتاستىرۋ, ەتنوسارالىق جانە دىنارالىق كەلىسىمدى ساقتاۋ, ونوماستيكا پروبلەمالارىن شەشۋ جۇمىستارى ەرەكشە ماڭىزعا يە بولىپ وتىرعان سولتۇستىك جانە شىعىس وڭىرلەردە اكىمدەردىڭ الەۋمەتتىك ماسەلەلەر جونىندەگى ورىنباسارلارى ءھام «يدەولوگتەر» قىسقارتۋعا ىلىكپەگەن بولار دەگەن وي كەلگەن. الايدا پاۆلودار وبلىسىندا عانا سولاي بولىپ شىقتى. وسى ءوڭىردىڭ ىشكى ساياسات باسقارماسىن باسقارعان, اۋدان اكىمى, پارلامەنت ءماجىلىسىنىڭ دەپۋتاتى بولعان تاجىريبەلى باسشى ايزادا قۇرمانوۆا وبلىس اكىمىنىڭ ورىنباسارى رەتىندە الەۋمەتتىك-ساياسي سالالارعا تولىقتاي جەتەكشىلىك جاساۋىن جالعاستىرىپ ءجۇر ەكەن.
ال ەلدىڭ شەتىندەگى, جەلدىڭ وتىندەگى سولتۇستىك قازاقستان وبلىسىندا ءوڭىر باسشىسىنىڭ ىشكى ساياسات پەن الەۋمەتتىك سالانىڭ كوكەيكەستى ماسەلەلەرىن شەشۋمەن جاپ-جاقسى اينالىسىپ, جەرگىلىكتى جۇرتقا جاققان ەكى ورىنباسارىنىڭ ەكەۋى دە قىسقارتىلىپ, ولاردىڭ فۋنكتسيالارى ءوز كرەسلولارىن ساقتاپ قالعان ارىپتەستەرىنە ءبولىنىپ بەرىلىپتى. ءبىرىنشى ورىنباسار, نەگىزگى ماماندىعى اگرونوم مارات تاسماعامبەتوۆ بۇرىننان جەتەكشىلىك جاساپ كەلە جاتقان اۋىل شارۋاشىلىعىنا قوسا, ىشكى ساياسات جانە ءبىلىم بەرۋ سالالارىنا دا جاۋاپ بەرەتىن بولىپتى. قۇرىلىس, كولىك, تۇرعىن ءۇي-كوممۋنالدىق شارۋاشىلىق سالالارىمەن اينالىسىپ كەلگەن ورىنباسار, ينجەنەر ءساتجان ابلاليەۆ ەندى جۇمىسپەن قامتۋ, الەۋمەتتىك قورعاۋ, كوشى-قون ماسەلەلەرىنە دە جەتەكشىلىك جاساپ ءجۇر. يندۋستريالىق-يننوۆاتسيالىق دامۋمەن جانە كاسىپكەرلىكتى دامىتۋمەن شۇعىلداناتىن ورىنباسار, ەكونوميست داۋرەن جانداربەكوۆتىڭ فۋنكتسيالارىنا دەنساۋلىق ساقتاۋ, مادەنيەت, ءتىل ساياساتى جانە ارحيۆ سالالارىنا جەتەكشىلىك جاساۋ قوسىلىپتى.
قوستاناي وبلىسىندا دا اكىمنىڭ الەۋمەتتىك ماسەلەلەر جونىندەگى ورىنباسارى قىسقارتىلىپتى. وسىعان بايلانىستى ىشكى ساياسات, جۇمىسپەن قامتۋ, الەۋمەتتىك قورعاۋ, كوشى-قون, مادەنيەت ماسەلەلەرى بۇرىن قۇرىلىس, تۇرعىن ءۇي-كوممۋنالدىق شارۋاشىلىق, كولىك سالالارىنا جەتەكشىلىك جاساعان ءبىرىنشى ورىنباسار, نەگىزگى ماماندىعى اگرونوم عاۋەز نۇرمۇحامبەتوۆكە قوسا جۇكتەلىپتى. سونداي-اق دەنساۋلىق ساقتاۋ, ءبىلىم بەرۋ, دەنە شىنىقتىرۋ جانە سپورت سالالارىنا جەتەكشىلىك ەتۋ ەكونوميكا جانە قارجى ماسەلەلەرىمەن اينالىسىپ جۇرگەن ورىنباسار, ەكونوميست ەرلان سپانوۆقا مىندەتتەلىپتى.
اقمولا وبلىسىندا دا اكىمنىڭ الەۋمەتتىك ماسەلەلەر جونىندەگى ورىنباسارى قىسقارتۋعا ۇشىراپتى. الايدا ونىڭ فۋنكتسيالارى كىمگە تاپسىرىلعانىن وبلىستىق اكىمدىكتىڭ رەسمي سايتىنان بىلە المادىق. بۇل ماسەلەنى وبلىس اكىمى ءالى شەشكەن جوق پا, الدە, ونىڭ ءباسپاسوز قىزمەتى ءتيىستى اقپاراتتى جاريالاۋدى ەستەن شىعاردى ما – ول جاعى بىزگە بەيمالىم.
شىعىس قازاقستان وبلىسى اكىمدىگىنىڭ رەسمي سايتىنا قاراعاندا, ءوڭىر باسشىسىنىڭ بەس ورىنباسارىنىڭ بەسەۋى دە ازىرگە ءدىن امان ءجۇر. قايسىلارى قىسقارتىلاتىنىن الداعى ۋاقىت كورسەتەدى.
وسى ورايدا ءبىر ەسكەرەرلىك جايت: ەگەمەن رەسپۋبليكامىزدىڭ اتالعان بەس وبلىسىنا ء«بىز رەسەيدى قالاي كوركەيتەمىز؟» دەگەن ارانداتۋشىلىق ماقالاسىندا كوز الارتقان اتىشۋلى الەكساندر سولجەنيتسىننىڭ ساياسي ساندىراعىن تەلەارنالار مەن الەۋمەتتىك جەلىدە بىرىنەن سوڭ ءبىرى داۋرىعا قايتالاپ جۇرگەن رەسەيلىك ساياساتكەرسىماقتاردىڭ كوزدەگەنى – ەلىمىزدىڭ سولتۇستىك جانە شىعىس وڭىرلەرىندە سەپاراتيستىك كوڭىل كۇيدى ءورشىتۋ ەكەنى انىق. وسىنداي ناسيحاتقا ەرىپ, سولتۇستىك قازاقستان وبلىسىن رەسەي فەدەراتسياسىنا قوسۋعا اشىق تۇردە شاقىرعان پەتروپاۆل قالاسىنىڭ ەرلى-زايىپتى ەكى تۇرعىنى سەپاراتيستىك ءىس-قيمىلدارى ءۇشىن جاقىندا عانا سوت ۇكىمىمەن بەس جىلعا باس بوستاندىعىنان ايىرىلدى. دەمەك قازىرگى الماعايىپ زاماندا قازاقستانعا جاسالىپ جاتقان ءارتۇرلى اقپاراتتىق شابۋىلعا تويتارىس بەرۋ ءۇشىن ەلىمىزدە, اسىرەسە ونىڭ سولتۇستىك جانە شىعىس وڭىرلەرىندە قوعامدىق-ساياسي جۇمىستاردى شيراتا ءتۇسۋ قاجەتتىگى داۋسىز. مىنە, وسى تۇرعىدان قاراعاندا, وزدەرىنىڭ «يدەولوگ» ورىنباسارلارىن قىسقارتىپ جاتقان وبلىس اكىمدەرىمەن كەلىسۋ قيىن.
