بقو ەڭبەك ينسپەكتسياسى باسقارماسىنىڭ باسشىسى اسىلۇلان دوسجانوۆ وڭىرلىك كوممۋنيكاتسيالار قىزمەتى الاڭىندا وتكەن بريفينگىدە وتكەن جىلدىڭ 7 ايىندا 32 جازاتايىم وقيعا بولعانىن ايتتى.
ونىڭ ايتۋىنشا, بيىل جازاتايىم وقيعالاردان 39 ادام زارداپ شەكسە, سونىڭ 20-سى اۋىر دەپ باعالاندى. 9 ادام توپتىق وقيعادان جاراقات الدى. جازاتايىم وقيعالاردان 10 جۇمىسشى قازا تاپتى, بۇل وتكەن جىلعىدان 60 پايىزعا كوپ.
«سونىڭ ىشىندە 5 ادام قۇرىلىس سالاسىنداعى كاسىپورىنداردا قايتىس بولدى. ءتورت جۇمىسشى بيىكتىكتەن قۇلاسا, بىرەۋى جەردىڭ وپىرىلۋى سالدارىنان كوز جۇمدى», دەدى باسقارما باسشىسى.
سونىمەن قاتار جول-كولىك وقيعاسىنان جانە قوزعالاتىن, ۇشاتىن, اينالاتىن زاتتار مەن بولشەكتەردىڭ سوعۋىنان بيۋدجەتتىك ۇيىمنىڭ 3 قىزمەتكەرى مەرت بولدى.
اۋىل شارۋاشىلىعى سالاسىندا 2 قىزمەتكەر كوز جۇمدى. ونىڭ بىرەۋى جۇمىس ورنىنان شىعىپ, بەلگىسىز جاعدايدا ءشوپ ۇساقتاعىشقا ءتۇسىپ قالعان. 1 جۇمىسشىنى تسەحقا تيەۋ ايماعىندا تراكتور جۇرگىزۋشىسى ارتقا بەرگەنىندە بايقاماي باسىپ كەتكەن.
«جازاتايىم وقيعالارعا جۇرگىزىلگەن ارنايى تەرگەپ-تەكسەرۋ ناتيجەسى كورسەتكەندەي, نەگىزگى سەبەپتەر – جۇمىستىڭ تيىسىنشە ۇيىمداستىرىلماۋى, قىزمەتكەرلەردى جەكە قورعانىس قۇرالدارىمەن قامتاماسىز ەتپەۋ, ەڭبەكتىڭ قاۋىپسىز تاسىلدەرىنە وقىتۋدىڭ جەتكىلىكسىزدىگى, سونداي-اق زارداپ شەگۋشىلەردىڭ وزدەرىنىڭ ورەسكەل ابايسىزدىعى. تاعى ءبىر اتاپ وتەتىن جايت, جۇمىس بەرۋشىلەر قىزمەتكەرلەردى ەڭبەك قاۋىپسىزدىگى جانە ەڭبەكتى قورعاۋ ماسەلەلەرى بويىنشا وقىتۋ, نۇسقاۋ بەرۋ, بىلىمدەرىن تەكسەرۋدى جۇرگىزبەيدى. قىزمەتكەرمەن ەڭبەك شارتىن جاساسپاي, جۇمىسقا جىبەرەدى, جۇمىس ورىندارىندا جانە تەحنولوگيالىق پروتسەستەردە جازاتايىم وقيعالاردى بولدىرماۋ ماقساتىندا الدىن الۋ شارالارىن جۇرگىزبەيدى. وعان قوسا, جازاتايىم وقيعالار جاسىرىن قالىپ جاتادى», دەدى ا. دوسجانوۆ.
