قازاقستان • 10 تامىز، 2022

قىتاي مەن وزبەكستانعا رەيستەر سانى ارتتى

33 رەت كورسەتىلدى

قازاقستاندىق اۋە كومپانيالار قىتاي مەن وزبەكستانعا رەيستەر سانىن ارتتىراتىن بولدى، دەپ حابارلايدى Egemen.kz يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتىنە سىلتەمە جاساپ.

يندۋستريا جانە ينفراقۇرىلىمدىق دامۋ مينيسترلىگىنىڭ «اشىق ساعات الاڭىنداعى» كەزەكتى جيىنىندا اۋە تاسىمالىنداعى وزەكتى ساۋالدار تالقىلاندى.

بەينەبايلانىس رەجيمىندە وتكەن جيىندا «ەير استانا»، «SCAT اۋە كومپانياسى» جانە «Qazaq Air» سىندى وتاندىق اۆياكومپانيالاردىڭ وكىلدەرى پاندەمياعا بايلانىستى توقىراۋعا ۇشىراعان حالىقارالىق تۇراقتى اۋە جەلىلەرىن قايتا قالپىنا كەلتىرۋ جانە ۇشۋ گەوگرافياسى اۋماعىن كەڭەيتۋ بارىسىنداعى ءىس-شارالاردى اتاپ ءوتتى.

اۋە كومپانيالارى وكىلدەرىنىڭ ايتۋىنشا، بۇگىندە ۇشۋدى قايتا قالپىنا كەلتىرۋ جۇمىستارى جۇيەلى جۇزەگە اسىرىلۋدا.

بۇگىندە حالىقارالىق اۋە تاسىمالى 28 مەملەكەتكە 115 باعىت بويىنشا اپتاسىنا 518 جيىلىكتە ورىندالادى. اۋە قاتىناسى ورنىقتى جولعا قويىلعان ەلدەر قاتارىنا ازەربايجان، ارمەنيا، بەلارۋس، ۇلىبريتانيا، گەرمانيا، گرەتسيا، ەگيپەت، ءۇندىستان، يران، يتاليا، كاتار، قىتاي، كۋۆەيت، قىرعىزستان، مالديۆ ارالدارى، موڭعوليا، نيدەرلاندى، ءباا، پولشا، رف، ساۋد ارابياسى، تاجىكستان، تايلاند، تۇركيا، وزبەكستان، چەحيا جانە وڭتۇستىك كورەيا كىرەدى.

قازاقستاندىق اۆيا تاسىمالداۋشىلار 2022 جىلدىڭ العاشقى جارتىجىلدىعىندا حالىقارالىق اۋە جەلىلەرى ارقىلى 1،2 ملن جولاۋشى تاسىمالداعان. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 60 پايىزعا جوعارى (0،7 ملن).

قر يدم ازاماتتىق اۆياتسيا كوميتەتى وتاندىق اۋە تاسىمالداۋشى كومپانيالارعا ۇشۋ گەوگرافياسى اۋماعىن كەڭەيتۋدى تالاپ ەتۋدە. قازىر بۇل تاراپتا بىرقاتار جۇمىس اتقارىلۋدا. اتاپ ايتقاندا، پاكىستانمەن اۋە قاتىناسىن ورناتۋ بويىنشا جۇمىستار جۇرگىزىلۋدە. سونداي-اق سۇرانىستىڭ ارتۋىنا بايلانىستى قازاقستان، وزبەكستان جانە قىتايدىڭ بىرقاتار قالاسىنا جاڭا باعىتتار اشۋ كوزدەلگەن. دەسە دە جولاۋشىلار سۇرانىسىن ءتيىستى دەڭگەيدە قاناعاتتاندىرۋ مۇمكىن بولماي وتىر.

ماسەلەن، كارانتيندىك شەكتەۋلەرگە بايلانىستى بۇگىندە قىتايعا اپتاسىنا 3 رەيس قانا جاسالادى. ال پاندەمياعا دەيىن 40-تان استام اۋە تاسىمالى جۇزەگە اسىرىلاتىن. ءوز كەزەگىندە سۇرانىستىڭ ارتۋى بيلەت باعاسىنا دا ءوز اسەرىن تيگىزۋدە.

ء«بىز قىتايدىڭ ازاماتتىق اۆياتسيا بيلىگىنە رەيس سانىن ارتتىرۋ بويىنشا بىرنەشە رەت سۇرانىس حات جولدادىق. سونىمەن قاتار جاڭا اۋە باعىتتارى مەن رەيستەر سانىن كوبەيتۋ بويىنشا وزبەكستاندىق ارىپتەستەرىمىزگە دە ۇسىنىس بىلدىردىك. جۋىق ارادا قىتاي، وزبەكستان جانە پاكىستاننىڭ اۆياتسيا بيلىگىنە اتالعان ماسەلەلەردى جەدەل شەشۋگە ىقپال ەتۋدى قايتا سۇرايمىز»، دەدى ازاماتتىق اۆياتسيا كوميتەتى توراعاسىنىڭ ورىنباسارى سالتانات تومپيەۆا.

سوڭعى جاڭالىقتار

ۇقساس جاڭالىقتار