سپورت • 10 تامىز، 2022

سوفيادان ولجالى ورالدى

29 رەت كورسەتىلدى

بولگاريانىڭ باس شاھارى – سوفيادا ۇيىمداستىرىلعان تاەكۆوندودان جاس­تار اراسىنداعى الەم چەمپيوناتى ءوز مارەسىنە جەتتى.

نۇربولات جاڭبىروۆ جەتەكشىلىك ەتەتىن قازاقستان جاستار قۇراماسى الەمدىك سىندا ەكى كۇمىس جانە ءتورت قولا مەدال جەڭىپ الدى. ءبىر اپتاعا جالعاسقان دۇنيەجۇزىلىك باسەكەدە قىزدار اراسىندا ونەر كورسەتكەن ايدانا سۇندەتباي (46 كيلو) مەن ەرلەر اراسىندا جارىس جولىنا شىققان تەمىرلان تىلەۋلەس (51 كيلو) باس جۇلدە ءۇشىن وتكەن فينالدىق جەكپە-جەكتەردە وڭتۇستىك كورەيا سپورتشىلارىنا ەسە جىبەرىپ، الەم بىرىنشىلىگىنىڭ كۇمىس جۇلدەگەرلەرى اتاندى.

سونىمەن قاتار ەرلەر قۇراماسىنىڭ وكىلدەرى اسەت ىزعاليەۆ (48 كيلو)، جاۆوحيرحون يسلاموۆ (55 كيلو)، الىبەك شايكەنوۆ (59 كيلو) جانە باتىرحان تىلەۋعالي (59 كيلو) سوفيادا قولا جۇلدەگە قول جەتكىزدى. ايتا كەتەيىك، دۇنيەجۇزىلىك دوداعا الەمنىڭ 90 ەلىنەن كەلگەن 811 سپورتشى باق سىنادى. قازاقستان قۇراماسىنان 20 سپورتشى ونەر كورسەتكەن بولاتىن.

سوڭعى جاڭالىقتار

ۇقساس جاڭالىقتار