بيىل ەكىنشى جىل قاتارىنان وتكىزىلىپ جاتقان جارىستا قازاقستاندىق كانوەشى ءانۋار اكچۋرين دا ونەر كورسەتىپ, تولايىم تابىسقا قول جەتكىزدى. ول بىلتىرعى اقش اشىق بىرىنشىلىگىنە دە قاتىسىپ, ءبىر التىن جانە ءتورت كۇمىس مەدال ولجالاپ, ۇزدىكتەر قاتارىنان كورىنگەن بولاتىن. بيىلعى جارىس تا وتانداسىمىز ءۇشىن تابىستى اياقتالدى. جەرلەسىمىز بۇل جولى ەكى قاشىقتىق بويىنشا جارىستىڭ باس جۇلدەسىن جەڭىپ الدى. سونداي-اق ءبىر مارتە مارەگە ەكىنشى جەتىپ, كۇمىسپەن كۇپتەلدى.
اتاپ ايتار بولساق, 200 مەتر قاشىقتىققا جارىسۋدا ءانۋار اكچۋرين اقش سپورتشىسى گەۆين روسسپەن بىرگە جۇپ قۇراپ, جارىس جەڭىمپازى اتاندى.
ال 500 مەترگە تورتتىك كانوە ەسۋدە تاعى دا اقش سپورتشىلارىمەن بىرگە الدىنا جان سالماسا, 200 مەتر قاشىقتىققا جەكەلەي جارىستا ەكىنشى بولدى.
22 جاستاعى وتانداسىمىز – ەلورداداعى №4 بالالار مەن جاسوسپىرىمدەردىڭ مامانداندىرىلعان وليمپيادالىق رەزەرۆ سپورت مەكتەبىنىڭ (بايداركا مەن كانوە ەسۋ سەكتسياسى) تۇلەگى. سپورتتىڭ بۇل تۇرىمەن 2011 جىلدان بەرى اينالىسىپ كەلە جاتقان وتانداسىمىز 2017-2019 جىلدارى 1 000, 500 جانە 200 مەتر قاشىقتىقتاردا قازاقستان چەمپيوناتىنىڭ بىرنەشە دۇركىن جۇلدەگەرى اتانىپ, 2016 جىلى وزبەكستاندا وتكەن جاستار اراسىنداعى ازيا كۋبوگىندا توپ جارعان. سونداي-اق ول بىرقاتار حالىقارالىق تۋرنيردە ەل قورجىنىنا جۇلدە سالعان. اتاپ ايتقاندا, ءانۋار 2018 جىلى سلوۆاكيانىڭ پيشتان قالاسىندا ۇيىمداستىرىلعان حالىقارالىق تۋرنيردە 200 مەترگە ەسۋدە ءبىرىنشى ورىن السا, ءدال سول جىلى بولگاريادا وتكەن جاستار اراسىنداعى الەم چەمپيوناتىنىڭ كۇمىس جۇلدەسىن ولجالادى. سونىمەن قاتار ول 500, 200 مەتر قاشىقتىقتا ازيانىڭ ەكى دۇركىن جەڭىمپازى اتانعان.
بايداركا مەن كانوە ەسۋ بويىنشا حالىقارالىق دارەجەدەگى سپورت شەبەرى دەگەن اتاعى بار ءانۋار اكچۋرين بۇل كۇندەرى اقش-تىڭ Florida Institute of Technology ۋنيۆەرسيتەتىندە ءبىلىم الادى.
