وڭىردە سانيتارلىق جاعداي جانە ەلدى مەكەندەردەگى قاتتى تۇرمىستىق قالدىقتاردى ۋاقىتىندا شىعارۋ ماسەلەسى وزەكتى.
ماڭعىستاۋدىڭ تاريحي-مادەني جانە تابيعاتى كورىكتى جەرلەرىن تۋريستەر دە, تۇرعىندار دا تاماق قالدىقتارىمەن لاستاپ جاتىر. سوڭعى ۋاقىتتا وبلىس ورتالىعىنىڭ تۇرعىندارى تاراپىنان تۇسەتىن قوقىستىڭ جينالۋىنا قاتىستى شاعىمداردىڭ سانى دا ايتارلىقتاي ءوستى.
تۇرمىستىق قالدىقتاردىڭ ۋاقىتىندا شىعارىلماۋى قالاعا جاقىن ماڭدا ورنالاسقان مۇنايلى اۋدانى جانە تۇپقاراعان اۋدانىنا قاراستى اقشۇقىر اۋىلىنىڭ تۇرعىندارىن دا الاڭداتىپ وتىر.
«ەلدى مەكەندەردىڭ سانيتارلىق جاعدايى الاڭداتارلىق ماسەلە. اقتاۋ قالاسىنىڭ لاستانۋىنا جول بەرۋگە بولمايدى. Tەلەگرام چاتقا تۇسەتىن شاعىمداردىڭ كوپشىلىگى قوقىس جيناۋ جانە شىعارۋ ماسەلەسىمەن بايلانىستى. قالدىقتاردى ۋاقتىلى جيناماۋ قالانىڭ كوركى مەن تۇرعىنداردىڭ دەنساۋلىعىنا كەرى اسەرىن تيگىزەدى. بۇل قالا اكىمى جۇمىسىنىڭ دۇرىس ۇيىمداستىرىلماۋىنىڭ ناتيجەسى», دەپ اتاپ ءوتتى نۇرلان نوعاەۆ.
جۇمىستى دۇرىس ۇيىمداستىرماعانى ءۇشىن ايماق باسشىسى اقتاۋ قالاسىنىڭ اكىمىنە, ونىڭ ورىنباسارىنا جانە تۇكش ءبولىمىنىڭ باسشىسىنا سوگىس جاريالادى.
