«قازاقستاندىق فيلمدەردى ءبىزدىڭ ەلدە كورسەتۋگە ارقاشان دايىنبىز. قازاقتىڭ تۋىندىلارى ابىرويلى حالىقارالىق كينوفەستيۆالدەردە جەڭىسكە جەتكەندە دە شىنايى قۋانامىز. ءبىزدىڭ تاراپ سەرىكتەستىككە اشىق جانە جاقىن ارادا قازاقستاندا قىرعىز كينوسىنىڭ كۇندەرىن وتكىزۋدى جوسپارلاپ وتىرمىز», دەدى ت.وكەەۆ اتىنداعى «قىرعىزفيلم» ۇلتتىق كينوستۋدياسىنىڭ ديرەكتورى اقجول بەكبولوتوۆ.
قازاق كينوسىنىڭ كۇندەرى اياسىندا ۇلتتىق كينونى قولداۋ مەملەكەتتىك ورتالىعى حالىقارالىق ءبولىمىنىڭ باسشىسى اسەل ىرىس, رەجيسسەر بولات قالىمبەتوۆ, پروديۋسەر ديانا اشيموۆا, اكتەر تولەپبەرگەن بايساقالوۆ جانە تاعى باسقا دا دەلەگاتسيا مۇشەلەرى ش.ايتماتوۆ اتىنداعى كينو ۇيىندە بولدى. وندا ورتالىقتىڭ قىزمەتى تانىستىرىلىپ, سوڭىنان دوڭگەلەك ۇستەل دە وتكىزىلدى. ال, كەشكە كورەرمەن قازاق اقىنى مۇقاعالي ماقاتاەۆتىڭ ءومىرىنىڭ سوڭعى جىلدارىن كورسەتەتىن «مۇقاعالي» ءفيلمىن تاماشالادى.
«سوڭعى جىلدارى ورتالىق ازيالىق كينو جايلى اقپاراتتىڭ ازدىعى سەزىلەدى. بىراق ءبىز, قىرعىز كينەماتوگرافيستەرى وزبەك, تاجىك, تۇرىكمەن جانە قازاق كينوسىن تاماشالاپ, ارىپتەستەرىمىزدىڭ جاڭالىقتارىن ءبىلىپ, بىرلەسكەن جوبالاردى ويلاستىرۋىمىز كەرەك. بۇل كورەرمەندەر ءۇشىن دە ماڭىزدى», دەدى قىرعىز رەجيسسەرى ارتىك سۋيۋندۋكوۆ.
6 تامىزدا قازاقستاندىق دەلەگاتسيا قىرعىز ارىپتەستەرىمەن بىرگە قىرعىزستاننىڭ ۇلتتىق تاريحي مۇراجايىندا بولدى. سول كۇنى كەشكە كينو كۇندەرىنىڭ جابىلۋ سالتاناتى ءوتىپ, ايجان قاسىمبەكتىڭ «وت» ءفيلمى كورسەتىلدى. كينوسۇيەر قاۋىم كارتينانى جىلى قابىلدادى جانە فيلمدە باياندالاتىن وقيعا بارشاعا ورتاق ەكەنىن اتاپ ءوتتى.
5-6 تامىز ارالىعىندا وتكەن قازاق كينوسى كۇندەرىن قازاقستاننىڭ ۇلتتىق كينونى قولداۋ مەملەكەتتىك ورتالىعى جانە قىرعىزستاننىڭ مادەنيەت, اقپارات, سپورت جانە جاستار ساياساتى مينيسترلىگى كينەماتوگرافيا دەپارتامەنتى ۇيىمداستىردى.
