مينيسترلىك مالىمەتىنشە, حالىقتىڭ الەۋمەتتىك وسال ساناتىنداعى 400 مىڭنان استام بالا مەملەكەتتەن قارجىلاي قولداۋعا يە بولادى.
بۇعان دەيىن بولىنگەن سوما 17 مىڭنان 40 مىڭ تەڭگەگە دەيىن بولسا, بيىل وقۋ-اعارتۋ مينيسترلىگىنىڭ ءوتىنىشى بويىنشا وزگەرىستەر ەنگىزىلدى. ەندى كومەك مولشەرى ەڭ تومەنگى كۇنكورىس دەڭگەيىنەن, ياعني 37 389 تەڭگەدەن تومەن بولماۋى كەرەك.
سونداي-اق جەرگىلىكتى اتقارۋشى ورگانداردىڭ ۇسىنىسىمەن كومەك كورسەتۋ تەتىگىنە وزگەرىستەر ەنگىزىلدى. ەندى اقشا اتا-انالارعا بالالارىمەن بىرگە مەكتەپ فورماسىن, اياق كيىمىن, كەڭسە تاۋارلارىن جانە ت.ب. ءوز بەتىنشە تاڭداي الۋى ءۇشىن بەرىلەدى. بۇعان دەيىن مۇنىڭ بارلىعىن اكىمدىكتەر ساتىپ الاتىن جانە تاۋاردىڭ كولەمىنە, ساپاسىنا جانە ت.ب. بايلانىستى ماسەلەلەر تۋىندايتىن.
«جالپىعا مىندەتتى ءبىلىم بەرۋ» قورىنىڭ اياسىندا اتاۋلى الەۋمەتتىك كومەك (ااك) الاتىن وتباسىلاردىڭ بالالارىنا, سونداي-اق ااك المايتىن, بىراق جان باسىنا شاققانداعى ورتاشا تابىسى كۇنكورىس دەڭگەيىنەن تومەن وتباسىلاردىڭ بالالارىنا ماتەريالدىق كومەك كورسەتىلەدى. سونداي-اق جاڭا وقۋ جىلى قارساڭىندا جەتىم جانە اتا-اناسىنىڭ قامقورلىعىنسىز قالعان بالالار, توتەنشە جاعدايعا تاپ بولعان وقۋشىلار جانە ت.ب. ماتەريالدىق كومەك الادى.
«وقۋ-اعارتۋ مينيسترلىگىنىڭ وكىلدەرى كوپ بالالى انالارمەن ءبىر ەمەس, بىرنەشە رەت كەزدەسىپ, اكىمدىكتەرمەن ماسەلەلەردى تالقىلاپ, ولاردىڭ تىلەكتەرىن ەسكەرە وتىرىپ, الەۋمەتتىك وسال بالالارعا كومەك كورسەتۋ ەرەجەلەرىن وزگەرتۋگە باستاما جاسادى. اتا-انالاردىڭ شوتىنا اقشا تىكەلەي ءتۇسىپ, مەكتەپ فورماسىن, كەڭسە تاۋارلارىن جانە بالالارعا ارنالعان اياق كيىمدى ءوز بەتىنشە تاڭداي الۋى ءۇشىن زاڭناماعا تۇزەتۋلەر ەنگىزدىك. مۇنىڭ ارتىقشىلىعى – بالا اتا-اناسىمەن بىرگە ءوزى تاڭداعان كيىممەن مەكتەپكە بارا الۋىندا. بۇعان دەيىن ساتىپ الۋمەن اكىمدىكتەردىڭ قىزمەتكەرلەرى اينالىساتىن. وسىعان بايلانىستى جىل سايىن كيىمنىڭ كولەمىنە, ساپاسىنا قاتىستى ماسەلەلەر تۋىنداپ, بالالار ونىمەن جۇرۋگە ۇيالاتىن.
مەكتەپتەردى قارجىلاندىرۋدى, ونىڭ ىشىندە وقۋشىلاردى قولداۋدى اكىمدىكتەر جۇزەگە اسىراتىندىقتان, بيىل ولار قارجىلاي كومەك الۋعا ءتيىستى بارلىق بالالارعا كەمىندە 37 389 تەڭگە كولەمىندە قاراجات بولەدى. بۇل ەڭ تومەنگى سوما, ال بۇرىن سومالار ءارتۇرلى بولدى - 17 مىڭ, 20 مىڭ جانە 25 مىڭ تەڭگەگە دەيىن جەتۋى مۇمكىن ەدى. بۇگىنگى تاڭدا ەڭ تومەنگى مولشەردەن ارتىق قارجى بولەتىن جەرگىلىكتى اتقارۋشى ورگاندار دا بار. ءبىز بۇنى تەك قۇپتايمىز. قاراجاتتىڭ ۇلعايۋى بۇل كومەكتى الاتىن 418 مىڭنان استام بالاعا وڭ اسەر ەتەدى», دەدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى دۋلات جەكەباەۆ.
