ء«بىلىمدى ۇلت» ساپالى ءبىلىم بەرۋ ۇلتتىق جوباسىن ىسكە اسىرۋ بويىنشا جۇمىس جۇرگىزىلۋدە. بالاباقشا, مەكتەپ, كوللەدج جانە قوسىمشا ءبىلىم دەڭگەيلەرى بويىنشا 12 كورسەتكىشكە قول جەتكىزۋ جانە 20 ءىس-شارا ورىنداۋ قاراستىرىلعان. بىلتىرعى ءىس-شارالار 100 پايىز ورىندالدى. 10 كورسەتكىشتىڭ 9-ىنا 100 پايىز قول جەتكىزىلدى. وسى جىلدىڭ التى ايى بويىنشا دا جۇمىس جوسپارعا سايكەس جۇرگىزىلۋدە», دەدى مينيستر ءوز سوزىندە.
ونىڭ ايتۋىنشا, بىلتىر 534 بالاباقشا اشىلىپ, 47 مىڭ ورىن پايدالانۋعا بەرىلگەن. ناتيجەسىندە 2-6 جاستاعى بالالاردى قامتۋ 88,4 پايىزدى, ال 3-6 جاستاعى بالالاردى قامتۋ 99 پايىزدى قۇرادى.
«وتكەن جىلى رەسپۋبليكالىق كورسەتكىشكە قول جەتكىزىلدى. الايدا, التى وبلىس وزدەرىنىڭ جوسپارلارىن تولىق ورىندامادى. ماسەلەن, بىلتىر الماتى وبلىسىندا بالاباقشالاردا 14 مىڭنان استام ورىن, ال الماتى قالاسىندا بەس مىڭنان استام ورىن اشىلسا, ال وسى وبلىسقا ۇقساس, ادام كوپ شوعىرلانعان تۇركىستان جانە قىزىلوردا وبلىستارىندا تەك ءبىر مىڭعا جۋىق ورىن عانا پايدالانۋعا بەرىلگەن. بۇل جەتكىلىكسىز. باسقا وبلىستاردىڭ جوسپاردان تىس قوسىمشا ورىن اشۋىنىڭ, مىسالى شىمكەنت قالاسىنىڭ 170 پايىزعا, جامبىل وبلىسىنىڭ 120 پايىزعا ورىنداۋىنىڭ ارقاسىندا رەسپۋبليكالىق كورسەتكىشكە 100 پايىز قول جەتكىزدىك. وسى جىلدىڭ سوڭىنا دەيىن 34 مىڭ ورىنعا ارنالعان 322 بالاباقشانى اشۋ جوسپارلانۋدا. العاشقى التى ايدىڭ قورىتىندىسىندا 12 900 ورىنعا 140 بالاباقشا اشىلدى. اكىمدىكتەردەن وسى باعىتتاعى جۇمىستى بەلسەندى جۇرگىزۋدى سۇرايمىن», دەدى اسحات ايماعامبەتوۆ.
