دۇيسەنبى كۇنى الماتىداعى «الماتى ارەنا» سپورت كەشەنىندە قازاقستان دەلەگاتسياسىن سالتاناتتى شىعارىپ سالۋ ءراسىمى ءوتتى. ءىس-شاراعا سپورت جانە دەنە شىنىقتىرۋ ىستەرى كوميتەتىنىڭ توراعاسى سامات ەرعاليەۆ, بوكستان وليمپيادا چەمپيونى ەرماحان يبرايموۆ قاتىسىپ, ەل قۇراماسىنا ساتتىلىك تىلەدى.
«بۇل ساپاردىڭ الدىندا جاتتىعۋلار, جارىستار, ۇلكەن دايىندىق بولدى. سىزدەر قازىردىڭ وزىندە جەڭىسكە دەگەن ەرىك-جىگەردى كورسەتىپ جۇرسىزدەر. ەندى تۇركياداعى باۋىرلاستار باسەكەسىندە جوعارى ناتيجە كورسەتىپ, جانكۇيەرلەر سەنىمىن اقتايسىزدار دەگەن سەنىمدەمىز», دەدى س.ەرعاليەۆ.
ويىنداردىڭ اشىلۋ سالتاناتىندا قازاقستاننىڭ تۋىن سەمسەرلەسۋدەن 23 جاسقا دەيىنگى ازيا چەمپيونى ەرلىك سەرتاي ۇستاپ شىعادى.
يسلاميادا دەگەن بەيرەسمي اتاۋعا يە بولعان يسلام ىنتىماقتاستىق ويىندارىنىڭ تاريحىنا توقتالار بولساق, بۇل باسەكە يسلام كونفەرەنتسياسى ۇيىمىنىڭ ۇيىتقى بولۋىمەن قولعا العان بىرەگەي جوبا ەكەنىن ايتا كەتۋ ءلازىم. باۋىرلاس مۇسىلمان ەلدەرىن بىرىكتىرۋگە ارنالعان ەڭ العاشقى سپورتتىق ويىن 2005 جىلدىڭ 8-20 ءساۋىر ارالىعىندا ساۋد ارابياسىنىڭ مەككە قالاسىندا ۇيىمداستىرىلدى. سول جىلى قازاقستان سپورتشىلارى تاماشا ناتيجەگە قول جەتكىزىپ, 27 جۇلدەمەن (13 التىن, 8 كۇمىس جانە 6 قولا) جالپىكوماندالىق ەسەپتە ءۇشىنشى ورىنعا يە بولدى. ال 24 التىن, 17 كۇمىس جانە 19 قولانى ولجالاعان جارىس قوجايىندارى كوماندالىق سىندا توپ جاردى. ەكىنشى ورىنعا مىسىر قۇراماسىنىڭ سپورتشىلارى يە بولدى. ولار جالپى سانى 42 (14+15+13) مەدال جەڭىپ الدى.
ەكىنشى يسلام ىنتىماقتاستىق ويىندارى ءداستۇر بويىنشا 2009 جىلى يراننىڭ استاناسى – تەگەراندا وتۋگە ءتيىس-ءتىن. الايدا ۇيىمداستىرۋشى ەل ءماجبۇرلى تۇردە ويىنداردى 2010 جىلعا شەگەردى. بىراق كەيىننەن يران مەن اراب ەلدەرى اراسىنداعى ازداعان داۋ تۋىنداپ, سالدارىنان اتالعان دودا مۇلدە وتپەي قالدى. ءسويتىپ, ارادا سەگىز جىل وتكەندە, ياعني 2013 جىلى يسلاميادانى يندونەزيا قابىلدادى.
سۋماترا ارالىنىڭ پالەمبانگ قالاسىندا وتكەن جارىستا 47 ەلدەن كەلگەن 1 800 سپورتشى ءتۇرلى-ءتۇستى جۇلدەلەردى ساراپقا سالدى. يرانداعى سايىس ۇيىمداستىرىلماي قالعان سوڭ جارىستىڭ بولاشاعىنا سەنىمسىزدىكپەن قاراعان بىرقاتار ەلدىڭ سپورتشىسى يندونەزياداعى باسەكەگە بارۋدان باس تارتتى. ولاردىڭ قاتارىندا قازاقستان ۇلتتىق قۇراماسىنىڭ وكىلدەرى دە بولدى. ءسويتىپ, ءتورتىنشى يسلاميادانىڭ جالپىكوماندالىق ەسەبىندە يندونەزيا سپورتشىلارى دارا شىقتى. جارىس قوجايىندارى ءوز ەلىندە وتكەن باسەكەدە 29 التىن, 26 كۇمىس, 23 قولا مەدال ەنشىلەدى. مىسىر سپورتشىلارى 24 التىن, 23 كۇمىس, 26 قولامەن بۇل جولى دا ەكىنشى ورىنعا تابان تىرەسە, تۇركيا (20+24+38) قۇراماسى ۇزدىك ۇشتىكتى تۇيىندەدى.
2017 جىلعى يسلاميادانىڭ شىمىلدىعى باۋىرلاس ازەربايجاننىڭ استاناسى – باكۋ قالاسىندا ءتۇرىلدى. ءتورتىنشى رەت ۇيىمداستىرىلعان ءدۇبىرلى دودادا قازاقستان سپورتشىلارى دا ونەر كورسەتۋگە بەل بۋىپ, 32 ساڭلاعىمىز باكۋگە اتتاندى. جەرلەستەرىمىز سپورتتىڭ بەس تۇرىنەن, اتاپ ايتقاندا, بوكس, دزيۋدو, تاەكۆوندو WTF, ەركىن جانە قىزدار كۇرەسى بويىنشا سىنعا ءتۇستى. وكىنىشكە قاراي, كاسپي تەڭىزىنىڭ جاعالاۋىندا وتكەن جارىستا وتانداستارىمىز وتە ناشار ناتيجە كورسەتتى. 10 كۇنگە جالعاسقان جارىستىڭ قورىتىندىسى بويىنشا قازاقستان سپورتشىلارى بار-جوعى ەكى التىن, بەس كۇمىس جانە 12 قولا مەدالمەن جالپىكوماندالىق ەسەپتە 14-ورىننان كورىندى. بوكسشىلارىمىز – ازات ماحمەتوۆ (52 كگ) پەن تۇرسىنباي قۇلاحمەت (75 كگ) باكۋدە ءانۇرانىمىزدى شىرقاتپاعاندا, التىنسىز قالايىن دەپ تۇر ەكەنبىز. جالپىكوماندالىق ەسەپتە ازەربايجان سپورتشىلارى توپ جاردى. ولار جالپى سانى 152 مەدال (74 التىن, 46 كۇمىس, 32 قولا) جەڭىپ الدى. تۇركيا (185 مەدال – 68, 63, 54) جانە يران (89 مەدال – 30, 26, 33) سپورتشىلارى ۇزدىك ۇشتىكتى تۇيىندەدى.
9-18 تامىز ارالىعىندا تۇركيانىڭ كونيا قالاسىندا جالاۋى جەلبىرەيتىن جارىس نەگىزى 2021 جىلدىڭ تامىز ايىندا وتۋگە ءتيىس ەدى. الايدا جارىستى ۇيىمداستىرۋشىلار توكيو وليمپياداسىنا بايلانىستى باسەكەنى ءبىر ايعا كەيىن شەگەردى. ال كەيىن تۇركيا بيلىگى كوروناۆيرۋستىڭ ورشۋىنە بايلانىستى يسلاميادانى ءبىر جىلعا كەيىنگە قالدىردى.
بايراقتى باسەكەنىڭ شىمىلدىعى رەسمي تۇردە بۇگىن تۇرىلگەنىمەن, ۆەلوسپورتشىلاردىڭ جارىسى 5 تامىز كۇنى باستالىپ كەتتى. العاشقى ءۇش كۇننىڭ قورىتىندىسى بويىنشا ۆەلوشاباندوزدار ەل قۇراماسىنىڭ قورجىنىنا 3 التىن, 1 كۇمىس, 3 قولا جۇلدە سالىپ ۇلگەردى.
اتاپ ايتار بولساق, ۆەلوسپورتتىڭ ترەك تۇرىندە ريناتا سۇلتانوۆا 10 شاقىرىم قاشىقتىققا جارىستا توپ جارسا, ءۇش شاقىرىمدىق جەكەلەي سىندا دا الدىنا جان سالمادى. سونىمەن قاتار الىشەر جۇماقان ەرلەر اراسىنداعى جەكەلەي سىندا (4 شاقىرىم) جارىس جەڭىمپازى اتاندى. ءدال وسى سىندا الىشەردەن كەيىن جارىس جولىن تاعى ءبىر وتانداسىمىز دميتري نوسكوۆ كەسىپ, كۇمىس جۇلدەگە يە بولدى. ال ترەكتەگى ۆەلوسپورتتا (15 كم) جارىستا ءا.جۇماقان قولاعا قول جەتكىزدى. سونداي-اق يانينا پاششەنكو مەن مارينا كۋزمينا دا ءوز ساناتتارى بويىنشا وتكەن جارىستا مارە سىزىعىن ءۇشىنشى بولىپ كەسىپ, قولا جۇلدە جەڭىپ الدى.
