كورمەگە قاتىسقان اۆتورلار اراسىندا رۋدنىي قالاسىنان كەلگەن ىسمەر روزا نۇرماحانوۆا دا بار.
– قازاقستانعا قونىس اۋدارعانىما ءبىر ايدان ەندى عانا استى. قولىمدا «قانداس» دەگەن قۇجاتىم بار. ازاماتتىق الىسىمەن وزبەكستاندا باستاعان ءىسىمدى قايتا جالعاستىرعىم كەلەدى. نەگىزىنەن قىز-كەلىنشەكتەرگە ارنالعان كيىم-كەشەك, ودان بولەك, قىز جاساۋىن, ەر ازاماتتاردىڭ شاپانىن تىگەمىن. ساحنالىق كيىمدەرگە دە تاپسىرىس ءتۇسىپ تۇرادى. الداعى ۋاقىتتا جەكە شەبەرحانامدى اشسام دەگەن ويدامىن. ويتكەنى قازىردىڭ وزىندە تاپسىرىس بەرىپ جاتقاندار كوبەيىپ كەتتى. قاسىما كەلىنىمدى كومەكشى ەتىپ الماقپىن, – دەيدى روزا.
فەستيۆال اياسىندا «ۇلت اسىلى» اتتى ارۋلار بايقاۋى ۇيىمداستىرىلدى. كوپشىلىك الدىندا باق سىناعان سۇلۋلار ونەرلى-ءبىلىمدى ەكەنىمەن قوسا, ۇلتتىق سالت-داستۇرگە دە جەتىك ەكەندەرىن كورسەتىپ, وتباسىلىق قۇندىلىقتاردى دارىپتەي ءبىلدى.
– ۇلتتىق قۇندىلىقتارىمىزدى كەڭىنەن ناسيحاتتاۋ ءۇشىن وڭىردە وسىنداي ءىس-شارالاردى ءجيى وتكىزۋ ماڭىزدى. اسىرەسە جاستار ءۇشىن اۋاداي قاجەت. بۇگىنگى فەستيۆالىمىزدىڭ احاڭنىڭ ەسكەرتكىشى الدىندا ءوتىپ جاتقانىنىڭ ءوزى ۇلكەن مانگە يە. كەيىنگى بۋىن ءتول تاريحى مەن سالت-ءداستۇرىن ءبىلىپ, رۋحى مىقتى بولىپ ءوسۋى كەرەك, – دەيدى « ۇلى دالا ۇرپاقتارى قوستاناي» قوعامدىق بىرلەستىگىنىڭ جەتەكشىسى نۇرجان ەرماعامبەتوۆ.
فەستيۆال بارىسىندا قالا جۇرتشىلىعى قوستاناي, رۋدنىي شاھارلارى مەن قوستاناي اۋدانىنان كەلگەن ونەرپازداردىڭ كونتسەرتىن تاماشالادى.
قوستاناي وبلىسى
