«AMANAT» پارتياسىنىڭ سقو بويىنشا فيليالى ءمالىم ەتكەندەي, پارتيا جانىنداعى «جەر اماناتى» كوميسسياسىنىڭ كوشپەلى وتىرىسى ءوتتى. جيىندا وڭىردە بوس جاتقان جەرلەردى قايتارۋ بويىنشا اتقارىلعان جۇمىستار قورىتىندىلاندى.
اتاپ ايتقاندا, سقو اقجار اۋدانىندا مەملەكەت مەنشىگىنە 11 مىڭ گا, قىزىلجار اۋدانىندا 4,2 مىڭ گا, جامبىل اۋدانىندا 2,5 مىڭ گا, ع.مۇسىرەپوۆ اتىنداعى اۋداندا 800 گا جانە مامليۋت اۋدانىندا 400 گا جەر قايتارىلدى. بۇعان قوسا, ايىرتاۋ, تايىنشا, م.جۇماباەۆ اۋداندارىندا مال جايۋ ءۇشىن 29 مىڭ گا جايىلىم جەردى حالىققا وتەۋسىز بەرۋ جونىندە اۋىل شارۋاشىلىعى قۇرىلىمدارىمەن مەموراندۋم جاسالدى.
«كارتاداعى تالداۋ جۇمىستارى بارلىق اۋداندا شەشىلمەگەن جەر ماسەلەسى بار ەكەندىگىن كورسەتتى. سونىڭ كەسىرىنەن كەيبىر پاي يەلەرى ماسەلەنى شەشۋ مۇمكىن ەمەس دەپ ويلاپ, قالاعا كوشىپ كەتتى. كوبىسى سوت پروتسەسىندە ۇتىلىپ, بىزگە جۇگىنەدى. باسقالارى جشس تاراپىنان قىسىم كورەدى. كوميسسيانىڭ بۇگىنگى مىندەتى – جەردى ءبىر جشس-دەن الىپ, ەكىنشىسىنە بەرۋ ەمەس. ءبىزدىڭ مىندەتىمىز – جەر قاتىناستارى سالاسىنداعى زاڭ ۇستەمدىگى مەن ادىلدىكتى قالپىنا كەلتىرۋ. ءبىز ءتۇرلى پروتسەستەرگە ىقپال ەتىپ, زاڭعا كوپتەگەن تۇزەتۋلەر ەنگىزە الامىز», دەدى «جەر اماناتى» كوميسسياسى توراعاسىنىڭ ورىنباسارى ءارى زاڭگەر باقىتجان بازاربەك.
كوميسسيا مۇشەسى, قوعام قايراتكەرى مۇرات ابەنوۆ قولدانىستاعى شارۋا قوجالىقتارىنىڭ تيىمسىزدىگىنە نازار اۋداردى.
«مىسالى, ادامداردىڭ ءبىر بولىگى قالادا تۇرادى. جالعان قۇجات جاساۋ, جينالىس وتكىزبەۋ ارقىلى جەردى ءبىر كومپانيادان ەكىنشى كومپانياعا بەرىپ جىبەرگەن شارۋاشىلىقتار بار. سوت ءىسى بولادى. شىن مانىندە, جەر اۋەل باستان-اق يگەرۋ, پايدالانۋ ءۇشىن الىنباعانى تۇسىنىكتى. قۇجاتتارداعى شاتاسۋلار اقىر-سوڭىندا جەردىڭ قۇنارىن كەتىرىپ, ساپاسىن تومەندەتىپ تىنادى. بۇل اينالىسپاسا بولمايتىن اسا ماڭىزدى ماسەلە», دەدى ول ءوز سوزىندە.
بەلوە اۋىلىنىڭ تۇرعىنى, اگرونوم-عالىم سۆەتلانا گاۋكتىڭ ايتۋىنشا, شارۋاشىلىقتاردىڭ كىمگە تيەسىلى ەكەنىن ءبىلۋ ءۇشىن ورتاق كارتا جاساۋ كەرەك. بۇل كارتا تۇرعىنداردىڭ جەرگە كىم يەلىك ەتەتىنىن جانە ناقتى قاي جەردى يەلەنىپ وتىرعانىن كورە الۋى ءۇشىن قاجەت.
سول كۇنى پارتيانىڭ پەتروپاۆلداعى وبلىستىق فيليالىندا «جەر اماناتى» كوميسسياسىنىڭ مۇشەلەرى ازاماتتاردى قابىلدادى. ءوتىنىش بىلدىرگەندەردىڭ باسىم كوپشىلىگى – جەرىنەن ايىرىلىپ قالعان ادامدار. ونىڭ اراسىندا ايىرتاۋ, اقجار, جامبىل جانە شال اقىن اۋداندارىنىڭ تۇرعىندارى بولدى. جەر ماسەلەسىمەن كوميسسياعا ءوڭىردىڭ 60-تان استام تۇرعىنى جۇگىندى. بارلىق ماسەلە پارتيالىق باقىلاۋعا الىندى.
