ەۋروكۋبوك باسەكەسىنىڭ ەكىنشى ىرىكتەۋ كەزەڭىندە سەنساتسيا جاساپ, حورۆاتيانىڭ داڭقتى «وسيەك» كلۋبىن ەكى ماتچ قورىتىندىسى بويىنشا (3:2) تىزە بۇكتىرگەن «قىزىلجار» ءۇشىنشى كەزەڭدە ەۋروپانىڭ تاعى ءبىر ازۋلى ۇجىمدارىنىڭ ءبىرى – اپوەل-مەن كەزدەستى. كيپر بىرىنشىلىگىنىڭ 28 دۇركىن جەڭىمپازى كەيىنگى جەتى جىلدا قازاقستاندىق كلۋبتارمەن وسىمەن بەسىنشى مارتە جولىقتى. «استانامەن» چەمپيوندار ليگاسى جانە ەۋروپا ليگاسىندا ءۇش مارتە, «قايسارمەن» ەۋروپا ليگاسىندا ءبىر رەت جاسىل الاڭدا جولدارى تۇيىسكەن ەدى. ەندى, مىنە, نيكوسيا كومانداسى «قىزىلجارمەن» كونفەرەنتسيا ليگاسى اياسىندا كەزدەسىپ تۇر.
كيپردىڭ باس شاھارى – نيكوسياداعى 12 مىڭ جانكۇيەر سىياتىن «پانكيپريا» ستاديونىندا وتكەن ەكى ۇجىم اراسىنداعى العاشقى كەزدەسۋدە الاڭ يەلەرى مىقتىلىق تانىتىپ, قازاقستاندىق مامان ءالي اليەۆ جاتتىقتىراتىن «قىزىلجاردى» 1:0 ەسەبىمەن جەڭىپ كەتتى. «وسيەكپەن» بولعان سىرت الاڭداعى قارىمتا ماتچتا شابۋىلعا كوبىرەك كوڭىل بولگەن ءا.اليەۆ بۇل جولى قورعانىسقا باسا ءمان بەرىپ, الاڭعا ءبىرىنشى مينۋتتان باستاپ بەس قورعاۋشى, ءتورت جارتىلاي قورعاۋشىنى شىعاردى. باس باپكەردىڭ بۇل تاكتيكاسى ءوز جەمىسىن بەردى دەۋگە بولادى.
تورەشىنىڭ ىسقىرىعى شالىنعاننان باستاپ ماتچتىڭ 90 مينۋتىنا دەيىن الاڭ يەلەرى ءبىر ساتكە دامىل تاپپاي, ۇنەمى شابۋىلداۋمەن بولدى. ويىننىڭ ەسەبىن جىلدام اشۋعا تىرىسقان اپوەل فۋتبولشىلارى العاشقى 20-25 مينۋتقا دەيىن ميروسلاۆ لوبانتسەۆ قورعاعان «قىزىلجار» قاقپاسىنا بىرنەشە رەت قاۋىپتى سوققى جاساعانىمەن, گول سوعا المادى. دەگەنمەن تانىمسىز شابۋىل اقىر سوڭىندا ءوز ناتيجەسىن بەرىپ, الاڭ يەلەرى كەزدەسۋدىڭ 27-مينۋتىندا دەگەندەرىنە جەتتى. ايىپ الاڭىنىڭ سىرتىنان ارىپتەسىنەن تاماشا پاس العان گەورگيوس ەفرەم م.لوبانتسەۆتىڭ قاقپاسىنا اۋەلەتە سوققى جاساپ, ماتچتىڭ ەسەبىن اشتى. اپوەل ءبىرىنشى تايمدا «قىزىلجار» قاقپاسىنا ءتورت ءدال سوققى جاساپ, سونىڭ بىرەۋىن عانا گولعا اينالدىرا الدى. ال ميروسلاۆ لوبانتسەۆ ءۇش مارتە سەيۆ جاسادى.
الاڭ يەلەرى ەكىنشى تايمدا دا شابۋىلدارىن ءبىر ساتكە دە توقتاتقان جوق. بىراق قانشا تىرىسسا دا, ەكىنشى 45 مينۋتتا قازاقستاندىق كوماندانىڭ قورعانىسىن بۇزا المادى. «قىزىلجاردىڭ» 27 جاستاعى قاقپاشىسى ەكىنشى تايمدا دا جۇمىسسىز قالعان جوق. ول بۇل جولى دا ءۇش مارتە كوزگە ءتۇسىپ, قاقپاسىن گولدان امان ساقتاپ قالدى. 90 مينۋت بويى قارسىلاس كوماندانىڭ قاقپاسىنا جارىتىپ سوققى جاساي الماعان «قىزىلجار» فۋتبولشىلارى 78-مينۋتتا اپوەل قاقپاشىسى ۆيد بەلەتستىڭ قاتەلىگىن پايدالانىپ, گول سوققان ەدى. الايدا قاپتالداعى تورەشى جالاۋشاسىن كوتەرىپ, مۋسسا كونەنىڭ ويىننان تىس قالعانىن باس تورەشىگە ەسكەرتتى. وسىلايشا, اپوەل مەن «قىزىلجار» اراسىنداعى كەزدەسۋدىڭ ءبىرىنشى ويىنى الاڭ يەلەرىنىڭ پايداسىنا اياقتالدى – 1:0.
ەندى بارلىق ماسەلە 11 تامىز كۇنى ەلورداداعى «استانا ارەنادا» وتەتىن قارىمتا ماتچتا شەشىلەدى. «وسيەكتى» سىرت الاڭدا 2:0 ەسەبىمەن تىزە بۇكتىرگەن «قىزىلجار» اپوەل-ءدى ءوز الاڭىندا دا قاپى قالدىرادى دەپ سەنەمىز. ويتكەنى ءوز ۇيىڭدە قابىرعالار دا كومەكتەسپەۋشى مە ەدى؟..
سونداي-اق ءدال وسى كۇنى قوستانايدىڭ «توبىلى» دا سىرت الاڭدا العاشقى كەزدەسۋىن وتكىزىپ, بوسنيا جانە گەرتسەگوۆينانىڭ «زرينسكي» كلۋبىنان 0:1 ەسەبىمەن جەڭىلىپ قالدى. ەكىنشى اينالىمدا گيبرالتاردىڭ «لينكولن رەد يمپس» ۇجىمىن سەنىمدى تۇردە جەڭگەن (3:0) «توبىل» بۇل كەزەڭدە قولدا تۇرعان تەڭ ەسەپتى ساقتاپ قالا المادى.
بوسنيانىڭ بىلتىرعى چەمپيونى «زرينسكي» ەۋروكۋبوكتاعى جولىن «توبىل» سياقتى چەمپيوندار ليگاسىنىڭ ىرىكتەۋ كەزەڭىنەن باستاعان. العاشقى اينالىمدا مولدوۆانىڭ «شەريف» كلۋبىنان ءبىر دوپ ايىرماسىمەن جەڭىلىپ قالعان سوڭ, كونفەرەنتسيا ليگاسىنا ءتۇسىپ قالدى. اتالعان ليگانىڭ ەكىنشى ىرىكتەۋ كەزەڭىندە ولار البانيانىڭ «تيراناسىمەن» ويناپ, ەكى ويىندا دا قارسىلاستارىنان باسىم ءتۇستى. ءسويتىپ ءۇشىنشى ىرىكتەۋ كەزەڭىندە «توبىلعا» قارسىلاس اتاندى.
بوسنيانىڭ موستار قالاسىندا ورنالاسقان Bijeli Brijeg ستاديونىندا وتكەن ەكى كلۋب اراسىنداعى ماتچتىڭ العاشقى تايمىندا الاڭ يلەرى دوپقا يەلىك ەتۋ, قاۋىپتى شابۋىل ۇيىمداستىرۋ بويىنشا دا ازداعان باسىمدىققا يە بولعانىمەن, الەكساندر موكين قورعاعان قاقپاعا گول سوعا المادى. ال ەكىنشى تايمنىڭ باس جاعىندا الاڭ قوجايىندارىنىڭ جارتىلاي قورعاۋشىسى يوسيپ چورلۋكا دورەكى ويىنى ءۇشىن تورەشى تاراپىنان ەكىنشى مارتە سارى قاعازبەن جازالانىپ, الاڭنان قۋىلدى. ءسويتىپ الاڭدا ءبىر فۋتبولشىسى كوپ بولىپ ويناعان «توبىل» شابۋىلعا شىعا باستادى. الايدا «زرينسكي» ءبىر ادام كەم بولىپ ويناسا دا قورعانىسقا جاتىپ الماي, قارسى شابۋىلعا يەك ارتىپ وتىردى. كەزدەسۋدىڭ 76-مينۋتى ءوتىپ جاتقاندا الاڭ يەلەرى كەزەكتى بۇرىشتاما ورىندايتىن مۇمكىندىك الدى. ايىپ الاڭىنا پاس اسىرماقشى بولعان نيكو يانكوۆيچ دوپتى موكين قورعاعان قاقپانىڭ الىس بۇرىشىنا ءدال كوزدەپ, گول سوعىپ كەتتى – 1:0.
قوستانايلىقتار ماتچتىڭ قالعان مينۋتىندا تارازى باسىن تەڭەستىرۋگە تىرىسقانىمەن, ونىسىنان تۇك شىقپايدى. 84-مينۋتتا ويىن ەرەجەسىن بۇزىپ, تورەشىمەن ءسوز تالاستىرعانى ءۇشىن «توبىلدىڭ» ورتالىق قورعاۋشىسى جاركو توماشەۆيچ تە قىزىل قاعازبەن جازالانىپ, ول دا الاڭنان قۋىلدى. ماتچتىڭ قالعان ۋاقىتىندا گول سوعىلعان جوق.
«توبىل» دا سىرت الاڭداعى العاشقى ويىندا جەڭىلگەنىمەن, كەلەسى كەزەڭگە شىعۋ مۇمكىندىگىن ساقتاپ قالا الدى. ەندى ەكى كلۋب اراسىنداعى قارىمتا كەزدەسۋ 11 تامىز كۇنى قوستانايداعى «ورتالىق» ستاديوندا وتەدى.
