كوسوۆولىق سەربتەر ەلدىڭ سولتۇستىگىندە سەربيامەن اراداعى شەكارا بەكەتتەرىن جاپقان ەلدە سيرەنالار داۋىسى ەستىلگەن. باسپاسوزدەگى حابارلاردا كوسوۆودا سيرەنالار ەستىلگەنى ايتىلسا, كوسوۆولىق سەربتەردىڭ وسى دىبىستارعا بايلانىستى شەكارانى جاۋىپ تاستاعانى حابارلاندى. ەرتەڭىنە ايماققا ناتو-نىڭ كوسوۆو كۇشتەرىنە (KFOR) تيەسىلى ەكى كولىك كەلگەنى حابارلاندى.
كوسوۆو پوليتسياسى ديرەكتورىنىڭ ورىنباسارى بەسيم حوتي ءوز مالىمدەمەسىندە كوسوۆولىق سەربتەر كولىكتەرمەن شەكاراعا توسقاۋىل قويعانىن, پوليتسيا كۇشتەرىنىڭ برنياك پەن يارينە شەكارا قاقپالارىن جاپقانىن مالىمدەدى. سونىمەن قاتار كوسوۆو پوليتسياسى كەيبىر جەرلەردە وق داۋىستارى ەستىلگەنىن, ولاردىڭ كەيبىرەۋلەرى پوليتسيا كۇشتەرىنە باعىتتالعانىن, بىراق ەشكىم زارداپ شەكپەگەنىن العا تارتتى.
كوسوۆولىق ءباسپاسوز بەتتەرىندە البان تەكتى ازاماتتاردىڭ شابۋىلعا ۇشىراعانى جانە بۇل شابۋىلداردا كولىكتەردىڭ زاقىمدالعانى تۋرالى اقپاراتتار تارادى. ۇكىمەت كوسوۆوداعى سەربتەردىڭ شەكارا وتكەلدەرىن جابۋ ارەكەتىن ايىپتاعانىنا ەسكەرە وتىرىپ, مۇنى بەلگراد تاراپى دايىنداعان دەپ كۇدىكتەنىپ وتىر. كوسوۆو پرەمەر-ءمينيسترى البين كۋرتي ەلدەگى اگرەسسيۆتى ارەكەتتەردى سەربيا جوسپارلاعانىن جانە ونىڭ ارانداتۋشىلىعىمەن جاسالعانىن, كوتەرىلىستەردىڭ باستى جاۋاپتىلارىنىڭ ءبىرى سەربيا پرەزيدەنتى الەكساندر ۆۋچيچ پەن سەربيا ۇكىمەتى كەڭسەسىنىڭ ديرەكتورى پەتار پەتكوۆيچ ەكەنىن العا تارتادى.
«سەربيانىڭ زاڭسىز قۇرىلىمدارى بۇرىنعىدان دا اگرەسسيۆتى قىلمىستىق توپتارعا اينالدى. بۇل ءبىزدىڭ ەل ءۇشىن وڭاي ەمەس, ويتكەنى ولاردى سولتۇستىك كورشىمىزدىڭ بۇكىل مەملەكەتتىك قۇرىلىمدارى قولداپ وتىر. كەشە ونداعان ورەسكەل جانە انىق زاڭ بۇزۋشىلىقتار بولدى. ءبىز حالىقارالىق ۇيىمداردى, ەو مەن ناتو-نى بەلگراد اشىق تۇردە ارانداتىپ, ارنايى دايىنداپ قارجىلاندىرعان كوسوۆونىڭ سولتۇستىگىندەگى قىلمىستىق توپتاردىڭ زورلىق-زومبىلىعى مەن اگرەسسياسىن ايىپتاۋعا شاقىرامىز», دەدى كۋرتي.
سەربيا قورعانىس مينيسترلىگى كوسوۆوداعى احۋالعا ارالاسپاعانىن جانە الەۋمەتتىك مەدياداعى جالعان اقپاراتقا سەنۋگە بولمايتىنىن مالىمدەدى. سەربيا پرەزيدەنتى الەكساندر ۆۋچيچ وقيعاعا قاتىستى مالىمدەمە جاساپ, كوسوۆولىق سەربتەر بۇدان بىلاي قۋدالاۋعا شىدامايتىنىن اشىق ايتتى. پرەزيدەنت ۆۋچيچ ءوز سوزىندە ء«بىز بەيبىتشىلىكتى قالايمىز, بىراق ءبىز بەرىلمەيمىز», دەپ ورتاعا بەيتاراپ پىكىر ۇسىندى. دەگەنمەن ءوز ەلىنىڭ قاقتىعىس تۋدىراتىن جانە قاقتىعىستى قالايتىن تاراپ ەمەس ەكەنىن اتاپ كورسەتكەن ۆۋچيچ: «سەربيا سلوبودان ميلوشەۆيچ پەن بوريس تاديچ كەزىندەگىدەي وڭاي جەڭەتىن ەل ەمەس» ەكەنىن ەسكەرتۋدى ۇمىتپادى.
سەربيانىڭ بۇعان دەيىن مۇنداي كۇردەلى جانە قيىن جاعدايدا بولماعانىن اتاپ كورسەتكەن ۆۋچيچ ءوز سوزىندە پريشتينا اكىمشىلىگىن وزدەرىن ۇنەمى قۇربان رەتىندە كورسەتۋگە تىرىساتىنىن تىلگە تيەك ەتتى. سونىمەن قاتار ۆۋچيچ كوسوۆوداعى البانداردىڭ پرەمەر-مينيستر البين كۋرتيدىڭ كەسىرىنەن قيىندىقتارعا تاپ بولعانىن جانە باتىستىڭ كوسوۆودا بولۋى مۇمكىن قاقتىعىستى قالامايتىنىن ايتتى.
ەۋرووداق كوسوۆوداعى وقيعالارعا الاڭداۋلىشىلىق تانىتىپ, وقيعاعا قاتىستى مالىمدەمە جاسادى. ەو كوسوۆونىڭ سولتۇستىگىندەگى وقيعادان سوڭ تاراپتاردى بريۋسسەلگە اتالعان ماسەلەنى تالقىلاۋعا شاقىردى. سەربيا مەن كوسوۆو اراسىنداعى بارلىق ماسەلەنىڭ ديالوگ ارقىلى شەشىلۋى كەرەكتىگىن اتاپ كورسەتكەن ەۋرووداق كوميسسياسىنىڭ وكىلى پيتەر ستانو «ەۋرووداق ەكى تاراپتى دا شەشىم تابۋ جانە مۇنداي شيەلەنىستەردىڭ قايتا بولۋىنا جول بەرمەس ءۇشىن بريۋسسەلدە الدىن الۋ جولدارىن تالقىلاۋعا شاقىرادى» دەدى. سونىمەن قاتار ستانو تۇراقتىلىق پەن قاۋىپسىزدىككە قاۋىپ توندىرەتىن جانە بارلىق ازاماتتاردىڭ ەركىن ءجۇرىپ-تۇرۋىنا كەدەرگى كەلتىرەتىن كەز كەلگەن كەلىسىلمەگەن جانە بىرجاقتى ارەكەتتى دەرەۋ توقتاتۋ كەرەك دەپ مالىمدەدى.
وسىدان كەيىن كوسوۆو ۇكىمەتى ەلدەگى سەربتەرگە ۇلتتىق نومىرلەر مەن جەكە كۋالىكتەرىن وزگەرتۋ تۋرالى ەنگىزگەن شەشىمىن ءبىر ايعا كەيىنگە قالدىرىپ, 1 قىركۇيەككە دەيىن شەگەردى. جالپى, كوسوۆو مەن سەربيا اراسىندا ءتۇرلى سەبەپتەرمەن شيەلەنىستەر ءجيى بولىپ تۇرادى. نەگىزگى سەبەپتەردىڭ ءبىرى – 2008 جىلى تاۋەلسىزدىگىن جاريالاعان كوسوۆونى سەربيانىڭ ءالى كۇنگە دەيىن ءوز تەرريتورياسى دەپ ساناۋىندا.
