ەڭ العاش 1927 جىلى «ۇلتتار ءتۋرنيرى» رەتىندە ۇيىمداستىرىلا باستاعان شاحماتشىلار باسەكەسى 1940 جىلدان باستاپ شاحمات وليمپياداسى دەگەن اتاۋمەن ەكى جىلدا ءبىر رەت وتكىزىلىپ كەلەدى. ۇلىبريتانيا استاناسى – لوندوندا باستاۋ العان جارىس 1931 جىلعا دەيىن جىلىنا ءبىر مارتە ۇيىمداستىرىلسا, 1933 جىلدان كەيىن جيىلىگىن ەكى جىلعا ۇزارتتى.
بيىل 44-ءشى رەت وتكىزىلىپ جاتقان وليمپياداعا 186 مەملەكەتتىڭ سپورتشىلارى قاتىسۋدا. جارىستىڭ العاشقى ءتورت تۋرىنىڭ قورىتىندىسى بويىنشا قازاقستاننىڭ قىزدار قۇراماسى ءۇش ماتچتا جەڭىسكە جەتىپ, سوڭعى ويىنىندا قارسىلاستارىمەن تەڭ ءتۇستى. ال ەرلەر اراسىنداعى سايىستا جەرلەستەرىمىز وليمپيادانى ءساتتى باستاعانىمەن, ەكىنشى تۋردا تاجىكستانعا ەسە جىبەردى. بىراق كەيىنگى ەكى كەزدەسۋدە جەڭىس تۋىن جەلبىرەتتى.
ءبيبىسارا اساۋباەۆا باستاعان قىزدار قۇراماسى العاشقى اينالىمدا گۆاتەمالا شاحماتشىلارىمەن شەبەرلىك بايقاسىپ, 4:0 ەسەبىمەن باسىم ءتۇستى. ەكىنشى راۋندتا بەلگيا قۇراماسىن تىزە بۇكتىردى – 3-1. ءبيبىسارا اساۋباەۆا مەن نازەركە نۇرعالي ءوز ويىندارىندا جەڭىسكە جەتسە, جانسايا ابدىمالىك پەن كسەنيا بالاباەۆا تەڭ وينادى. پەرۋ قۇراماسىمەن بولعان ءۇشىنشى تۋردا دا 3:1 ەسەبى تىركەلدى. ب.اساۋباەۆا, ك.بالاباەۆا جانە گ.ناقباەۆا قارسىلاستارىنان باسىم تۇسسە, ن.نۇرعالي جەڭىلىپ قالدى. ال ازىرگە سوڭعى, ءتورتىنشى تۋردا موڭعوليا شاحماتشىلارىمەن تەڭ وينادى – 2:2. قازاقستان قۇراماسىنا جالعىز جەڭىستى كسەنيا بالاباەۆا سىيلادى. ءبيبىسارا مەن گ ۇلىسحان تەڭ ناتيجە كورسەتسە, نازەركە قارسىلاسىنا جول بەردى.
قازاقستان ەرلەر قۇراماسى العاشقى اينالىمدا قىتايلىق تايپەيمەن كەزدەسىپ, 3:1 ەسەبىمەن ۇستەمدىك تانىتتى. بۇل كەزدەسۋدە قازىبەك نوگەربەك پەن الىشەر سۇلەيمەن جەڭىس تويىن تويلاسا, ارىستان ورازاەۆ پەن مۇرتاس قاجىعاليەۆ تەڭ ناتيجەگە قول جەتكىزدى. وكىنىشكە قاراي, جەرلەستەرىمىز ەكىنشى ماتچتا تاجىكستان شاحماتشىلارىنا جول بەردى – 1,5-2,5. الايدا كەيىنگى ەكى تۋردا ليۆاندى – 4:0, ماروككونى 2,5:1,5 ەسەبىمەن جەڭدى.
كەشە قازاقستان ەرلەر قۇراماسى لاتۆيا قۇراماسىمەن, قىزدارىمىز كۋبا شاحماتشىلارىمەن شەبەرلىك بايقاستى. شاحمات وليمپياداسىندا سپورتشىلار شۆەيتساريالىق جۇيە بويىنشا 11 تۋر وينايدى.
