اتاپ ايتقاندا, فەدوروۆ اۋدانىندا 7,1 مىڭ گا, ناۋىرزىم اۋدانىندا 20,8 مىڭ گا قايتارىلدى, ال مەڭدىقارا اۋدانىندا ءىرى شارۋا قوجالىقتارىنىڭ بىرىمەن 3,4 مىڭ گا جەردى كوپشىلىكتىڭ قولدانىسى ءۇشىن وتەۋسىز بەرۋ تۋرالى مەموراندۋم جاسالدى.
ء«بىزدىڭ كوميسسيانىڭ باستى ماقساتى – پايدالانىلماي جاتقان, ونىڭ ىشىندە زاڭسىز جەكە مەنشىككە ءوتىپ كەتكەن جايىلىمداردى قايتارۋ جانە ولاردى اۋىل تۇرعىندارى ءۇشىن قولجەتىمدى ەتۋ. جىل باسىنان بەرى قوستاناي وبلىسىندا 60 مىڭ گا پايدالانىلماي جاتقان جەر قايتارىلدى. سونىمەن قاتار جالپى اۋدانى 45,4 مىڭ گا بولاتىن 24 جەر ۋچاسكەسىن قايتارۋ ماسەلەسى بۇگىندە سوت وندىرىسىندە. جالپى, «جەر اماناتى» كوميسسياسىنىڭ جۇمىسى 267 مىڭ گا جەردى مەملەكەت مەنشىككە قايتارۋعا كومەكتەستى», دەدى پارتيا حاتشىسى داۋلەت كارىبەك.
مەڭدىقارا اۋدانىنىڭ تۇرعىندارىمەن پىكىرلەسۋ كەزىندە پارتيا مۇشەلەرى ءوز باستامالارىن العا تارتتى. قازىرگى ۋاقىتتا, قولدانىستاعى زاڭناماعا سايكەس ەلدى مەكەن ماڭىنداعى 5-تەن 20 شاقىرىمعا دەيىنگى قاشىقتاعى جەر كوپشىلىكتىڭ پايدالانۋى ءۇشىن تاركىلەۋگە رۇقسات ەتىلەدى. كوميسسيا مۇشەلەرى وسىنداي قايتارىلعان ۋچاسكەلەردى جەكە قولعا بەرۋگە جول بەرمەۋ ءۇشىن اۋىلدىق وكرۋگتەردىڭ بالانسىندا قالدىرۋدى ۇسىنادى.
بۇل باستامانى كاسىپكەر ەركىن بۇقانوۆ قولداپ وتىر. ول سونداي-اق مەملەكەت اگروبيزنەسكە كوبىرەك كوڭىل ءبولۋى كەرەك ەكەنىن اتاپ ءوتتى. «اۋىلدا اۋىل شارۋاشىلىعىمەن اينالىسۋعا دايىن ىسكەر ادامدار وتە كوپ, بىراق جەردىڭ جوقتىعى – وتە وزەكتى ماسەلە. ولار قالاي ۇلەستىرىلدى؟ يگەرىلمەگەن جەرلەردى, ارينە, مەملەكەتكە قايتارۋ كەرەك», دەدى ول.
«بىزدە قازىر ۇلكەن شارۋاشىلىقتارعا, تۇتاس اگرارلىق كومپانيالارعا سۇراسا بولدى ءاردايىم جەر بەرىلەدى. ءادىل بولۋى ءۇشىن حالىقتىڭ دا جەردى ۇلەستىرۋ كونكۋرسىنا قاتىسۋعا مۇمكىندىگى بولۋى كەرەك», دەپ اتاپ ءوتتى مەڭدىقارا اۋدانى ارحيپوۆكا اۋىلىنىڭ تۇرعىنى سۆەتلانا كاليەۆسكايا.
كوميسسيا مۇشەسى, قوعام قايراتكەرى مۇرات ابەنوۆ بەلگىلى ءبىر ادامدار جەردى جاي عانا يەلەنىپ, ونى يگەرمەي وتىرعانىنا, ال بۇل ارەكەت ەكونوميكاعا زيان كەلتىرەتىنىنە نازار اۋداردى.
«جەر نە ءۇشىن قايتارىلىپ جاتىر؟ مەملەكەت ءبارىن وزىنە قايتارىپ الۋ ءۇشىن ەمەس, بۇل قادام ەڭ الدىمەن ونى يگەرۋگە دايىن ادامدارعا بەرۋ ءۇشىن جاسالادى. سۇراقتى باسقالاي قويعىم كەلەدى. ماسەلە مال جايۋعا عانا قاتىستى ەمەس. انىعىندا, بۇل جەردە ماڭىزدىسى – ادىلدىك ورناتۋ. جەر ماسەلەسىن قالا اۋماعىندا دا, ەلدى مەكەندە دە قاراستىرىپ جاتىرمىز. تاعى ءبىر وزەكتى ماسەلە بار. اۋىلدا جەر, جۇمىس جوق بولعاندىقتان, جاستار قالاعا كوشىپ جاتىر. ال وندا تۇرعىن ءۇي جوق. قايتىپ كەلسە, مۇندا جەر جوق. جەردى حالىققا قايتارۋ – تىكەلەي مىندەتىمىز», دەدى م.ابەنوۆ.
كوميسسيانىڭ تاعى ءبىر مۇشەسى, بلوگەر عالىم بايتوق جەردى ءجون-جوسىقسىز يەلەنىپ وتىرعاندارعا قارسى ءىس-قيمىل ماسەلەسىندەگى ەلەۋلى جەتىستىكتەردى اتاپ ءوتتى.
«لاتيفۋنديستەردىڭ باسىم كوپشىلىگى جەردى وزگە ادامداردىڭ پايدالانۋىنا مۇمكىندىك بەرمەدى نەمەسە جالعا بەرىپ وتىردى. ءتىپتى قاراعاندى وبلىسىندا 1 ملن, ماڭعىستاۋ وبلىسىندا 3 ملن گا جۋىق جەر ءبىر ادامنىڭ قولىندا بولعان جاعدايلار كەزدەستى. كوميسسيانىڭ الداعى مىندەتى – وسى ماسەلەنىڭ بارلىعىن باقىلاۋدا ۇستاۋ. جەردى يگەرمەيتىندەردەن قايتارىپ الىپ قانا قويماي, ونىڭ ءتيىمدى پايدالانۋىن قاداعا-
لاۋ ماڭىزدى», دەدى ع.بايتوق.
ەسكە سالا كەتەيىك, سوڭعى بىرنەشە اي ىشىندە كوميسسيا مۇشەلەرى جەتىسۋ, قاراعاندى, جامبىل, تۇركىستان جانە اقتوبە وبلىستارىن ارالادى. جەر كوميسسياسىنىڭ قۇرامىنا پارلامەنت ماجىلىسىنە اmanat پارتياسىنان سايلانعان دەپۋتاتتار – ايدوس سارىم, ەرلان سايروۆ, جاناربەك ءاشىمجان, قاينار اباسوۆ, ارتۋر پلاتونوۆ جانە تاۋەلسىز ساراپشىلار مەن قوعام قايراتكەرلەرى – باقىتجان بازاربەك, مارات ءباشىموۆ, كيريلل پاۆلوۆ, مارات شيبۇتوۆ, ماقسات تولىقباي, تاعى باسقالار كىرەدى.
جەر ماسەلەسىن نەعۇرلىم جەدەل شەشۋ ءۇشىن قازاقستاندىقتار بارلىق زاڭ بۇزۋ فاكتىلەرى تۋرالى اmanat پارتياسىنىڭ «جەدەل جەلى» 8 800 080 44 41 تەلەفونىنا حابارلاي الادى. وتىنىمدەر WhatsApp ارقىلى دا +7 700 800 44 41 ءنومىرى بويىنشا قابىلدانادى.
